ଭୁବନେଶ୍ୱର : ଆନ୍ତଃବିଷୟ ଗବେଷଣା ବର୍ତମାନ ସବୁଠାରୁ ଅଧିକ ଆବଶ୍ୟକ ହୋଇଥିବା ବେଳେ ଶିକ୍ଷା ଏବଂ ଅଭିନବ ଗବେଷଣା ଉପରେ ଅଧିକ ଗୁରୁତ୍ୱାରୋପ କରୁଥିବା ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟ ଏଥିରେ ଅଧିକ ମନୋନିବେଶ କରୁଛି ବୋଲି ସୋମବାର ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ କହିଛନ୍ତି ।
୨୬ଟି ବିଭିନ୍ନ ବିଷୟକୁ ମନୋନୀତ କରି ବିଶ୍ୱବିଦ୍ୟାଳୟରେ ଗବେଷଣା ହେଉଥିବା ବେଳେ ଏହାର ଫ୍ୟାକଲ୍ଟି ଏବଂ ଗବେଷକମାନେ ଏହି କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବାର ଆବଶ୍ୟକତା ରହିଛି ବୋଲି ପ୍ରଫେସର ନନ୍ଦ କହିଛନ୍ତି । ସୋଆ ନ୍ୟାସ୍ନାଲ୍ ଇନ୍ଷ୍ଟିଚ୍ୟୁଟ୍ ଅପ୍ ଲ ପକ୍ଷରୁ “ରିସର୍ଚ୍ଚ ମେଥଡୋଲୋଜି ଆଣ୍ଡ ପେଡାଗୋଜିସ୍ ଇନ୍ ଲିଗାଲ ଏଜୁକେସନ୍” ଶୀର୍ଷକ ଏକ ସପ୍ତାହ ବ୍ୟାପି ହୋବାକୁ ଥିବା ଫ୍ୟାକଲ୍ଟି ଡେଭଲପ୍ମେଂଟ ପ୍ରୋଗ୍ରାମ୍ (ଏଫ୍ଡିପି)ର ଉଦ୍ଘାଟନୀ କାର୍ଯ୍ୟକ୍ରମରେ ବକ୍ତବ୍ୟ ରଖି ଏହା କହିଛନ୍ତି ପ୍ରଫେସର ନନ୍ଦ ।
ଗବେଷଣା କାର୍ଯ୍ୟକୁ ବିସ୍ତୃତ କରିବା ପରିପ୍ରେକ୍ଷୀରେ ବିଶ୍ୱବିଦ୍ୟାଳୟ ପକ୍ଷରୁ ନିକଟରେ ସେଂଟର ଫର୍ କ୍ଲାଇମେଟ ସ୍ମାର୍ଟ ଏଗ୍ରିକଲ୍ଚର ଓ ସେଂଟର ଫର ବାୟୋମେଡିକାଲ୍ ରିସର୍ଚ୍ଚ ଆରମ୍ଭ କରାଯାଇଥିବା ବେଳେ ଗତ ସପ୍ତାହରେ ପାରସ୍ପରିକ ସହଯୋଗ ଓ ଗବେଷଣା ନିମନ୍ତେ ଆଇସିଏମ୍ଆର୍- ରିଜିଓନାଲ୍ ମେଡିକାଲ୍ ରିସର୍ଚ୍ଚ ସେଂଟର (ଆଇସିଏମ୍ଆର-ଆର୍ଏମ୍ଆର୍ସି) ସହିତ ସୋଆର ଏକ ବୁଝାମଣା ସ୍ୱାକ୍ଷରିତ ହୋଇଛି ବୋଲି କୁଳପତି ନନ୍ଦ କହିଥିଲେ ।
ଜାତୀୟ ଶିକ୍ଷାନୀତି ୨୦୨୦ (ଏନ୍ଇପି -୨୦୨୦)ରେ ମଲ୍ଟି ଡିସିପ୍ଲିନାରୀ ଏଜୁକେସନ୍ ଆଣ୍ଡ ରିସର୍ଚ୍ଚ ୟୁନିଭର୍ସିଟି (ମେରୁ) କୁ ଅଧିକ ଗୁରୁତ୍ୱ ଦିଆଯାଉଥିବା ବେଳେ ଛାତ୍ରଛାତ୍ରୀମାନଙ୍କୁ ଅଧିକ ଦକ୍ଷ କରିବା ଏହାର ଉଦ୍ଦେଶ୍ୟ ବୋଲି ସେ କହିଛନ୍ତି ।
ପ୍ରଫେସର ନନ୍ଦ କହିଥିଲେ ଯେ ସ୍କୋପସ୍ ଇଣ୍ଡେକ୍ସଡ ରିସର୍ଚ୍ଚ ପେପର ପ୍ରକାଶନ କ୍ଷେତ୍ରରେ ସୋଆ ଖୁବ୍ ଉତମ ପ୍ରଦର୍ଶନ କରୁଥିବା ବେଳେ ଏହି ପ୍ରକାଶନର ସଂଖ୍ୟା ୧୦୭୦୦ରୁ ଊର୍ଦ୍ଧ୍ୱ ରହିଛି । ତେବେ ସମସ୍ତ ଫ୍ୟାକଲ୍ଟି ମେମ୍ବର୍ସ, ଗବେଷକ ଓ ସ୍କଲାରମାନେ ବିଶ୍ୱବିଦ୍ୟାଳୟର ମାନକୁ ଆହୁରି ଊର୍ଦ୍ଧ୍ୱକୁ ନେବା ପାଇଁ ଗବେଷଣା କ୍ଷେତ୍ରରେ ଅଧିକ ମନୋନିବେଶ କରିବା ଉଚିତ୍ ବୋଲି ସେ କହିଥିଲେ ।
ଉଦ୍ଘାଟନୀ କାର୍ଯ୍ୟକ୍ରମରେ ସ୍ନିଲ୍ର ଡିନ୍ ପ୍ରଫେସର ଏସ୍.ଏ.କେ ଆଜାଦ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ସିନିୟର ପ୍ରଫେସର ପ୍ରବୀର କୁମାର ପଟ୍ଟନାୟକ ଏଫ୍ଡିପିରେ ଯୋଗ ଦେଇଥିବା ପ୍ରତିନିଧିମାନଙ୍କ ଉଦ୍ଦେଶ୍ୟରେ ବକ୍ତବ୍ୟ ରଖିଥିଲେ ।
ଏହି ଏଫଡିପି ହାଇବ୍ରିଡ୍ ମୋଡରେ ହୋଇଥିବା ବେଳେ ପାପୁଆ ନ୍ୟୁ ଗିନି ୟୁନିଭର୍ସିଟି ଅଫ୍ ଟେକ୍ନୋଲୋଜିର ମେକାନିକାଲ୍ ଇଞ୍ଜିନିୟରିଂ ବିଭାଗର ଆସୋସିଏଟ୍ ପ୍ରଫେସର ଡକ୍ଟର କମଳାକାନ୍ତ ମୁଦୁଲି କାର୍ଯ୍ୟକ୍ରମରେ ଉପସ୍ଥିତ ଥିଲେ । ପରବର୍ତୀ ଦିନଗୁଡ଼ିକରେ କୋଲକାତା ସ୍ଥିତ ବଜ୍ବଜ୍ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି୍ର ଏମ୍ବିଏ ବିଭାଗର ଆସୋସିଏଟ୍ ପ୍ରଫେସର ଡକ୍ଟର ପ୍ରବାଲ ଚକ୍ରବର୍ତୀ ଏବଂ ପାପୁଆ ନ୍ୟୁ ଗିନି ୟୁନିଭର୍ସିଟି ଅଫ୍ ଟେକ୍ନୋଲୋଜିର ସର୍ଭେଇଙ୍ଗ୍ ଆଣ୍ଡ ଲ୍ୟାଣ୍ଡ ଷ୍ଟଡିଜ୍ ବିଭାଗର ଆସୋସିଏଟ୍ ପ୍ରଫେସର ଡକ୍ଟର ସୁଜୟ କୁମାର ଜାନା ପ୍ରମୁଖ ବିଶେଷଜ୍ଞ ଅନ୍ଲାଇନ୍ ଯୋଗ ଦେବାର କାର୍ଯ୍ୟକ୍ରମ ରହିଛି ।
