Home Industry ପ୍ରତିରକ୍ଷା ଯନ୍ତ୍ରପାତି ଯୋଗାଇବ ଆନାଡ଼୍ରୋନ୍ ସିଷ୍ଟମ

ପ୍ରତିରକ୍ଷା ଯନ୍ତ୍ରପାତି ଯୋଗାଇବ ଆନାଡ଼୍ରୋନ୍ ସିଷ୍ଟମ

ଭୁବନେଶ୍ୱର : ପ୍ରତିରକ୍ଷା ମନ୍ତ୍ରଣାଳୟର ମେକ୍ ଇନ୍ ଇଣ୍ଡିଆ ଯୋଜନା ଅନ୍ତର୍ଗତ ଏକ ଗୁରୁତ୍ୱପୂର୍ଣ୍ଣ ଉପଲବ୍ଧି ଆକାରରେ ଓଡିଶା ସ୍ଥିତ ଆନାଡ୍ରୋନ୍ ସିଷ୍ଟମ୍ ଭାରତୀୟ ସ୍ଥଳସେନା ଏବଂ ବାୟୁସେନାକୁ ଉନ୍ନତ ପ୍ରତିରକ୍ଷା ଯନ୍ତ୍ରପାତି ଯୋଗାଇବା ପାଇଁ ଚୁକ୍ତିବଦ୍ଧ ହୋଇଛି।

ମେକ୍ ଇନ୍ ଇଣ୍ଡିଆ ବର୍ଗ ୨ ଅନ୍ତର୍ଗତ ୫୦% ରୁ ଅଧିକ ଦେଶଜ ଅଂଶୀଦାର ଥିବା ଶିଳ୍ପ ଦ୍ବାରା ଆର୍ଥିକ ଅନୁଦାନ ପ୍ରାପ୍ତ ଅନୁସନ୍ଧାନ ଏବଂ ବିକାଶ ପ୍ରକଳ୍ପ ପାଇଁ ଉଦ୍ଦିଷ୍ଟ ଥିବା ବର୍ଗରେ ୧୨୫ ମନୋଭ୍ୟୁରେବଲ୍ ଏକ୍ସପେଣ୍ଡେବଲ୍ ଏରିଆଲ୍ ଟାର୍ଗେଟ୍ (MEAT) ଏବଂ ୯୬ କୋଟି ଟଙ୍କା ମୂଲ୍ୟର ଆନୁସଙ୍ଗିକ ଉପକରଣ ଯୋଗାଇବା ପାଇଁ ଚୁକ୍ତିନାମା ଗତ ସପ୍ତାହରେ ଅନୁଷ୍ଠିତ ହୋଇଥିଲା।

ଉଲ୍ଲେଖଯୋଗ୍ୟ, ଲାରସେନ୍ ଏବଂ ଟୁବ୍ରୋ ଭଳି କମ୍ପାନୀ ମଧ୍ୟ ଏହି ଚୁକ୍ତି ପାଇଁ ଆଗ୍ରହ ପ୍ରକାଶ କରିଥିଲେ। କମ୍ପାନୀ ଦ୍ୱାରା ଉତ୍ପାଦିତ ହେଉଥିବା ଶିକ୍ରା ମେଟ୍ ସିଷ୍ଟମ ହେଉଛି ବଂଶୀ ଜେଟ ୪୦ ସିଷ୍ଟମର ଏକ ସ୍ଥାନୀୟ ସଂସ୍କରଣ ଯାହା ପୂର୍ବରୁ ସଶସ୍ତ୍ର ବାହିନୀ ଦ୍ୱାରା ଆମଦାନୀ ହୋଇଥିଲା।

ସରଳ, ସ୍ୱଳ୍ପ କ୍ଷମତା ସମ୍ପନ୍ନ ମଡେଲ ବିମାନ ଟାର୍ଗେଟରୁ ଅତ୍ୟାଧୁନିକ ଉଚ୍ଚ ସବସୋନିକ୍ ଏବଂ ସୁପରସୋନିକ୍ ସିଷ୍ଟମ ପର୍ଯ୍ୟନ୍ତ ବାୟୁ ପ୍ରତିରକ୍ଷା ତାଲିମ ପାଇଁ ସିଷ୍ଟମ ଗଠନ ପାଇଁ କମ୍ପାନୀ ବ୍ରିଟେନର ଏକ ପ୍ରତିରକ୍ଷା ବୈଷୟିକ କମ୍ପାନୀ ସହିତ ସହଭାଗିତା ପ୍ରତିଷ୍ଠା କରିଛି | ଗୋପାଳପୁରର ଟାଟା ଷ୍ଟିଲ୍ ସ୍ୱତନ୍ତ୍ର ଅର୍ଥନୈତିକ କ୍ଷେତ୍ରରେ ଏହାର ଏକ ଉତ୍ପାଦନ ୟୁନିଟ୍ ରହିଛି ।

ଏହି କାର୍ଯ୍ୟକ୍ରମରେ ଯୋଗ ଦେଇ ବ୍ରିଗେଡ଼ିଅର (ଅବସରପ୍ରାପ୍ତ) ଏଲ.ସି ପଟ୍ଟନାୟକ କହିଥିଲେ “ଏହି ପଦକ୍ଷେପ ଦେଶର ପ୍ରତିରକ୍ଷା ପ୍ରକଳ୍ପରେ ଅଂଶଗ୍ରହଣ କରିବା ପାଇଁ ଅଧିକ ଏମଏସଏମଇ ମାନଙ୍କୁ ଆକର୍ଷିତ କରିବ ଯାହା ଆମଦାନୀ ଭାରକୁ ହ୍ରାସ କରିବା ସହ ଭାରତର ସ୍ୱଦେଶୀ ପ୍ରତିରକ୍ଷା ଉତ୍ପାଦନ କ୍ଷେତ୍ରକୁ ପ୍ରୋତ୍ସାହିତ କରିବ”।

ଉଦ୍ୟୋଗୀ ତଥା ଏମଏସଏମଇ ମାନଙ୍କୁ ନିରନ୍ତର ଉତ୍ସାହିତ କରୁଥିବାରୁ ରାଜ୍ୟକୁ ଧନ୍ୟବାଦ ଜଣାଇ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅନନ୍ତ ଭାଲୋଟିଆ ସିଙ୍ଗଲ ୱିଣ୍ଡୋ ପୋର୍ଟାଲ – GO SWIFT କୁ ପ୍ରଶଂସା କରିଛନ୍ତି ଏବଂ ଓଡିଶାରେ କମ୍ପାନୀର ଭବିଷ୍ୟତ ବିସ୍ତାର ଉପରେ ଗୁରୁତ୍ୱାରୋପ କରିଛନ୍ତି।

ଖବର ଅନୁଯାୟୀ, ଓଡ଼ିଶା ଏରୋସ୍ପେସ୍ ଏବଂ ପ୍ରତିରକ୍ଷା ଉତ୍ପାଦନ ନୀତି ୨୦୧୮ର ସଂରଚନା ଓ ପ୍ରସ୍ତୁତ କରିବାରେ ଆନାଡ୍ରୋନ୍ ସିଷ୍ଟମ୍ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା ଏବଂ ୨୦୧୬ ରେ ବ୍ରିଟେନରେ ଓଡିଶାର ଏକ ପ୍ରତିନିଧୀ ଦଳର ଏକ ଅଂଶ ମଧ୍ୟ ଥିଲା |

ପ୍ରତିରକ୍ଷା, ଏରୋସ୍ପେସ୍ ଏବଂ ଅନ୍ୟାନ୍ୟ ନୂତନ ଯୁଗର ଶିଳ୍ପକୁ ପ୍ରୋତ୍ସାହିତ କରିବାକୁ ଆଗ୍ରହୀ ଥିବା ମେକ୍ ଇନ୍ ଓଡିଶା କାର୍ଯ୍ୟକ୍ରମକୁ ଏଭଳି ପ୍ରୟାସ ଆହୁରି ରୁଦ୍ଧିମନ୍ତ କରିବ।

LEAVE A REPLY

Please enter your comment!
Please enter your name here