ଭୁବନେଶ୍ୱର : ଭାରତୀୟ ପାଣିପାଗ ବିଭାଗ ମହାନିର୍ଦ୍ଦେଶକଙ୍କ ସଦ୍ୟତମ ସୂଚନା ଅନୁଯାୟୀ, ବଙ୍ଗୋପସାଗରରେ ସୃଷ୍ଟି ହୋଇଥିବା ଅବପାତ ଆଜି ସନ୍ଧ୍ୟାରୁ ରାତି ମଧ୍ୟରେ ଏକ ‘ଗଭୀର ଅବପାତ’ର ରୂପ ନେବାକୁ ଯାଉଛି । ଏହି ସାମୁଦ୍ରିକ ଝଡ଼ ପଶ୍ଚିମ ଓ ଉତ୍ତର-ପଶ୍ଚିମ ଦିଗରେ ଦ୍ରୁତ ଗତି କରି ଆସନ୍ତା ୨୩ ତାରିଖ ରାତିରେ ଉପକୂଳ ଅତିକ୍ରମ କରିବ ବୋଲି ପୂର୍ବାନୁମାନ କରାଯାଇଛି । ବିଶେଷ କରି ଆନ୍ଧ୍ରପ୍ରଦେଶର ବିଶାଖାପାଟଣା ଏବଂ ଓଡ଼ିଶାର ଗୋପାଳପୁର ମଧ୍ୟବର୍ତ୍ତୀ କୌଣସି ଏକ ସ୍ଥାନରେ ଏହା ସ୍ଥଳଭାଗ ଛୁଇଁବାର ଦୃଢ଼ ସମ୍ଭାବନା ରହିଛି ।
୨୩-୨୪ ପାଇଁ କୋରାପୁଟ, ଗଜପତି ଏବଂ ଗଞ୍ଜାମ ଜିଲ୍ଲା ପାଇଁ ରେଡ୍ ୱାର୍ଣ୍ଣିଂ ଜାରି କରାଯାଇଛି, ଯେଉଁଥିରେ କେତେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ଏବଂ ଗୋଟିଏ କିମ୍ବା ଦୁଇଟି ସ୍ଥାନରେ ଅତ୍ୟନ୍ତ ପ୍ରବଳ ବର୍ଷା ହୋଇପାରେ। ୨୪-୨୫ ସେପ୍ଟେମ୍ବର ପାଇଁ କଳାହାଣ୍ଡି, ନବରଙ୍ଗପୁର, କୋରାପୁଟ ଏବଂ ମାଲକାନଗିରି ଜିଲ୍ଲା ପାଇଁ ରେଡ୍ ୱାର୍ଣ୍ଣିଂ ଜାରି କରାଯାଇଛି।
ସ୍ଥଳଭାଗ ମୁହାଁ ହେଉଥିବା ଏହି ଗଭୀର ଅବପାତ ଉପକୂଳ ନିକଟତର ହେବା କ୍ଷଣି ଏହାର ଗତିପଥ ସମ୍ପୂର୍ଣ୍ଣ ମନ୍ଥର ହୋଇଯିବ । ଫଳସ୍ୱରୂପ, ଏହା ଦକ୍ଷିଣ ଓଡ଼ିଶା ଉପକୂଳରେ ସାଧାରଣ ଠାରୁ ଅଧିକ ସମୟ ଧରି ସକ୍ରିୟ ରହିବ । ଆଇଏମଡି ଡିଜିଙ୍କ ସତର୍କବାଣୀ ଅନୁଯାୟୀ, ଗଭୀର ଅବପାତର ଏହି ସ୍ଥିରତା ଯୋଗୁଁ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାରେ ଲଗାଣ ତଥା ଅତି ପ୍ରବଳ ବର୍ଷା ହେବାର ଆଶଙ୍କା । କେତେକ ନିର୍ଦ୍ଦିଷ୍ଟ ସ୍ଥାନରେ ଅତ୍ୟନ୍ତ ପ୍ରବଳ ବର୍ଷା ମଧ୍ୟ ଦେଖିବାକୁ ମିଳିପାରେ, ଯାହା ଜନଜୀବନକୁ ବ୍ୟାପକ ଭାବେ ପ୍ରଭାବିତ କରିବ ।
୨୪ ତାରିଖ ବେଳକୁ ଉପକୂଳବର୍ତ୍ତୀ ଅଞ୍ଚଳଗୁଡ଼ିକରେ ବର୍ଷାର ପରିମାଣ ଧୀରେ ଧୀରେ କମିଆସିବ । ତେବେ ଏହାର ପ୍ରଭାବ ଆଭ୍ୟନ୍ତରୀଣ ଓଡ଼ିଶା ଉପରେ ପଡ଼ିବ ଏବଂ ସେଠାରେ ବର୍ଷାର ମାତ୍ରା ବୃଦ୍ଧି ପାଇବ । ପରବର୍ତ୍ତୀ ସମୟରେ ଏହି ଲଘୁଚାପ କ୍ଷେତ୍ରଟି କ୍ରମଶଃ ଉତ୍ତର ଏବଂ ଉତ୍ତର-ପଶ୍ଚିମ ଦିଗକୁ ଗତି କରି ଛତିଶଗଡ଼ ଅଭିମୁଖେ ଅଗ୍ରସର ହେବ ବୋଲି ପାଣିପାଗ ବିଭାଗ ସ୍ପଷ୍ଟ କରିଛି ।
ଯେତେବେଳେ ଏହି ଗଭୀର ଅବପାତ ସ୍ଥଳଭାଗ ଅତିକ୍ରମ କରିବ, ସେହି ସମୟରେ ପବନର ବେଗ ଘଣ୍ଟାପ୍ରତି ୫୫ ରୁ ୬୫ କିଲୋମିଟର ପର୍ଯ୍ୟନ୍ତ ରହିବାର ଆଶଙ୍କା କରାଯାଉଛି । ଲଗାଣ ବର୍ଷା ଓ ପବନ ଯୋଗୁଁ ରାଜ୍ୟର ପାହାଡ଼ିଆ ଅଞ୍ଚଳଗୁଡ଼ିକରେ ବ୍ୟାପକ ଭୂସ୍ଖଳନ ଏବଂ ମାଟି ଅତଡ଼ା ଖସିବାର ବିପଦ ରହିଛି । ସେହିପରି ପ୍ରବଳ ପବନ ଯୋଗୁଁ ଛୋଟ ଛୋଟ ଗଛ ଓ ଡାଳ ଭାଙ୍ଗି ରାସ୍ତା ଅବରୋଧ ହୋଇପାରେ । ସବୁଠାରୁ ବଡ଼ ଚିନ୍ତାର ବିଷୟ ହେଉଛି କୃଷି କ୍ଷେତ୍ର; ଏହି ଅଦିନିଆ ଝଡ଼ ଓ ବର୍ଷା କାରଣରୁ କ୍ଷେତରେ ଥିବା ଧାନ ସମେତ ଅନ୍ୟାନ୍ୟ ଫସଲ ବ୍ୟାପକ ମାତ୍ରାରେ ନଷ୍ଟ ହେବାର ସମ୍ଭାବନା ଥିବାରୁ ଚାଷୀକୂଳ ଆତଙ୍କିତ ଅବସ୍ଥାରେ ଅଛନ୍ତି ।
ଆଗାମୀ ଗଭୀର ଅବପାତ ପାଇଁ ମୋଟ ୩୩ଟି ଓଡ୍ରାଫ୍ ଟିମ୍ ନିୟୋଜିତ କରାଯାଇଛି। ଏଥିମଧ୍ୟରୁ ୨୪ଟି ଟିମ୍ ସଂବେଦନଶୀଳ ଜିଲ୍ଲାଗୁଡ଼ିକରେ ମୁତୟନ କରାଯାଇଛି।ଗଞ୍ଜାମରେ ୬, ଗଜପତିରେ ୩, କୋରାପୁଟରେ ୬, ମାଲକାନଗିରିରେ ୩, ରାୟଗଡ଼ାରେ ୩, କଳାହାଣ୍ଡିରେ ୨ ଏବଂ ବଲାଙ୍ଗୀରରେ ଗୋଟିଏ ଓଡ୍ରାଫ ଟିମ ମୁତୟନ ହୋଇଛି। ଏହା ବ୍ୟତୀତ, ୯ଟି ଓଡ୍ରାଫ୍ ଟିମ୍କୁ ଗଞ୍ଜାମ ଜିଲ୍ଲାର ଛତ୍ରପୁରସ୍ଥିତ ଓଏସଏପି (ଓଏସଏପି) ୮ମ ବାଟାଲିୟନ, ଓଡ୍ରାଫ୍ ୟୁନିଟ୍ରେ ରିଜର୍ଭ ରଖାଯାଇଛି।