ପାରାଦୀପ : ଭାରତ ସରକାରଙ୍କ ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନ ପତ୍ର ସୂଚନା କାର୍ଯ୍ୟାଳୟ (ପିଆଇବି), ଭୁବନେଶ୍ୱର ପକ୍ଷରୁ ଏଠାରେ ଆଞ୍ଚଳିକ ଗଣମାଧ୍ୟମ କର୍ମଶାଳା ‘ବାର୍ତ୍ତାଳାପ’ ଅନୁଷ୍ଠିତ ହୋଇଯାଇଛି । ପାରାଦୀପ ବନ୍ଦର ପ୍ରାଧିକରଣର ଅଫିସର୍ସ କ୍ଲବ ଠାରେ ଆୟୋଜିତ ଏହି କର୍ମଶାଳାରେ ପାରାଦୀପ ବନ୍ଦରର ଅଧ୍ୟକ୍ଷ ଶ୍ରୀ ପି.ଏଲ ହରନାଧ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶରେ ବନ୍ଦର ପରିଚାଳନା କ୍ଷେତ୍ରରେ ବ୍ୟାପକ ପରିବର୍ତ୍ତନ ଆସିଛି ବୋଲି ଶ୍ରୀ ହରନାଧ କହିଛନ୍ତି, ଯାହାର ଫଳସ୍ୱରୂପ ୨୦୩୦ ସୁଦ୍ଧା ପାରାଦୀପ ବନ୍ଦରର କ୍ଷମତା ୪୦୦ ମିଲିଅନ ଟନକୁ ବୃଦ୍ଧି ପାଇବ ବୋଲି ଶ୍ରୀ ହରନାଧ କହିଛନ୍ତି ।
ନିଜର ଉଦବୋଧନରେ ପାରାଦୀପ ବନ୍ଦରର ବିଭିନ୍ନ ଉପଲବ୍ଧି ବିଷୟରେ ସୂଚନା ଦେଇ ସେ କହିଥିଲେ ଯେ ପାରଦୀପ ବନ୍ଦର ବାର୍ଷିକ ଟ୍ରାଫିକ୍ କ୍ଷେତ୍ରରେ ୧୭.୫% ରୁ ଅଧିକ ସକାରାତ୍ମକ ଅଭିବୃଦ୍ଧି ହାସଲ କରିଛି ଯାହାକି ଦେଶର ପ୍ରମୁଖ ବନ୍ଦରଗୁଡ଼ିକ ମଧ୍ୟରେ ସର୍ବାଧିକ । ୧୬ ଫେବୃଆରୀ ୨୦୨୩ ସୁଦ୍ଧା ୧୧୬.୫୯ ନିୟୁତ ମେଟ୍ରିକ୍ ଟନ୍ ପଣ୍ୟ କାରବାର ହୋଇଛି, ଯାହାକି ପୂର୍ବ ବର୍ଷ ଠାରୁ ଅଧିକ ।
ବର୍ତ୍ତମାନ ସୁଦ୍ଧା ପାରାଦୀପ ବନ୍ଦର ୮୦ ପ୍ରତିଶତ ବର୍ଥକୁ ମେକାନାଇଜ୍ କରିସାରିଥିବା ବେଳେ ୨୦୩୦ ସୁଦ୍ଧା ଶତପ୍ରତିଶତ ମେକାନାଇଜଡ୍ ବନ୍ଦର ଲକ୍ଷ୍ୟ ହାସଲ ଦିଗରେ ଅଗ୍ରସର ହେଉଛି । ବନ୍ଦର ଆଧୁନିକୀକରଣ କ୍ଷେତ୍ରରେ ଗତ ୭ ବର୍ଷ ମଧ୍ୟରେ ପାରାଦୀପରେ ୩୨୦୦ କୋଟି ଟଙ୍କାର ପ୍ରକଳ୍ପ କାର୍ଯ୍ୟକାରୀ କରାଯାଇଛି ।
ସବୁଜ ଇନ୍ଧନ କ୍ଷେତ୍ରରେ ଗ୍ରହଣ କରାଯାଇଥିବା ପଦକ୍ଷେପ ବିଷୟରେ ସୂଚନା ଦେଇ ଶ୍ରୀ ହରନାଧ କହିଥିଲେ ଯେ ଖୁବଶୀଘ୍ର ପାରାଦୀପ ବନ୍ଦର ଏକ ସବୁଜ ହାଇଡ୍ରୋଜେନ୍ କେନ୍ଦ୍ରରେ ପରିଣତ ହେବାକୁ ଯାଉଛି । ଏଥିନିମନ୍ତେ ମନୋନୀତ ହୋଇଥିବା ଦେଶର ତିନୋଟି ବନ୍ଦର ମଧ୍ୟରୁ ପାରାଦୀପ ଅନ୍ୟତମ ।
ସମ୍ମାନିତ ଅତିଥି ଭାବେ ପାରାଦୀପ ଅତିରିକ୍ତ ଜିଲ୍ଲାପାଳ ଡକ୍ଟର କାହ୍ନୁ ଚରଣ ଧୀର ଯୋଗ ଦେଇଥିଲେ । ବିପର୍ଯ୍ୟୟ ପରିଚାଳନାରେ ଗଣମାଧ୍ୟମର ଭୂମିକା’’ ବିଷୟବସ୍ତୁ ଉପରେ ସମ୍ମାନିତ ଅତିଥି ଡ ଧୀର ନିଜର ବକ୍ତବ୍ୟ ରଖିଥିଲେ। ସେ ମହାବାତ୍ୟା ଠାରୁ ଆରମ୍ଭ କରି ଫନି ପର୍ଯ୍ୟନ୍ତ ବିଭିନ୍ନ ପ୍ରାକୃତିକ ବିପର୍ଯ୍ୟୟର ଅବତାରଣା କରି ଗଣମାଧ୍ୟମର ଭୂମିକା ଉପରେ ଆଲୋକପାତ କରିଥିଲେ ।
ପାରାଦୀପରେ ଅବସ୍ଥାପିତ ଭାରତୀୟ ତଟରକ୍ଷୀ ବାହିନୀ (ଆଇସିଜି)ର ଡିଆଇଜି ଯଶୱନ୍ତ କୁମାର ସିଂ ‘‘ସାମୁଦ୍ରିକ/ଉପକୂଳ ସ୍ବଚ୍ଛତା ବଜାୟ ରଖିବା ଏବଂ ସ୍ବଚ୍ଛ ସାଗର ସୁରକ୍ଷିତ ସାଗର ଅଭିଯାନରେ ଆଇସିଜିର ଭୂମିକା’’ ବିଷୟବସ୍ତୁ ଉପରେ ଅଭିଭାଷଣ ରଖିଥିଲେ ।
ଏହି କାର୍ଯ୍ୟକ୍ରମରେ ପାରାଦୀପର ବରିଷ୍ଠ ସାମ୍ବାଦିକ ଶ୍ରୀ ସୁକଦେବ ଜେନା ଉଦବୋଧନ ଦେଇଥିଲେ । ଶ୍ରୀ ଜେନା ସାମ୍ବାଦିକମାନଙ୍କର ସୁରକ୍ଷା ଉପରେ ଜୋର ଦେଇଥିଲେ । ଏ ଦିଗରେ ଆଇନ ଆଣିବା ଲାଗି ସେ ସରକାରଙ୍କୁ ନିବେଦନ କରିଥିଲେ ।
ପିଆଇବିର ଯୁଗ୍ମ ନିର୍ଦ୍ଦେଶକ ତଥା ଉପ ପ୍ରେସ ରେଜିଷ୍ଟ୍ରାର ଏବଂ ଚଳଚ୍ଚିତ୍ର ପ୍ରମାଣନ ବୋର୍ଡର ଆଞ୍ଚଳିକ ଅଧିକାରୀ ଡକ୍ଟର ଗିରିଶ ଚନ୍ଦ୍ର ଦାଶ ବାର୍ତ୍ତାଳାପ କାର୍ଯ୍ୟକ୍ରମରେ ଅଧ୍ୟକ୍ଷତା କରିବା ସହିତ ଏହାର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ ସୂଚନା ଦେଇଥିଲେ। ସେ କହିଥିଲେ ଯେ, ଗଣମାଧ୍ୟମ ଓ ସରକାରଙ୍କ ମଧ୍ୟରେ ସମ୍ପର୍କ ସ୍ଥାପନ ଲାଗି ବାର୍ତ୍ତାଳାପ ଏକ ମଞ୍ଚ ଯୋଗାଇ ଦେଇଥାଏ। ଭାରତର ସ୍ବାଧୀନତା ଆନ୍ଦୋଳନରେ ଗଣମାଧ୍ୟମ ଉଲ୍ଲେଖନୀୟ ଭୂମିକା ନିର୍ବାହ କରିଥିଲା।
ମହାତ୍ମା ଗାନ୍ଧୀଙ୍କ ଠାରୁ ଆରମ୍ଭ କରି ବାଲ ଗଙ୍ଗାଧର ତିଲକଙ୍କ ପର୍ଯ୍ୟନ୍ତ ଦେଶର ମହାନ ସ୍ବାଧୀନତା ସଂଗ୍ରାମୀମାନେ ଦେଶ ସ୍ବାଧୀନତା ପାଇଁ ଜନ ଜାଗରଣ ସୃଷ୍ଟି କରିବା ଲାଗି ପତ୍ରପତ୍ରିକା ଓ ସମ୍ବାଦପତ୍ରକୁ ଉପଯୋଗ କରିଥିଲେ । ଆମ ସମସ୍ତଙ୍କୁ ଗଣମାଧ୍ୟମର ଉପଯୋଗ ବଢ଼ାଇବାକୁ ହେବ । ଏହା ଆମ ଗଣତନ୍ତ୍ରକୁ ସୁଦୃଢ଼ କରିବ ବୋଲି ଡକ୍ଟର ଦାଶ କହିଥିଲେ ।
ପିଆଇବିର ଗଣମାଧ୍ୟମ ଓ ଯୋଗାଯୋଗ ଅଧିକାରୀ ତଥା ବାର୍ତ୍ତାଳାପର ନୋଡାଲ ଅଧିକାରୀ ଶ୍ରୀ ପ୍ରଦୀପ କୁମାର ଚୌଧୁରୀ ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ପିଆଇବିର ଭୂମିକା ଏବଂ କାର୍ଯ୍ୟ ପରିଚାଳନା ସମ୍ପର୍କରେ ବକ୍ତବ୍ୟ ରଖିଥିଲେ ।
ବୈଷୟିକ ଅଧିବେଶନରେ ଜଗତସିଂହପୁର ଜିଲ୍ଲା ସମ୍ପର୍କରେ ବିଶେଷ ଉଲ୍ଲେଖ ସହିତ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା/ମତ୍ସ୍ୟପାଳନ ସହ ଜଡ଼ିତ ଅନ୍ୟ ସରକାରୀ ଯୋଜନା ସମ୍ପର୍କରେ ଆଲୋଚନା କରାଯାଇଥିଲା। ଏଥିରେ ଜିଲ୍ଲା ଉପ ମତ୍ସ୍ୟ ଅଧିକାରୀ ରେଶମା ସିଂ ଉପସ୍ଥିତ ରହି ନିଜର ମତ ରଖିଥିଲେ।
ସେହିପରି ଜିଲ୍ଲା ମୁଖ୍ୟ କୃଷି ଅଧିକାରୀ ପ୍ରଫୁଲ୍ଲ ସେଠି ପିଏମ କିଷାନ ଓ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ସମ୍ପର୍କରେ ଆଲୋଚନା କରିଥିଲେ। ସେହିପରି ଜଗତସିଂହପୁର ଜିଲ୍ଲାରେ ଷ୍ଟାର୍ଟଅପ୍ସ ଓ ଏମଏସଏମଇ ପାଇଁ କାର୍ଯ୍ୟକାରୀ ହେଉଥିବା କେନ୍ଦ୍ରୀୟ ଯୋଜନା ସମ୍ପର୍କରେ ଜିଲ୍ଲା ଶିଳ୍ପ କେନ୍ଦ୍ରର ଆଇପିଓ ବକ୍ତବ୍ୟ ରଖିଥିଲେ । କାର୍ଯ୍ୟକ୍ରମ ଶେଷରେ ଆୟୋଜିତ ପ୍ରଶ୍ନୋତ୍ତର କାର୍ଯ୍ୟକ୍ରମରେ ସାମ୍ବାଦିକ ମାନେ ଅଧିକାରୀ ମାନଙ୍କ ସହିତ ମତ ବିନିମୟ କରିଥିଲେ । ଏହି ବର୍ତ୍ତାଳାପ କାର୍ଯ୍ୟକ୍ରମରେ ପାରାଦୀପର ଅଶୀରୁ ଊର୍ଦ୍ଧ୍ବ ଗଣମାଧ୍ୟମ ପ୍ରତିନିଧି ଯୋଗ ଦେଇଥିଲେ ।