ଭୁବନେଶ୍ୱର : କଂଗ୍ରେସ ଆଜି ୫ଟି ବିଧାନସଭା ଆସନରେ ତାହାର ପ୍ରାର୍ଥୀ ପରିବର୍ତ୍ତନ କରିଛି । ଏହିସବୁ ଆସନଗୁଡିକ ହେଲା ଜଳେଶ୍ୱର, ନିଳଗିରି, ବରୀ, ଆଠମଲ୍ଲିକ ଓ ପୁରୀ ।
ଜଳେଶ୍ୱର ଆସନରେ କଂଗ୍ରେସ ପୂର୍ବତନ ବିଧାୟକ ଦେବୀ ପ୍ରସନ୍ନ ଚାନ୍ଦଙ୍କୁ ପ୍ରାର୍ଥୀ କରିଥିବାବେଳେ ଏବେ ତାଙ୍କ ସ୍ଥାନରେ ସୁଦର୍ଶନ ଦାସଙ୍କୁ ପ୍ରାର୍ଥୀ କରିଛି । ସେହିଭଳି ନୀଳଗିରିରେ ଅକ୍ଷୟ ଆଚାର୍ଯ୍ୟଙ୍କୁ ନୂଆ ପ୍ରାର୍ଥୀ କରିଛି ।
ବରୀ ଆସନରେ କଂଗ୍ରେସ ପୂର୍ବରୁ ଶ୍ରୀମତୀ ଆରତୀ ଦେଓଙ୍କ ପ୍ରାର୍ଥୀ କରିଥିଲା । ଆଜି ତାଙ୍କ ସ୍ଥାନରେ ପୂର୍ବତନ ମନ୍ତ୍ରୀ ତଥା ଗତକାଲି କଂଗ୍ରେସରେ ଯୋଗ ଦେଇଥିବା ଦେବାଶିଷ ନାୟକଙ୍କୁ ପ୍ରାର୍ଥୀ କରିଛି । ଶ୍ରୀ ନାୟକ ବିଜେଡି ଛାଡି ବିଜେପିରେ ଯୋଗଦେଇ ଟିକଟ ପାଇନଥିଲେ । ଗତକାଲି କଂଗ୍ରେସରେ ଯୋଗଦେବା ପରେ ତାଙ୍କୁ ତତ୍କାଳ ଟିକଟ ମିଳିଛି ।
ଆଠମଲିକ ଆସନରେ କଂଗ୍ରେସ ହିମାଂଶୁ ଚାଉଳିଆଙ୍କୁ ପ୍ରାର୍ଥୀ କରିଛି । ପୂର୍ବରୁ ଏଠାରୁ ଦଳ ବିଜୟାନନ୍ଦ ଚାଉଳିଆଙ୍କୁ ପ୍ରାର୍ଥୀ କରିଥିଲା । ସେହିଭଳି ଆଠଗଡରେ ସୁଦର୍ଶନ ସାହୁଙ୍କୁ ପ୍ରାର୍ଥୀ କରିଛି । ଏଠାରେ ପୂର୍ବରୁ କଂଗ୍ରେସ ପ୍ରାର୍ଥୀ ହୋଇଥିବା ମେହବୁବୁ ଅହମଦ ଖାନ୍ ଟିକଟ ଫେରାଇ ଦେଇଥିଲେ ।
ସେହିଭଳି ପୁରୀରେ କଂଗ୍ରେସ ତାହାର ପ୍ରାର୍ଥୀ ପରିବର୍ତ୍ତନ କରି ଉମ ବଲ୍ଲଭ ରଥଙ୍କୁ ଟିକଟ ଦେଇଛି । ପୂର୍ବରୁ ଦଳ ସୁଜିତ କୁମାର ମହାପାତ୍ରଙ୍କ ପ୍ରାର୍ଥୀ କରିଥିଲା । ସୁଜିତଙ୍କ ଟିକଟ କଟିବାପରେ ଆଜି ତାଙ୍କର ସମର୍ଥକମାନେ ପୁରୀ ଜିଲ୍ଲା କଂଗ୍ରେସ କାର୍ଯ୍ୟାଳୟରେ ବ୍ୟାପକ ଭଙ୍ଗାରୁଜା କରିଛନ୍ତି ।