ଭୁବନେଶ୍ୱର : ତାଳଚେର ସାର କାରଖାନା ପୁନଃରୁଦ୍ଧାର କାର୍ଯ୍ୟ କୋଭିଡ ମହାମାରୀ ଦ୍ୱାରା ପ୍ରଭାବିତ ହୋଇଥିବାବେଳେ ଏବେ ବିଶେଷଜ୍ଞମାନେ ଚତୁର୍ଥ ଲହର ନେଇ ଆଲୋଚନା କରିବାପରେ କାର୍ଯ୍ୟ ସମାପ୍ତି ନେଇ ବରିଷ୍ଠ ଅଧିକାରୀମାନେ ଚିନ୍ତାରେ ପଡିଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୧୮ ସେପ୍ଟେମ୍ବର ୨୨ ତାରିଖରେ ଏହି ପ୍ରକଳ୍ପ ପାଇଁ ଶୁଭ ଦେଇଥିବାବେଳେ ୩ବର୍ଷ ମଧ୍ୟରେ କାର୍ଯ୍ୟ ସରିବାର ଲକ୍ଷ୍ୟ ଥିଲା । ତେବେ କେବଳ ପ୍ରକଳ୍ପ କାର୍ଯ୍ୟରେ ବିଳମ୍ବ ହେଉନାହିଁ, ପ୍ରକଳ୍ପର ବ୍ୟୟଭାର ମଧ୍ୟ ବଢିବାରେ ଲାଗିଛି । ଏହି ପ୍ରକଳ୍ପ କାର୍ଯ୍ୟକୁ ୨୦୧୯ରେ ଚୀନ୍ର ହୁଆନ ଇଞ୍ଜିନିୟରିଂକୁ ପ୍ରଦାନ କରାଯାଇଥିଲା । କୋଭିଡର ଉତ୍ପତିସ୍ଥଳ ଚୀନ୍ର ହୁଆନ ସହରରେ ଡିସେମ୍ବର ୨୦୧୯ରୁ ଫେବୃୟାରୀ ୨୦୨୨ ପର୍ଯ୍ୟନ୍ତ କୋଭିଡ ସଂକ୍ରମଣ ଜନିତ ଲକଡାଉନ୍ କଡାକଡି ଭାବେ ଲାଗୁ ହୋଇଥିଲା । ତେଣୁ ମହାମାରୀ ଯୋଗୁଁ ଏହି ପ୍ରକଳ୍ପ ଗୁରୁତର ଭାବେ ପ୍ରଭାବିତ ହୋଇଥିଲା ।
ସେହି ସମୟରେ ପ୍ରାୟତଃ ସମସ୍ତ କାର୍ଯ୍ୟ ଭର୍ଚୁଆଲରେ ହେଉଥିବା ଯୋଗୁଁ କାର୍ଯ୍ୟ ବିଳମ୍ବକୁ ଦେଖି ଏହା ୨୦୨୩ ସେପ୍ଟେମ୍ବରରେ ପ୍ରକଳ୍ପ ସରିବାର ଲକ୍ଷ୍ୟ ରଖାଯାଇଥିଲା । ହେଲେ କର୍ତ୍ତୃପକ୍ଷ ଏବେ ଏହି ସମୟସୀମାକୁ ଆଉ ବର୍ଷେ ଅର୍ଥାତ୍ ୨୦୨୪ ସେପ୍ଟେମ୍ବର ପର୍ଯ୍ୟନ୍ତ ବଢାଇବାର ସମ୍ଭାବନା ରହିଛି । ତେବେ ଚତୁର୍ଥ ଲହର ନେଇ ବିଶେଷଜ୍ଞମାନେ ଆଶଙ୍କାବ୍ୟକ୍ତ କରିବା ପରେ ବରିଷ୍ଠ ଅଧିକାରୀମାନେ ପ୍ରକଳ୍ପକାର୍ଯ୍ୟକୁ ନେଇ ଚିନ୍ତାବ୍ୟକ୍ତ କରିଛନ୍ତି ।
କେନ୍ଦ୍ର ସରକାର ତାଳଚେର ସାର କାରଖାନାର ପୁନରୁଦ୍ଧାର ପାଇଁ ତାଳଚେର ଫର୍ଟିଲାଇଜର ଲିମିଟେଡ ନାମରେ ଯୌଥ ଉଦ୍ୟୋଗ ପ୍ରତିଷ୍ଠା କରିଥିବାବେଳେ ଏଥିରେ ଗେଲ୍, ଆରସିଏଫ୍ ଏବଂ ସିଆଇଏଲ୍ର ଅଂଶଧନ ରହିଛି । ପ୍ରକଳ୍ପର ମୂଳ ବ୍ୟୟଭାର ୧୧,୬୧୧ କୋଟି ଟଙ୍କା ଥିବାବେଳେ ଏହା ଏବେ ୧୩,୨୭୭ କୋଟି ଟଙ୍କାକୁ ବୃଦ୍ଧି ପାଇଛି । ଏହି ପ୍ରକଳ୍ପଟି କୋଇଲା ଗ୍ୟାସିଫିକେସନ ଜ୍ଞାନକୌଶଳ ଉପରେ ଆଧାରିତ । ଏହି କାରଖାନାରୁ ଦୈନିକ ୨୨୦୦ ମେଟ୍ରିକ ଟନ୍ ଆମୋନିଆ ଏବଂ ୩୮୫୦ ମେଟ୍ରିକ ଟନ୍ ୟୁରିଆ ଉତ୍ପାଦନ କ୍ଷମତା ରହିଛି । ଏହି ବୃହତ୍ ପ୍ରକଳ୍ପରୁ ବାର୍ଷିକ ୧୨.୭ଲକ୍ଷ ମେଟ୍ରିକ ଟନ୍ ନିମ ଯୁକ୍ତ ୟୁରିଆ ଉତ୍ପାଦନ ହୋଇପାରିବ ।
ଏହି କାରଖାନା କାର୍ଯ୍ୟକାରୀ ହେଲେ ପ୍ରତ୍ୟକ୍ଷ ଓ ପରୋକ୍ଷ ଭାବେ ୨୦୦୦ ଲୋକଙ୍କୁ କର୍ମସଂସ୍ଥାନ ଯୋଗାଇବ । ଓଡିଶା ସମେତ ପୂର୍ବତ୍ତୋର ରାଜ୍ୟର ୟୁରିଆ ଆବଶ୍ୟକତା ମଧ୍ୟ ପୂରଣ କରିବ । ଏଥି ସହିତ ଏହି ସାର କାରଖାନା କ୍ଷୁଦ୍ର ଓ ମଧ୍ୟମ ଶିଳ୍ପ ସହିତ ଉତ୍ପାଦନ ଭିତ୍ତିକ ଶିଳ୍ପକୁ ସହାୟତା କରିବ । କାରଖାନା ଆଖପାଖରେ ଏମଏସ୍ଏମ୍ଇ ଉଦ୍ୟୋଗ ବଢିବା ସହିତ ଏହା ଅଧିକରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବ ।
କାରଖାନା ଯୋଗୁଁ ଏହି ଅଞ୍ଚଳରେ ସେବା, ପରିବହନ, ସ୍ୱାସ୍ଥ୍ୟ, ବୀମା ଓ ଆର୍ଥିକ ବଜାର କ୍ଷେତ୍ର ବୃଦ୍ଧି ଯୋଗୁଁ ରାଜ୍ୟ ରାଜକୋଷକୁ ସିଧାସଳଖ ଭାବେ ଅଧିକ ଟିକସ ଆସିବ । କାରଖାନା ମାଧ୍ୟମରେ ୟୁରିଆ କ୍ଷେତ୍ରରେ ଭାରତ ଆତ୍ମନିର୍ଭରଶୀଳ ହେବା ସହିତ ବୈଦେଶିକ ମୁଦ୍ରା ସଞ୍ଚୟ କରିପାରିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲକ୍ଷ୍ୟ ରଖିଛନ୍ତି । (ତଥ୍ୟ)