ଭୁବନେଶ୍ୱର : ପ୍ରଧାନ ମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା (ପିଏମଜିକେଏୱାଇ)ରେ ପ୍ରତ୍ୟେକ ବ୍ୟକ୍ତିଙ୍କ ପାଇଁ ୫ କିଲୋଗ୍ରାମ ଚାଉଳ ବ୍ୟତୀତ ଅତିରିକ୍ତ ଭାବେ ଆଉ ୫ କିଲୋଗ୍ରାମ ମାଗଣା ଚାଉଳ ଯୋଗାଇ ଦିଆଯାଉଥିଲା । ତେବେ ଏହାକୁ କେନ୍ଦ୍ର ବନ୍ଦ କରିବା ଦ୍ୱାରା ଗରିବ ଏବଂ କୃଷକ ପରିବାରଙ୍କ ଖାଦ୍ୟ ସୁରକ୍ଷା ପ୍ରଭାବିତ ହେବ । ତେଣୁ କେନ୍ଦ୍ର ସରକାର ତୁରନ୍ତ ପିଏମଜିକେଏୱାଇ ଯୋଜନାରେ ଗରିବ ଲୋକଙ୍କୁ ଚାଉଳ ଯୋଗାଣ ପାଇଁ ବିଜେଡି ପକ୍ଷରୁ ଦାବି କରାଯାଇଛି ।
ଆଜି ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେଡିର ବରିଷ୍ଠ ଉପାଧ୍ୟକ୍ଷ ଶ୍ରୀ ଦେବୀ ପ୍ରସାଦ ମିଶ୍ର କହିଛନ୍ତି ଯେ ନିକଟରେ ଆଗତ କେନ୍ଦ୍ର ବଜେଟରେ ୨୦୨୧-୨୨ ରେ କେନ୍ଦ୍ର ଖର୍ଚ୍ଚ କରିଥିବା ପରିମାଣ ତୁଳନାରେ ଖାଦ୍ୟ ସବସିଡିରେ ପ୍ରାୟ ୭୧,୦୦୦ କୋଟି ଟଙ୍କା ହ୍ରାସ ପାଇଛି । ଏହା ଗରିବ ଲୋକଙ୍କ ଖାଦ୍ୟ ସୁରକ୍ଷା ଉପରେ ପ୍ରଭାବ ପକାଇବ । ଏହି ହ୍ରାସ ମୁଖ୍ୟତଃ ପିଏମଜିକେଏୱାଇ ବନ୍ଦ ଯୋଗୁଁ ହୋଇଛି ।
କୋଭିଡ ମହାମାରୀ ପରେ ଶିଳ୍ପ ଏବଂ ଜୀବିକା ସ୍ୱାଭାବିକ ଅବସ୍ଥାକୁ ଆସିବାର ଅଛି । ଗରିବ ଲୋକ ଯାହା କିଛି ସଞ୍ଚୟ କରିଥିଲେ ମହାମାରୀରେ ତାହା ହରାଇଥିଲେ । ଆର୍ଥିକ ସ୍ଥିତି ସ୍ୱାଭାବିକ ଅବସ୍ଥାକୁ ଫେରିନାହିଁ । ପିଏମଜିକେଏୱାଇ ବନ୍ଦ କରିବା ଦ୍ୱାରା ଗରିବ ଲୋକ ପ୍ରଭାବିତ ହେବେ ଏବଂ ମହାମାରୀ ପରେ ସେମାନଙ୍କର ଜୀବନ ସ୍ୱାଭାବିକ ଅବସ୍ଥାକୁ ଫେରିବା ମଧ୍ୟ ପ୍ରଭାବିତ ହେବ ।
ପିଏମଜିକେଏୱାଇ ବନ୍ଦ ହେବା ଦ୍ୱାରା କୃଷକମାନେ ମଧ୍ୟ ପ୍ରଭାବିତ ହେବେ । ୨୦୨୧-୨୨ ତୁଳନାରେ ଖାଦ୍ୟ ସାମଗ୍ରୀ କିଣିବାରେ କେନ୍ଦ୍ର ଚଳିତ ବଜେଟରେ ପ୍ରାୟ ୨୦,୦୦୦ କୋଟି ଟଙ୍କା ହ୍ରାସ କରିଛି । ଏହା ପୁଣି ପିଏମଜିକେଏୱାଇ ବନ୍ଦ ହେବା ଏବଂ କୃଷକମାନଙ୍କଠାରୁ କ୍ରୟ ହ୍ରାସ ଯୋଗୁଁ ହୋଇଛି । ଏହି ହ୍ରାସ କୃଷକମାନଙ୍କୁ ପ୍ରଭାବିତ କରିବ । କ୍ରୟ ହ୍ରାସ ହେତୁ କୃଷକମାନେ ଖାଦ୍ୟଶସ୍ୟ ବିକ୍ରି ପାଇଁ ସର୍ବନିମ୍ନ ସହାୟତା ମୂଲ୍ୟ (ଏମଏସପି) ପାଇବାକୁ ମଧ୍ୟ ବଞ୍ଚିତ ହେବେ ।
ଗରିବ ଏବଂ କୃଷକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଆମେ ପିଏମଜିକେଏୱାଇ କାର୍ଯ୍ୟକ୍ରମକୁ ପୁନଃ ଆରମ୍ଭ କରିବାକୁ କେନ୍ଦ୍ରକୁ ନିବେଦନ କରୁଛୁ ବୋଲି ଶ୍ରୀ ମିଶ୍ର କହିଛନ୍ତି । ସେ ଆହୁରି ମଧ୍ୟ ଆଶା କରିଛନ୍ତି ଯେ ବିଜେପି ସାଂସଦମାନେ କେନ୍ଦ୍ରରେ ସେମାନଙ୍କ ଦଳ ନେତୃତ୍ୱରେ ଥିବା ସରକାରଙ୍କ ସମ୍ମୁଖରେ ଏହି ପ୍ରସଙ୍ଗ ଉଠାଇବେ ଏବଂ ଗରିବ ପରିବାରର ଖାଦ୍ୟ ନିରାପତ୍ତା ଏବଂ କୃଷକମାନଙ୍କ ଦ୍ୱାରା ଖାଦ୍ୟଶସ୍ୟ ବିକ୍ରି ହିତକୁ ଦୃଷ୍ଟିରେ ରଖି ପିଏମଜିକେଏୱାଇ କୁ ପୁନଃ ଆରମ୍ଭ ଉପରେ ଗୁରୁତ୍ୱାରୋପ କରିବେ । ଦୁଇ ବର୍ଷ ପାଇଁ ପିଏମଜିକେଏୱାଇ ଯୋଜନାରେ ଚାଉଳ ଯୋଗାଇବା ପରେ ହଠାତ ଏହାକୁ ପ୍ରତ୍ୟାହାର କରିନେବା ଗରିବ ଲୋକଙ୍କୁ ଗୁରୁତର ଭାବରେ ପ୍ରଭାବିତ କରିବ । ଏତେ ବଡ କାର୍ଯ୍ୟକ୍ରମ ବନ୍ଦ କରିବା ପୂର୍ବରୁ, କେନ୍ଦ୍ର ଏକ ବିକଳ୍ପ କାର୍ଯ୍ୟକ୍ରମ ପ୍ରଦାନ କରିବା ଉଚିତ ଥିଲା କିମ୍ବା ଏହା ଗରିବଙ୍କ ଉପରେ ଯେଉଁ ଆର୍ଥିକ ପ୍ରତିକୂଳ ପ୍ରଭାବ ପଡିବ ସେ ଦିଗରେ ପଦକ୍ଷେପ ନେବା ଉଚିତ୍ ଥିଲା ।
ଏହି ମାମଲାରେ ସେଭଳି କିଛି କରାଯାଇ ନାହିଁ । ଏହା ଉପରେ ପୁନର୍ବିଚାର କରିବାକୁ ଏବଂ ଗରିବ ଏବଂ କୃଷକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ପିଏମଜିକେଏୱାଇ କାର୍ଯ୍ୟକ୍ରମକୁ ପୁନଃ ଆରମ୍ଭ କରିବାକୁ ଆମେ କେନ୍ଦ୍ରକୁ ନିବେଦନ କରୁଛୁ ବୋଲି ଶ୍ରୀ ମିଶ୍ର କହିଛନ୍ତି । ବିଜେଡି ମୁଖପାତ୍ର ଶ୍ରୀ ଲେନିନ୍ ମହାନ୍ତି ଏବଂ ଶ୍ରୀ ହରିଶ ଚୌଧୁରୀ ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିଲେ ।