ଭୁବନେଶ୍ୱର : ସିଟି ତାଲିମ ନେବାକୁ ଯୋଗ୍ୟ ବିବେଚିତ ହୋଇଥିବା ଛାତ୍ରଛାତ୍ରୀଙ୍କ ପାଇଁ ହଷ୍ଟେଲ ଚିନ୍ତା । ଛାତ୍ରମାନେ କୌଣସି ପ୍ରକାରେ ଘରୋଇ ହଷ୍ଟେଲରେ ରହିଯାଉଥିବାବେଳେ ଯେଉଁସବୁ ସିଟି ତାଲିମ କେନ୍ଦ୍ରର ନିଜସ୍ୱ ଛାତ୍ରୀନିବାସ ନାହିଁ ଛାତ୍ରୀମାନେ ସେଠାରେ ନାମ ଲେଖାଇବାକୁ ପଛଘୁଞ୍ଚା ଦେଉଛନ୍ତି ।
ରାଜ୍ୟରେ ମୋଟ୍ ୬୫ଟି ସିଟି ତାଲିମ କେନ୍ଦ୍ର ଥିବାବେଳେ ୧୬ କେନ୍ଦ୍ରରେ ଆଦୌ ଛାତ୍ରାବାସ ସୁବିଧା ନାହିଁ । ୩୨ଟି ସିଟି ତାଲିମ କେନ୍ଦ୍ରରେ ଛାତ୍ରୀମାନଙ୍କ ପାଇଁ ହଷ୍ଟେଲ ସୁବିଧା ନଥିବାବେଳେ ୨୫ଟିରେ ଛାତ୍ରମାନଙ୍କ ପାଇଁ ସୁବିଧା ନାହିଁ । ଏହା ଫଳରେ ସିଟି ତାଲିମ ପାଇଁ ଯୋଗ୍ୟ ବିବେଚିତ ହୋଇଥିବା ପିଲାମାନେ ଏବେ ନାମ ଲେଖାଇବାକୁ କେତେକ ସ୍ଥାନରେ ପଛଘୁଞ୍ଚା ଦେଉଛନ୍ତି ।
ବିଶେଷକରି ଛାତ୍ରୀମାନଙ୍କୁ ଅଭିଭାବକମାନେ ଘର ଠାରୁ ଦୂରରେ ଘରୋଇ ହଷ୍ଟେଲରେ ଛାଡିବାକୁ ରାଜି ହେଉନାହାନ୍ତି । ଗୋଟିଏ ପଟେ ଘରୋଇ ହଷ୍ଟେଲରେ ଖର୍ଚ୍ଚ ଅଧିକ ହେଉଥିବାବେଳେ ଅନ୍ୟ ପଟେ ସୁରକ୍ଷା ଚିନ୍ତା ମଧ୍ୟ ରହିଛି । ତେଣୁ ଚଳିତବର୍ଷ ସିଟି ପରୀକ୍ଷାରେ ଯୋଗ୍ୟ ବିବେଚିତ ହେଉଥିବା ବହୁ ଛାତ୍ରୀ ଏବେ ହଷ୍ଟେଲ ଚିନ୍ତାରେ ରହିଛନ୍ତି ।
ବାଲେଶ୍ୱରରେ ଥିବା ୩ଟି ସିଟି ତାଲିମ କେନ୍ଦ୍ରରେ ଆଦୌ ଛାତ୍ରାବାସର ସୁବିଧା ନାହିଁ । ସେହିଭଳି ଭଦ୍ରକ, ବଲାଙ୍ଗିରର ୨ଟି, କଟକର ଗୋଟିଏରେ ଆଦୌ ଛାତ୍ରାବାସ ନାହିଁ । କଟକର ଆଉ ତିନିଟି ସିଟି ତାଲିମ କେନ୍ଦ୍ରରେ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ନାହାିଁ । ଗଞ୍ଜାମ ଜିଲ୍ଲାର ଗୋଟିଏ ତାଲିମ କେନ୍ଦ୍ରରେ ଆଦୌ ଛାତ୍ରବାସ ନଥିବାବେଳେ ତିନିଟି ସିଟି ତାଲିମ କେନ୍ଦ୍ରରେ ଛାତ୍ରଙ୍କ ପାଇଁ ହଷ୍ଟେଲ ସୁବିଧା ଥିବାବେଳେ ଛାତ୍ରୀଙ୍କ ପାଇଁ ଏହା ନାହିଁ । ଆଉ ଗୋଟିଏ ତାଲିମ କେନ୍ଦ୍ରରେ ଉଭୟ ଛାତ୍ର ଓ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ରହିଛି ।
ଝାରସୁଗୁଡାରେ ଥିବା ଗୋଟିଏ ସିଟି ତାଲିମ କେନ୍ଦ୍ରରେ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ନାହିଁ । କଳାହାଣ୍ଡିରେ ଥିବା ଦୁଇଟି ସିଟି ତାଲିମ କେନ୍ଦ୍ର ମଧ୍ୟରୁ ଗୋଟିଏରେ କେବଳ ୨୦ଜଣ ଛାତ୍ରଙ୍କ ପାଇଁ ହଷ୍ଟେଲ ସୁବିଧା ରହିଛି । କେନ୍ଦ୍ରାପଡାରେ ଥିବା ଦୁଇଟି ସିଟି ତାଲିମ କେନ୍ଦ୍ରରେ ଆଦୌ ଛାତ୍ରାବାସ ନାହିଁ । ଖୋରଧାରେ ଥିବା ୩ଟି ସିଟି ତାଲିମ କେନ୍ଦ୍ର ମଧ୍ୟରୁ ଗୋଟିଏରେ ଆଦୌ ଛାତ୍ରାବାସ ନଥିବାବେଳେ ଆଉ ଗୋଟିଏରେ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ନାହିଁ ।
ମୟୁରଭଞ୍ଜାରେ ଥିବା ୪ଟି ତାଲିମ କେନ୍ଦ୍ର ମଧ୍ୟରୁ ୨ଟିରେ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ନଥିବାବେଳେ ନବରଙ୍ଗପୁରରେ ଗୋଟିଏ ସିଟି ତାଲିମ କେନ୍ଦ୍ରରେ ଛାତ୍ରୀଙ୍କପାଇଁ ହଷ୍ଟେଲ ସୁବିଧା ନାହିଁ । ପୁରୀରେ ଥିବା ୪ଟି ସିଟି ତାଲିମ କେନ୍ଦ୍ର ମଧ୍ୟରୁ ମାତ୍ର ଗୋଟିଏରେ ଛାତ୍ରୀଙ୍କ ପାଇଁ ହଷ୍ଟେଲ ସୁବିଧା ରହିଛି ।
ଏଭଳି ସ୍ଥିତିରେ କୃତକାର୍ଯ୍ୟ ଛାତ୍ରୀମାନେ ନାମ ଲେଖାଇବାକୁ ପଛଘୁଞ୍ଚା ଦେଉଥିବାରୁ ସରକାର ତୁରନ୍ତ ପ୍ରତ୍ୟେକ ସିଟି ତାଲିମ କେନ୍ଦ୍ରରେ ଛାତ୍ରୀମାନଙ୍କ ପାଇଁ ହଷ୍ଟେଲ ସୁବିଧା ଯୋଗାଇଦେବାକୁ ମତପ୍ରକାଶ ପାଉଛି । (ତଥ୍ୟ)