ଭୁବନେଶ୍ୱର : ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପର କାର୍ଯ୍ୟାନ୍ୱୟନ ତ୍ୱରାନ୍ୱିତ ହୋଇଛି । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ କ୍ଷେତ୍ରସ୍ତରୀୟ ଅନୁଧ୍ୟାନରୁ ଏହା ଜଣାପଡିଛି । ଗତକାଲି ସନ୍ଧ୍ୟାରେ ଶ୍ରୀ ମହାପାତ୍ର ପୁରୀରେ ପହଞ୍ଚି କ୍ଷେତ୍ରସ୍ତରରେ କାର୍ଯ୍ୟରତ ଯନ୍ତ୍ରୀମାନଙ୍କ ସହ ଆଲୋଚନା ପୂର୍ବକ ସେମାନଙ୍କର କାର୍ଯ୍ୟ-ସାରଣୀ ସମୀକ୍ଷା କରିଥିଲେ ।
ବର୍ତ୍ତମାନ ପର୍ଯ୍ୟନ୍ତ ହୋଇଥିବା ଅଗ୍ରଗତି ଭିତ୍ତିରେ ପ୍ରକଳ୍ପର ବିଭିନ୍ନ ପର୍ଯ୍ୟାୟ ପାଇଁ ଶ୍ରୀ ମହାପାତ୍ର ସମୟସୀମା ଧାର୍ଯ୍ୟ କରିଥିଲେ । ଏହି ଏ୍ୟୖତିହାସିକ (ହେରିଟେଜ୍) ପ୍ରକଳ୍ପର ନିର୍ମାଣ ଓ ସୌନ୍ଦର୍ଯ୍ୟକରଣ କାର୍ଯ୍ୟ ଆସନ୍ତା ୯ ମାସ ମଧ୍ୟରେ ପୂର୍ଣ୍ଣାଙ୍ଗ କରିବା ପାଇଁ ମୁଖ୍ୟ ଶାସନ ସଚିବ କାର୍ଯ୍ୟନିର୍ବାହୀ ସଂସ୍ଥା ଓ.ବି.ସି.ସି.ଙ୍କୁ ନିର୍ଦ୍ଦେଶ ଦେଇଥିଲେ ।
ସମୀକ୍ଷାରୁ ଜଣାପଡିଥିଲା ଯେ ବିଶ୍ୱ ପ୍ରସିଦ୍ଧ ଜଗନ୍ନାଥ ମନ୍ଦିରର ମେଘନାଦ ପାଚେରୀ ଚତୁପାର୍ଶ୍ୱରେ ତୀର୍ଥଯାତ୍ରୀ, ଭକ୍ତ ଓ ସେବାୟତମାନଙ୍କ ସୁବିଧା ଏବଂ ଏହି ପ୍ରାଚୀନ ମନ୍ଦିର ସୁରକ୍ଷା ଉଦ୍ଦେଶ୍ୟରେ ହେରିଟେଜ୍ କରିଡ଼ୋର ଆରମ୍ଭ କରାଯାଇଛି । ଏହି କରିଡ଼ୋର ମଧ୍ୟ ଶ୍ରୀମନ୍ଦିର ଏବଂ ମହାପ୍ରଭୁ ଜଗନ୍ନାଥଙ୍କ ସହ ସଂପୃକ୍ତ ପର୍ବପର୍ବାଣୀ ଓ ଯାନିଯାତ ଆୟୋଜନରେ ବିଶେଷ ସହାୟକ ହେବ ।
ପ୍ରାପ୍ତ ସୂଚନାରୁ ଜଣାପଡିଛି, ଏହି କରିଡ଼ୋରରେ ମୁଖ୍ୟତଃ ଭିତର ପରିକ୍ରମା ପଥ, ସବୁଜ ବଳୟ, ବାହାର ପରିକ୍ରମା ପଥ, ସାଧାରଣ ସୁବିଧା ସମୂହ ଆଦି ଜୋନ୍ ରହିବ । ଭିତର ପରିକ୍ରମା ପଥ ପାରମ୍ପାରିକ ରୀତିରେ ଦେବାଦେବୀମାନଙ୍କ ଶୋଭାଯାତ୍ରା ଓ ଭକ୍ତମାନଙ୍କ ମନ୍ଦିର ପରିକ୍ରମା ପାଇଁ ବ୍ୟବହାର ହେବ । ସବୁଜ ବଳୟରେ ବୃକ୍ଷ, ଜଗନ୍ନାଥ ସଂସ୍କୃତି ସହ ଜଡ଼ିତ ପଥର କଳାକୃତି, ପୁଷ୍ପ-କୁଞ୍ଜ, ବୃକ୍ଷ ଆଦି ସ୍ଥାନିତ ହେବ । ସାଧାରଣ ସୁବିଧା ଜୋନ୍ରେ ସେବାୟତ ଓ ଭକ୍ତମାନଙ୍କ ନିମନ୍ତେ ପାନୀୟଜଳ ସ୍ରୋତ, ବସିବା ସ୍ଥାନ, ମନ୍ଦିର ଦାନବାକ୍ସ୍, ସୂଚନା ଓ ସହାୟତ କେନ୍ଦ୍ର, ସୁରକ୍ଷା ନିୟନ୍ତ୍ରଣ କେନ୍ଦ୍ର, ପ୍ରାଥମିକ ଚିକିତ୍ସା ସୁବିଧା, ଜିନିଷପତ୍ର ରଖିବା ସ୍ଥାନ, ମହିଳା ଓ ପୁରୁଷମାନଙ୍କ ପାଇଁ ଅଲଗା ଅଲଗା ଶୌଚାଳୟ, ବିଦ୍ୟୁତ ଯୋଗାଣ ନିୟନ୍ତ୍ରଣ କେନ୍ଦ୍ର ଆଦି ରହିବ ।
ପ୍ରକଳ୍ପର ପ୍ରଥମ ପର୍ଯ୍ୟାୟ କାର୍ଯ୍ୟ ପ୍ରାୟ ୩୩୧.୨୮ କୋଟି ଟଙ୍କା ଆକଳନରେ ଆରମ୍ଭ କରାଯାଇଛି । ଏହି ସମସ୍ତ କାର୍ଯ୍ୟରେ ଉଲ୍ଲେଖନୀୟ ଅଗ୍ରଗତି ହୋଇଛି । ମନ୍ଦିରର ତିନି ପାର୍ଶ୍ୱରୁ ସଂଯୋଗୀକରଣ ରାସ୍ତା, ୬ ଟି ଶୌଚାଳୟ, ୩ ଟି ବିଶ୍ରାମ ସ୍ଥାନ, କ୍ଲୋକ୍ ରୁମ ଆଦିର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଆଗେଇ ଚାଲିଛି । ପ୍ରକଳ୍ପ ପୂର୍ଣ୍ଣାଙ୍ଗ ହେଲେ ବିଶ୍ୱ ପ୍ରସିଦ୍ଧ ଶ୍ରୀକ୍ଷେତ୍ର ଓ ଶ୍ରୀମନ୍ଦିର ଭକ୍ତ ତଥା ପର୍ଯ୍ୟଟକମାନଙ୍କ ପାଇଁ ଏକ ଅତି ଆକର୍ଶଣୀୟ ଓ ଶାନ୍ତିଦାୟକ ସ୍ଥାନ ହେବ ବୋଲି ବୁଦ୍ଧିଜୀବିମାନେ ଆଶାପ୍ରକାଶ କରିଛନ୍ତି ।