Home Health ବଣ୍ଟା ହେଲାଣି ୨ଲକ୍ଷ ୪୦ ହଜାର ଫାଭିପିରାଭିର

ବଣ୍ଟା ହେଲାଣି ୨ଲକ୍ଷ ୪୦ ହଜାର ଫାଭିପିରାଭିର

86
0

କରୋନା ରୋଗୀଙ୍କ ଚିକିତ୍ସା କ୍ଷେତ୍ରରେ ଫାଭିପିରାଭିର କାମ ଦେଉଥିବା ବେଳେ ରାଜ୍ୟ ସରକାର ବର୍ତ୍ତମାନ ସୁଦ୍ଧା ୩୦ଟି ଜିଲ୍ଲାରେ ୨ଲକ୍ଷ ୪୦ହଜାର ଫାଭିପିରାଭିର ବଟିକା ବାଣ୍ଟି ସାରିଲେଣି । ଏହାଦ୍ୱାରା ୪୬୦ କରୋନା ରୋଗୀ ଫାଭିପିରାଭିର ଦ୍ୱାରା ଚିକିତ୍ସିତ ହୋଇସାରିଥିବା ବେଳେ ଆଉ ୧୯୦୦ ରୋଗୀ ଚିକିତ୍ସାଧିନ ଅଛନ୍ତି ।

ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଆଜି ଏ ସଂକ୍ରାନ୍ତରେ ଜିଲ୍ଲାପାଳ ଓ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀମାନଙ୍କ ସହିତ କରିଥିବା ଆଲୋଚନାରୁ ଏହା ଜଣାଯାଇଛି । ରାଜ୍ୟରେ କରୋନା ରୋଗୀଙ୍କ ସୁସ୍ଥହାର ବଢ଼ି ୯୩ ପ୍ରତିଶତରେ ପହଞ୍ଚିଥିବା ବେଳେ ଜାତୀୟ ସ୍ତରରେ ଏହା ୮୮.୮୧ ପ୍ରତିଶତ ରହିଛି । ସେହିଭଳି ରାଜ୍ୟର କରୋନା ହଟ୍‍ସ୍ପଟ ପାଲଟିଥିବା ଖୋର୍ଦ୍ଧା, କଟକରେ କରୋନା ପଜିଟିଭ୍‍ଙ୍କ ସଂଖ୍ୟା ଲଗାତର ଭାବେ ହ୍ରାସ ପାଉଛି । ବର୍ତ୍ତମାନ ସୁଦ୍ଧା ରାଜ୍ୟରେ କରୋନା ମୃତ୍ୟୁହାର ୦.୪୩ ପ୍ରତିଶତ ରହିଛି ଯାହାକି ଦେଶର ବଡ଼ ବଡ଼ ରାଜ୍ୟ ତୁଳନାରେ ସବୁଠାରୁ କମ୍‍ ।

ଆସନ୍ତା ପାର୍ବଣ ଓ ଶୀତ ଋତୁକୁ ଦୃଷ୍ଟିରେ ରଖି ବ୍ୟାପକ ପଦକ୍ଷେପ ଗ୍ରହଣ ଲାଗି ଶ୍ରୀ ମହାପାତ୍ର ଜିଲ୍ଲା ପ୍ରଶାସନକୁ କହିଛନ୍ତି । ସହରାଞ୍ଚଳରେ ମୁନିସିପାଲ କମିଶନର୍‍ ଓ ପୌର ଅଧିକାରୀମାନେ ପ୍ରସ୍ତୁତି ଚଳାଇଥିବା ବେଳେ ମିଶନ୍‍ ମୋଡ୍‍ରେ ଆଇଇସି ପ୍ରଚାର ଚଳାଇବାକୁ ରାଜ୍ୟ ସରକାର କହିଛନ୍ତି । ଏ ନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ଏକ ମାର୍ଗଦର୍ଶିକା ଜାରି କରାଯିବା ସହିତ ଅଧିକାଂଶ ୟୁରୋପୀୟ ଦେଶରେ କୋଭିଡ୍‍ ସଂକ୍ରମଣର ଦ୍ୱିତୀୟ ଲହରି ଆସିବା ଓ କେରଳରେ ଓନାମ ପରେ ସଂକ୍ରମଣ ବୃଦ୍ଧି ପାଇବା ଯୋଗୁ ଏ ଦିଗରେ ବ୍ୟାପକ ସତର୍କତା ଲାଗି ଶ୍ରୀ ମହାପାତ୍ର ନିର୍ଦ୍ଦେଶ ଦେଇଛନ୍ତି ।

ସ୍ୱାସ୍ଥ୍ୟ ବିଭାଗ ପକ୍ଷରୁ ଲୋକଙ୍କୁ ସେମାନଙ୍କ କରୋନା ପରୀକ୍ଷାଫଳ ଶୀଘ୍ର ଅବଗତ କରାଇବା ସହିତ ପାର୍ବଣ ଶେଷ ପର୍ଯ୍ୟନ୍ତ କରୋନା ପରୀକ୍ଷା ହାର ଜାରି ରଖିବାକୁ କୁହାଯାଇଛି । ବର୍ତ୍ତମାନ ସୁଦ୍ଧା ସକ୍ରିୟ କରୋନା ରୋଗୀଙ୍କ ସଂଖ୍ୟା ୨୦ହଜାର ତଳକୁ ଆସି ୧୯,୫୭୯ରେ ପହଞ୍ଚିଛି ।

ଶ୍ରୀ ମହାପାତ୍ର ରାଜ୍ୟରେ କରେନା ଚିକିତ୍ସାଳୟରେ ଶଯ୍ୟା, ଆଇସିୟୁ ଏବଂ ଭେଣ୍ଟିଲେଟର ସଂକ୍ରାନ୍ତରେ ମଧ୍ୟ ସମୀକ୍ଷା କରିଛନ୍ତି । ରାଜ୍ୟରେ ଏବେ କୋଭିଡ୍‍ କେୟାର ସେଣ୍ଟରଗୁଡ଼ିକରେ ୧୨,୫୧୬ ଶଯ୍ୟା ଥିବା ବେଳେ ଏଥିରୁ ୧୪୦୯ରେ ରୋଗୀ ଅଛନ୍ତି । ସେହିଭଳି କୋଭିଡ୍‍ ହସ୍ପିଟାଲଗୁଡ଼ିକରେ ୮୦୦୦ ଶଯ୍ୟା ମଧ୍ୟରୁ ୨୯୨୭ରେ ରୋଗୀ ରହିଛନ୍ତି । ୧୫୧୯ ଆଇସିୟୁ/ଏଚ୍‍ଡ଼ିୟୁ ଶଯ୍ୟା ମଧ୍ୟରୁ ୮୯୯ଟି ପୂରଣ ହୋଇଛି । ସେହିଭଳି ୫୬୪ଟି ଭେଣ୍ଟିଲେଟରରୁ ମାତ୍ର ୨୧୭ଟି ବ୍ୟବହାର ହେଉଛି ।

୧୫,୫୧୫ କୋଭିଡ୍‍ ଆକ୍ରାନ୍ତ ଘରେ ରହି ଚିକିତ୍ସିତ ହେଉଛନ୍ତି ଯାହାକି ମୋଟ୍‍ ରୋଗୀ ସଂଖ୍ୟାର ପ୍ରାୟ ୭୫ ପ୍ରତିଶତ । ଏହି ରୋଗୀମାନଙ୍କୁ ଫାଭିପିରାଭିର ବଟିକା ଦିଆଯାଉଥିବା ବେଳେ ଏଥିଯୋଗୁ ରୋଗୀ ସୁସ୍ଥ ହେଉଥିବା ଜଣାଯାଇଛି । ଏହାକୁ ଦୃଷ୍ଟିରେ ରଖି ସମଗ୍ର ରାଜ୍ୟରେ ଏବେ ଫାଭିପରାଭିର ବଟିକା ବଣ୍ଟନ ଉପରେ କର୍ତ୍ତୃପକ୍ଷ ଅଗ୍ରାଧିକାର ଦେଉଛନ୍ତି ।  

LEAVE A REPLY

Please enter your comment!
Please enter your name here