ଭୁବନେଶ୍ୱର : ଶିଶୁ ଯୌନ ର୍ନିଯାତନା ତଥା ଶୋଷଣର ମୁକାବିଲା ପାଇଁ ରାଜ୍ୟ ସ୍ତରୀୟ ପରାମର୍ଶ କର୍ମଶାଳା ପିପୁଲ୍ସ କଲଚରାଲ ସେଣ୍ଟର (ପିକକ) ଏବଂ ଶିଶୁଙ୍କ ବିରୋଧରେ ହିଂସା ଦୂର କରିବା ପାଇଁ ଜାତୀୟ କାର୍ଯ୍ୟ ସମନ୍ୱୟ ଗୋଷ୍ଠୀ (ଏନ୍ଏସିଜି ଇଭିଏସି) ଙ୍କ ସହଯୋଗରେ ଆୟୋଜିତ ହୋଇଥିଲା ।
ଏହି କର୍ମଶାଳାରେ ୱାର୍ଲ୍ଡ ଭିଜନ ଇଣ୍ଡିଆ, ୱାର୍ଲ୍ଡ ଭିଜନ ଜର୍ମାନୀ ଏବଂ ବିଏମଜେ ଜର୍ମାନୀ ଏବଂ ଆଦର୍ଶ, ସମ୍ବଲପୁର, ଏକତା, କୋରାପୁଟ, ହେଲପ, କୋରାପୁଟ, ଏମ୍ଆଇଏଚୱାଇ, ବାଲେଶ୍ୱର, ଓଏଲଏସ୍, ଭୁବନେଶ୍ୱର, ରେଆର, କନ୍ଧମାଳ, ସାହାରା, କନ୍ଧମାଳ, ସେଲଟର, ଗଞ୍ଜାମ ଏବଂ ଭାଇ, ଗଞ୍ଜାମ ଅନୁଷ୍ଠାନର ପ୍ରତିନିଧିମାନେ ଅଂଶଗହଣ କରିଥିଲେ । ଓଡିଶାର ୬ ଟି ଜିଲ୍ଲାର ୯୦ ରୁ ଅଧିକ ପିଲା ଏହି ପରାମର୍ଶ କର୍ମଶାଳାରେ ଭାଗ ନେଇଥିଲେ ।
ଓଏସସିପିସିଆର ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ଏହି କର୍ମଶାଳାକୁ ଉଦଘାଟନ କରି କହିଛନ୍ତି ଯେ ଶିଶୁ ଅନୁକୂଳ ପରିବେଶ ସୃଷ୍ଟି କରିବା ପାଇଁ ପିଲାମାନଙ୍କର ଅଂଶଗ୍ରହଣ ଜରୁରୀ ଅଟେ । ସେମାନଙ୍କ ପାଇଁ ପ୍ରଭାବଶାଳୀ ସୁରକ୍ଷା କୌଶଳ ପ୍ରୟୋଗ କରିବା ପାଇଁ ପିଲାମାନଙ୍କର ପରାମର୍ଶ ଏବଂ ସୁପାରିଶ ଜରୁରୀ । ଏନଏସିଜି ଇଭାକ ଇଣ୍ଡିଆର ଅଧ୍ୟକ୍ଷ ଶ୍ରୀ ରଞ୍ଜନ କୁମାର ମହାନ୍ତି ଅତିଥିମାନଙ୍କୁ ସ୍ୱାଗତ କରିବା ସହ ଏହି ପରାମର୍ଶ କର୍ମଶାଳାର ଉଦ୍ଦେଶ୍ୟ ସଂକ୍ରାନ୍ତରେ କହିଥିଲେ ଯେ ପିଲାମାନେ ଯଦି କୌଣସି ଖରାପ ବ୍ୟବହାର କିମ୍ବା ଖରାପ ଆଚରଣର ସମ୍ମୁଖୀନ ହେଉଛନ୍ତି ତେବେ ନିରବ ନରହି ମୁହଁଖୋଲି କହିବା ଉଚିତ୍ ।
ପିକକର କାର୍ଯ୍ୟର୍ନିବାହୀ ନିର୍ଦ୍ଦେଶିକା ଅନୁରାଧା ମହାନ୍ତି ଭଲ ଏବଂ ଖରାପ ଆଚରଣ ବିଷୟରେ ଆଲୋଚନା କରିଥିଲେ ଏବଂ ପିଲାମାନଙ୍କୁ ସେମାନେ ଅଧିକ ବିଶ୍ୱାସ କରୁଥିବା ବ୍ୟକ୍ତିଙ୍କ ସହ ଏହି ସମସ୍ୟା ସେୟାର କରିବାକୁ ପରାମର୍ଶ ଦେଇଥିଲେ । ଓଏସ୍ସିପିସିଆରର ପୂର୍ବତନ ସଦସ୍ୟ ଶ୍ରୀ ହରିହର ନାୟକ ପୋକସୋ ଆଇନ ଏବଂ ଶିଶୁ ସୁରକ୍ଷା ରିପୋର୍ଟିଂ ବ୍ୟବସ୍ଥା ବିଷୟରେ ଆଲୋଚନା କରିଥିଲେ । ସେ ଏହା ମଧ୍ୟ କହିଛନ୍ତି ଯେ ଏହି ଆଇନ୍ ପ୍ରଭାବଶାଳୀ ଏବଂ ଏହା ଅତ୍ୟନ୍ତ ବ୍ୟାପକ ଅଟେ ଏବଂ ଶିଶୁମାନଙ୍କ ସହିତ ଏହାକୁ ବନ୍ଧୁତ୍ୱପୂର୍ଣ୍ଣ ଢଙ୍ଗରେ ବ୍ୟବହାର କରାଯିବା ଆବଶ୍ୟକ ।
ପିଲାମାନେ ସୁପାରିଶର ଏକ ତାଲିକା ପ୍ରସ୍ତୁତ କରି ଅତିଥିମାନଙ୍କ ନିକଟରେ ଉପସ୍ଥାପନ କରିଥିଲେ । ଏହି ସୁପାରିଶଗୁଡିକ ମଧ୍ୟରେ, ପୋକସୋ ଅଧିନିୟମକୁ ପାଠ୍ୟ ପୁସ୍ତକରେ ଅନ୍ତର୍ଭୁକ୍ତ, ପୋକସୋ ଉପରେ ଶିକ୍ଷକ ତାଲିମ, ଛାତ୍ରମାନଙ୍କୁ ଆତ୍ମରକ୍ଷା ତାଲିମ, ଗ୍ରାମଗୁଡିକରେ ଶିଶୁ ସୁରକ୍ଷା କମିଟିକୁ ସମ୍ପୁର୍ଣ୍ଣ କାର୍ଯ୍ୟକ୍ଷମ କରିବା, ଶିଶୁ ଅନୁକୂଳ ପୋଲିସ୍ ଷ୍ଟେସନ୍ ଇତ୍ୟାଦି ଅନ୍ତର୍ଭୁକ୍ତ । ଦ୍ୱୈତନଗରୀ ପୁଲିସ୍ କମିଶନର ଶ୍ରୀ ସୌମେନ୍ଦ୍ର କୁମାର ପ୍ରିୟଦର୍ଶୀ ସୁପାରିଶ ପ୍ରସ୍ତୁତ କରିବାରେ ପିଲାଙ୍କ ଉଦ୍ୟମକୁ ପ୍ରଶଂସା କରି କହିଛନ୍ତି ଯେ ଆଇନ ବ୍ୟାପକ ଅଟେ ଏବଂ ଶିଶୁର ବୃହତ୍ତର ସ୍ୱାର୍ଥ ରକ୍ଷା ପାଇଁ ପୋଲିସ ସେଠାରେ ଅଛି, ତେଣୁ କେହି ଭୟଭୀତ ନହୋଇ ବ୍ୟବସ୍ଥାକୁ ଆପଣାନ୍ତୁ ।
ଅନ୍ୟ ମାନ୍ୟଗଣ୍ୟ ବ୍ୟକ୍ତିଙ୍କ ମଧ୍ୟରେ ସ୍ୱାସ୍ଥ୍ୟସେବା ନିର୍ଦ୍ଦେଶାଳୟର ଶିଶୁ ସ୍ୱାସ୍ଥ୍ୟ ଦାୟିତ୍ୱରେ ଥିବା ଅତିରିକ୍ତ ନିର୍ଦ୍ଦେଶକ ଡକ୍ତର ରଶ୍ମୀ ରଞ୍ଜନ ଶତପଥୀ, ଓସେପାର ବାଳିକା ଶିକ୍ଷା ଦାୟିତ୍ୱରେ ଥିବା ଯୁଗ୍ମ ନିର୍ଦ୍ଦେଶକ ସୁଶ୍ରୀ ରାଜଶ୍ରୀ ପଟ୍ଟନାୟକ, ଓସେପାର ରାଜ୍ୟ ଲିଙ୍ଗଗତ ସଂଯୋଜକ ସୁଶ୍ରୀ ଲହରୀ ମହାନ୍ତି ପ୍ରମୁଖ ଯୋଗ ଦେଇଥିଲେ । ପିକକର ଚନ୍ଦନ କୁମାର ନାୟକ ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମ ପରେ କ୍ୟାପିଟାଲ ପୋଲିସ ଷ୍ଟେସନକୁ ଏକ ପରିଦର୍ଶନ କରାଯାଇଥିଲା, ଯେଉଁଠାରେ ପିଲାମାନେ ବରିଷ୍ଠ ପୋଲିସ ଅଧିକାରୀଙ୍କ ସହ କଥାବାର୍ତ୍ତା କରିଥିଲେ ଏବଂ ପୋଲିସର କାର୍ଯ୍ୟକଳାପ, ଥାନାର ବିଭିନ୍ନ ବ୍ୟବସ୍ଥା ଏବଂ ଏକ ଆଦର୍ଶ ପୋଲିସ ଷ୍ଟେସନ କିପରି କାର୍ଯ୍ୟ କରେ ସେ ବିଷୟରେ ଜାଣିବାକୁ ପାଇଥିଲେ ।