ଭୁବନେଶ୍ବର : କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ)କୁ ୧୬ତମ ଅର୍ବାନ ମୋବିଲିଟି ଇଣ୍ଡିଆ ଆୱାର୍ଡ ୨୦୨୩ ଉତ୍କର୍ଷ ପୁରସ୍କାରରେ ସମ୍ମାନିତ କରାଯାଇଛି। ଭାରତ ସରକାରଙ୍କ ଗୃହ ନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ (ଏମଓଏଚ୍ୟୁଏ) ଦ୍ୱାରା ଆୟୋଜିତ ଏହି ସମ୍ମାନଜନକ ପୁରସ୍କାର ସହରାଞ୍ଚଳ ପରିବହନର ଗୁଣବତ୍ତା ବୃଦ୍ଧି ଏବଂ ସ୍ଥାୟୀ ଗତିଶୀଳତାକୁ ପ୍ରୋତ୍ସାହିତ କରିବାରେ କ୍ରୁଟର ଉଲ୍ଲେଖନୀୟ ପ୍ରୟାସକୁ ଏକ ସ୍ୱୀକୃତି । ଆସନ୍ତା ୨୯ ତାରିଖରେ କେନ୍ଦ୍ର ପକ୍ଷରୁ ଏହି ପୁରସ୍କାର ପ୍ରଦାନ କରାଯିବ ।
“ରାଜ୍ୟ/କେନ୍ଦ୍ରଶାସିତ ଅଞ୍ଚଳ ପାଇଁ ରନିଂ ଟ୍ରଫି” ବର୍ଗରେ ଏହି ଉତ୍କର୍ଷ ପୁରସ୍କାର ପ୍ରଦାନ କରାଯାଇଛି। ଶ୍ରେଷ୍ଠ ସହରୀ ପରିବହନ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ କ୍ରୁଟକୁ ଏହି ପୁରସ୍କାର ମିଳିଛି I ସବସିଡି ହ୍ରାସ କରିବା ଏବଂ ଯାତ୍ରୀଙ୍କ ସଂଖ୍ୟା ବୃଦ୍ଧି ଦିଗରେ କାର୍ଯ୍ୟ କରିବା ତଥା ସହରାଞ୍ଚଳ ପରିବହନର ପରିଚାଳନା କ୍ଷେତ୍ରରେ ଅଧିକ ଦକ୍ଷ ଓ ପ୍ରଭାବଶାଳୀ ବ୍ୟବସ୍ଥା ସୃଷ୍ଟି କରିବା ଦିଗରେ କ୍ରୁଟର ରଣକୌଶଳ ପାଇଁ ଏହି ସମ୍ମାନ ମିଳିଛି। ପୁରସ୍କାର ସହିତ ମିଳିଥିବା ପ୍ରଶଂସାପତ୍ରରେ ଭାରତରେ ସହରାଞ୍ଚଳ ପରିବହନ କ୍ଷେତ୍ରରେ ପରିବର୍ତ୍ତନ ଆଣିବାରେ କ୍ରୁଟର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରାଯାଇଥିଲା।
କ୍ରୁଟ୍ ରାଜସ୍ୱ ସଂଗ୍ରହରେ ସଫଳତା ହାସଲ କରି ସରକାରୀ ସବସିଡି ଉପରେ ନିର୍ଭରଶୀଳତାକୁ ଯଥେଷ୍ଟ ହ୍ରାସ କରିପାରିଛିI ଏହା ଦ୍ୱାରା ଅଧିକ ଦକ୍ଷ ପରିଚାଳନା ସମ୍ଭବ ହେବା ସହ ୨.୫ ଲକ୍ଷରୁ ଅଧିକ ଯାତ୍ରୀଙ୍କୁ ନିରବଚ୍ଛିନ୍ନ ଦୈନିକ ପରିବହନ ସେବା ଯୋଗାଇ ଦିଆଯାଇପାରୁଛିI କ୍ରୁଟର ସୁପରିଚାଳନା ଯୋଜନା ଏବଂ ବୈଜ୍ଞାନିକ ରାଜସ୍ୱ ନିଶ୍ଚିତତା କୌଶଳ ମାଧ୍ୟମରେ ସଫଳତାର ସହ ୨୦୧୯-୨୦ ଆର୍ଥିକ ବର୍ଷରେ ଯାତ୍ରୀ ପିଛା ସବ୍ସିଡି ୧୧.୬୫ ଟଙ୍କାରୁ ୨୦୨୨-୨୩ ଆର୍ଥିକ ବର୍ଷରେ ଏହା ୫.୫୭ ଟଙ୍କାକୁ ହ୍ରାସ ପାଇଛି I
କ୍ରମାଗତ ପଞ୍ଚମ ବର୍ଷ କ୍ରୁଟ୍ କୁ ସମ୍ମାନଜନକ ଅର୍ବାନ ମୋବିଲିଟି ଇଣ୍ଡିଆ ପୁରସ୍କାର ମିଳିବା ସହରାଞ୍ଚଳ ପରିବହନ କ୍ଷେତ୍ରରେ ଆମର ଉଲ୍ଲେଖୀୟ ସଫଳତାକୁ ଦର୍ଶାଉଛି। ଚଳିତ ମାସ ଅକ୍ଟୋବର ୨୭ ରୁ ୨୯ ତାରିଖ ପର୍ଯ୍ୟନ୍ତ ଏହି କାର୍ଯ୍ୟକ୍ରମ ଦିଲ୍ଲୀର ମାନେକ୍ଶା କେନ୍ଦ୍ରରେ ଅନୁଷ୍ଠିତ ହେଉଛି ।
ଓଡ଼ିଶା ସରକାର ୫-ଟି ନୀତି ଅଧାରରେ ଟେକ୍ନୋଲୋଜି, ଟିମ୍ ୱାର୍କ, ସ୍ୱଚ୍ଛତା, ସମୟ ଓ ରୂପାନ୍ତରଣକୁ ଗୁରୁତ୍ତ୍ଵ ଦେଉଛନ୍ତି। ପରିବେଶ ଅନୁକୂଳ ସହରାଞ୍ଚଳ ପରିବହନ ବ୍ୟବସ୍ଥା ମାଧ୍ୟମରେ ଲୋକଙ୍କୁ ସୁବିଧାଜନକ ସେବା ଯୋଗାଇଦେବାକୁ ଆମେ ପ୍ରତିଶ୍ରୁତିବଦ୍ଧ।