କୋଣାର୍କ ଠାରେ ସଫଳତାର ସହ ଆୟୋଜିତ ହୋଇଥିବା ଇକୋ ରିଟ୍ରିଟ୍ ଢାଞ୍ଚାରେ ଆସନ୍ତା ଡିସେମ୍ବର ମାସରେ ରାଜ୍ୟର ୫ଟି ସ୍ଥାନରେ ଅନୁରୂପ ପର୍ଯ୍ୟଟନ ମେଳା ଆୟୋଜନ ହେବ । କୋଣାର୍କ ସହିତ ଭତରକନିକା, ଦାରିଙ୍ଗିବାଡି, ହୀରାକୁଦ ଓ ସାତକୋଶିଆରେ ଏହା ଅନୁଷ୍ଠିତ ହେବବୋଲି ସୂଚନା ମିଳିଛି ।
ରାଜ୍ୟ କ୍ରୀଡା ଓ ପର୍ଯ୍ୟଟନ ସଚିବ ବିଶାଳ ଦେବ ଇକୋ ରି ଟ୍ରିଟ ସଂକ୍ରାନ୍ତରେ ସମୀକ୍ଷା କରିଛନ୍ତି । ୨୦୧୯-୨୦ ବର୍ଷରେ କୋଣାର୍କ ବେଳାଭୂମିରେ ରାଜ୍ୟ ସରକାର ସଫଳତାର ସହ ରିଟ୍ରିଟ୍ ଆୟୋଜନ କରିଥିବାବେଳେ ଏହା ଉଭୟ ଘରୋଇ ଓ ବିଦେଶୀ ପର୍ଯ୍ୟଟକଙ୍କୁ ଆକୃଷ୍ଟ କରିଥିଲା । ଓଡିଶା ପର୍ଯ୍ୟଟନର ମୁଖ୍ୟ ଉଦ୍ଦେଶ୍ୟ ହେଉଛି ଇକୋ ରିଟ୍ରିଟ ଭଳି କାର୍ଯ୍ୟକ୍ରମମାନ ଆୟୋଜନ କରି ରାଜ୍ୟରେ ଥିବା ବିଭିନ୍ନ ପର୍ଯ୍ୟଟନସ୍ଥଳୀ ସଂକ୍ରାନ୍ତରେ ପର୍ଯ୍ୟଟକମାନଙ୍କୁ ଅବଗତ କରିବା ।
ଇକୋ ରି ଟ୍ରିିଟ୍ ସଂକ୍ରାନ୍ତରେ ପର୍ଯ୍ୟଟନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଏଭଳି କାର୍ଯ୍ୟକ୍ରମ ଆୟୋଜନ ମାଧ୍ୟମରେ ଓଡିଶା ଜାତୀୟ ସ୍ତରରେ ନିଜର ପର୍ଯ୍ୟଟନର ବିକାଶ ସହିତ ପର୍ଯ୍ୟଟକମାନଙ୍କ ମଧ୍ୟରେ ଏଠାକୁ ଆସିବାପାଇଁ ବିଶ୍ୱାସ ଜନ୍ମାଇ ପାରିବ । ଇକୋ ରିଟ୍ରିଟ ପ୍ରକଳ୍ପ ଭିଜିଏଫ୍ ମଡେଲରେ ଆୟୋଜନ ହେବାକୁ ଥିବାବେଳେ ଏଠାରେ ଘରୋଇ ସଂସ୍ଥା ଦ୍ୱାରା ସେବା ଯୋଗାଇ ଦିଆଯିବ ଯେଉଁମାନଙ୍କୁ ଟେଣ୍ଡର ମାଧ୍ୟମରେ ଚୟନ କରାଯିବ ।
ଇକୋ ରିଟ୍ରିଟର ମୁଖ୍ୟ ଭିତ୍ତିଭୂମି ରାଜ୍ୟ ସରକାର ଯୋଗାଇଦେବେ ଯାହାକି କୋଭଡି ପରିବର୍ତ୍ତୀ ସମୟରେ ପର୍ଯ୍ୟଟନର ବିକାଶ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିବ । ରାଜ୍ୟ ସରକାର ଇକୋ ରିଟ୍ରିଟ୍ ନେଇ ସକରାତ୍ମକ ପଦକ୍ଷେପ ଗ୍ରହଣ କରୁଥିବାବେଳେ ଆୟୋଜନ ହେବାକୁ ଥିବା ୫ଟି ଜିଲ୍ଲାର ଜିଲ୍ଲାପାଳମାନେ ଏହି ପର୍ଯ୍ୟଟନ ପ୍ରକଳ୍ପ କାର୍ଯ୍ୟକାରୀ କ୍ଷେତ୍ରରେ ପ୍ରମୁଖ ଭୂମିକା ନିର୍ବାହ କରିବେ । ନିକଟରେ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ଏ ସଂକ୍ରାନ୍ତରେ ସମୀକ୍ଷା କରିବାବେଳେ ସ୍ଥାନୀୟ ସଂସ୍ଥାଗୁଡିକର ସହଯୋଗରେ ଏହି ପର୍ଯ୍ୟଟନ ପ୍ରକଳ୍ପକୁ ସୂଚାରୁ ରୂପେ କାର୍ଯ୍ୟକାରୀ ଲାଗି ଜିଲ୍ଲାପାଳମାନଙ୍କୁ ପରାମର୍ଶ ଦେଇଛନ୍ତି ।
ଅଧିକାରୀମାନେ କହିଛନ୍ତି ଯେ ଇକୋ ରି ଟ୍ରିଟ୍ ପାଇଁ ପ୍ରାକୃତିକ ସ୍ଥାନଗୁଡିକୁ ଚୟନ କରାଯାଇଥିବାରୁ ଏହା ଅଧିକରୁ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରିବ । ଇକୋ ରି ଟ୍ରିଟ୍ ସହିତ ଜଙ୍ଗଲ, ପାହାଡଚଢା, ଜଙ୍ଗଲ ସଫାରୀ, ନୌଚାଳନା ଏବଂ ଅନ୍ୟାନ୍ୟ ପରିବେଶ ଅନୁକୂଳ କାର୍ଯ୍ୟକ୍ରମକୁ ଯୋଡାଯାଇଥିବାରୁ ଏଥିପ୍ରତି ପର୍ଯ୍ୟଟକମାନେ ଅଧିକ ଆକୃଷ୍ଟ ହେବେ । ପର୍ଯ୍ୟଟକ ବିଶେଷକରି ଯୁବବର୍ଗ ଏଥିପ୍ରତି ଅଧିକ ଆଗ୍ରହ ଦେଖାଇବେ । ତେଣୁ ଉଭୟ ଜିଲ୍ଲା ପ୍ରଶାସନ ଓ ଜଙ୍ଗଲ ପ୍ରଶାସନ ଅନୁମତିପ୍ରାପ୍ତ ଅଞ୍ଚଳରେ କାର୍ଯ୍ୟ ଆରମ୍ଭ କରିବାକୁ ଯାଉଥିବା ସୂଚନା ମିଳିଛି । ଏହାଦ୍ୱାରା ଅଧିକରୁ ଅଧିକ ପର୍ଯ୍ୟଟକ ଓଡିଶାକୁ ଆସିବେ ବୋଲି ବିଶେଷଜ୍ଞମାନେ ଆକଳନ କରୁଛନ୍ତି । ଘରୋଇ ପର୍ଯ୍ୟଟକ ଓ ଘରୋଇ ବଜାରକୁ ଦୃଷ୍ଟିରେ ରଖି ଓଡିଶା ପର୍ଯ୍ୟଟନ ପକ୍ଷରୁ ନୂତନ ପଦକ୍ଷେପ ସ୍ୱରୂପ ହାଉସ୍ବୋଟ୍, ନଦୀରେ କ୍ରୁଜ୍ ଚଳାଚଳ ଓ ପଥପାଶ୍ୱର୍ ପର୍ଯ୍ୟଟନ ଭିତ୍ତିଭୂମି ଉପରେ ଜୋର ଦିଆଯାଉଛି ।
