ଭୁବନେଶ୍ୱର : କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ମୋ ବସ୍ କାର୍ଡ ପାଇଁ ନୂତନ ମୋ ବସ୍ ମୋବାଇଲ୍ ଆପ୍ଲିକେସନ୍ ଏବଂ ଯୋଜନାର ଶୁଭାରମ୍ଭ କରିଛି। ମୋ ବସ୍ ସେବାକୁ ଅଧିକ ଜ୍ଞାନକୌଶଳ ଭିତ୍ତିକ ଏବଂ ନାଗରିକ ଅନୁକୂଳ କରିବା ଦିଗରେ ଏହା ଏକ ପଦକ୍ଷେପ।
ନୂଆ ଆପ୍ ରେ ଲାଇଭ୍ ବସ୍ ଟ୍ରାକିଂ, ଆଗମନର ଆନୁମାନିକ ସମୟ, ରିୟଲ ଟାଇମ୍ ବସ୍ ଯାତ୍ରୀ, ଅନଲାଇନ୍ ଟିକେଟ ଏବଂ ପାସ୍ କ୍ରୟ ଯାତ୍ରୀ ଅନୁକୂଳ ସୁବିଧା ରହିବ।
ଏହି ଆପକୁ ଉଦ୍ ଘାଟନ କରି ଉନ୍ନୟନ କମିସନର–କମ–ଏସିଏସ୍ ତଥା ସିଆରୟୁଟିଅଧ୍ୟକ୍ଷ ଶ୍ରୀମତୀ ଅନୁ ଗର୍ଗ କହିଛନ୍ତି ଯେ, ନୂତନ ଉନ୍ନତ ଆପ୍ ଯାତ୍ରାକୁ ସହଜ କରିବ ଏବଂ ଯାତ୍ରୀମାନଙ୍କୁ ସେମାନଙ୍କ ବସ୍ର ଲାଇଭ୍ ଆଗମନ ସମୟ ଜାଣିବା ଏବଂ ରିୟଲ ଟାଇମ୍ ବସ୍ ଅକ୍ୟୁପେନ୍ସି ଦେଖିବାକୁ ସଶକ୍ତ କରିବ। ଏହା ଦ୍ୱାରା ନାଗରିକମାନେ ସେହି ଅନୁଯାୟୀ ସେମାନଙ୍କ ଯାତ୍ରା ଯୋଜନା କରିବାରେ ସହାୟକ ହେବେ।
ନୂଆ ‘କ୍ରୁଟ୍ ମୋ ବସ୍‘ ଆପ୍ ଆଣ୍ଡ୍ରଏଡ୍ ଏବଂ ଆଇଓଏସ୍ ରେ ଉପଲବ୍ଧ। ଯାତ୍ରୀମାନେ ସବୁଠାରୁ ଶସ୍ତା ଏବଂ ଦ୍ରୁତତମ ଯାତ୍ରା ବିକଳ୍ପ ପାଇପାରିବେ, ଯେଉଁଥିରେ ସେମାନଙ୍କ ଗନ୍ତବ୍ୟସ୍ଥଳକୁ ସମସ୍ତ ବସ୍ ରୁଟ୍ ବିକଳ୍ପ ମଧ୍ୟ ରହିଛି, ଜଣେ ସିଧାସଳଖ ଆପ୍ ମାଧ୍ୟମରେ ଏକ ମୋବାଇଲ୍ ବସ୍ ପାସ୍ ମଧ୍ୟ କିଣିପାରିବେ ।
କ୍ୟାସଲେସ୍ କାରବାରକୁ ଆହୁରି ସୁଗମ କରିବା ପାଇଁ ଶ୍ରୀମତୀ ଗର୍ଗ ଟ୍ୟାପ୍ ଆଣ୍ଡ ପେ ମୋ ବସ୍ କାର୍ଡ ପାଇଁ ସ୍ୱତନ୍ତ୍ର ଅଫର ଘୋଷଣା କରିଛନ୍ତି। ଜଣେ ଯାତ୍ରୀଙ୍କୁ ୫୦୦ ଟଙ୍କା ଟପ୍ ଅପ୍ ଉପରେ ୪୦% ଏବଂ କାର୍ଡର ମୂଲ୍ୟ ଅର୍ଥାତ୍ ୫୦ ଟଙ୍କାକୁ ବାଦ୍ ଦେଲେ ୧୦୦୦ ଟଙ୍କାର ଟପ୍ ଅପ୍ ଉପରେ ୫୦% ଅତିରିକ୍ତ ମିଳିବ।
ଏହା ଏକ ସୀମିତ ଅଫର, ଯାହା ଆରମ୍ଭ କରିବା ପାଇଁ ମାର୍ଚ୍ଚ ୧ ତାରିଖରୁ ଏକ ମାସ ପର୍ଯ୍ୟନ୍ତ ବୈଧ ହେବ । ଏହି ଅଫର ରାଜଧାନୀ ଅଞ୍ଚଳ ତଥା ରାଉରକେଲାରେ ବୈଧ ହେବ।
ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ଶ୍ରୀ ଜି.ମାଥି ଭାଥାନନ କହିଛନ୍ତି ଯେ, ନୂତନ ମୋବାଇଲ ଆପ୍ ଏବଂ ମୋ ବସ୍ କାର୍ଡ ପ୍ରମୋସନାଲ ଅଫର ଡିଜିଟାଲ୍ ପେମେଣ୍ଟକୁ ଆହୁରି ସହଜ କରିବ ଏବଂ ଯାତ୍ରୀମାନଙ୍କ ପାଇଁ ନିରବଚ୍ଛିନ୍ନ ଯାତ୍ରା ସୁନିଶ୍ଚିତ କରିବ।
ଯାତ୍ରୀମାନେ ଗାଇଡ (କଣ୍ଡକ୍ଟର)ଙ୍କ ଟିକେଟିଂ ମେସିନରେ ମୋ ବସ୍ କାର୍ଡ ଟ୍ୟାପ୍ କରିପାରିବେ ଏବଂ ଟିକେଟ୍ ପ୍ରଦାନ କରାଯିବ।
ଏହି କାର୍ଡ ର ବ୍ୟବହାର ଯୋଗୁଁ ଲୋକମାନେ ପରିବର୍ତ୍ତନ ଓ ବକେୟା ସମସ୍ୟାର ସମ୍ମୁଖୀନ ହେବେ ନାହିଁ । ଯାତ୍ରୀମାନେ ବସ୍ ରେ ଥିବା ଗାଇଡ୍ ରୁ ଏହି କାର୍ଡ କିଣିପାରିବେ। ଭୁବନେଶ୍ୱର ପଟିଆସ୍ଥିତ ମାଷ୍ଟରକ୍ୟାଣ୍ଟିନ୍ ବସ୍ ଟର୍ମିନାଲ ଓ କ୍ରୁଟ୍ କାର୍ଯ୍ୟାଳୟରେ ମଧ୍ୟ ଏହି କାର୍ଡ ଉପଲବ୍ଧ ରହିଛି। ରାଉରକେଲା ବସ୍ ଷ୍ଟାଣ୍ଡର ମୋ ବସ୍ କାଉଣ୍ଟରରୁ ଯାତ୍ରୀମାନେ ଏହି କାର୍ଡ କିଣିପାରିବେ। କଟକରେ ସିଏନବିଟିରେ ପାସ୍ ଉପଲବ୍ଧ ହେବ। ଏହି କାର୍ଡ ଗୁଡ଼ିକୁ ବିକ୍ରି କରିବା ପାଇଁ ସିଆରୟୁଟି ରାଜଧାନୀ ଓ ରାଉରକେଲାରେ କିଓସ୍କ ଲଗାଇବ।
ମୋ ବସ୍ ସେବା ଉପରେ ଯାତ୍ରୀମାନଙ୍କର ନିରନ୍ତର ବିଶ୍ୱାସ ପାଇଁ ଧନ୍ୟବାଦ ଜଣାଇ କ୍ରୁଟ୍ର ପରିଚାଳନା ନିର୍ଦ୍ଦେଶକ ଶ୍ରୀ ଅରୁଣ ବୋଥ୍ରା କହିଛନ୍ତି ଯେ ଯୋଗାଯୋଗ ବିହୀନ ଦେୟରେ ଉନ୍ନତି ଆଣିବା ଏବଂ ମୋ ବସ୍ ଯାତ୍ରାକୁ ଅଧିକ ଆନନ୍ଦଦାୟକ, ଅସୁବିଧାମୁକ୍ତ ଏବଂ ବିଶ୍ୱର ଶ୍ରେଷ୍ଠ ବସ୍ ସେବା ସହିତ ସମକକ୍ଷ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି।