ନୂଆଦିଲ୍ଲୀ : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସେବା ତୀର୍ଥଠାରେ ଆଇସିଟି ଆଧାରିତବହୁମୁଖୀ ମଞ୍ଚ ପ୍ରଗତିର ୫୨ତମ ବୈଠକର ଅଧ୍ୟକ୍ଷତା କରିଛନ୍ତି । ଏହି ମଞ୍ଚର ଉଦ୍ଦେଶ୍ୟ ହେଉଛି କେନ୍ଦ୍ର ଏବଂ ରାଜ୍ୟ ସରକାରଙ୍କ ପ୍ରୟାସକୁ ସୁରୁଖୁରୁରେ ସମନ୍ୱିତ କରିସକ୍ରିୟ ପ୍ରଶାସନ ଏବଂ ସମୟୋଚିତ କାର୍ଯ୍ୟକାରିତାକୁ ପ୍ରୋତ୍ସାହିତ କରିବା।
ବୈଠକରେ ପ୍ରଧାନମନ୍ତ୍ରୀ ରାସ୍ତା, ବିଦ୍ୟୁତ୍, ଶିଳ୍ପ କରିଡର ଏବଂ ମେଟ୍ରୋ ରେଳ କ୍ଷେତ୍ରର ଚାରୋଟି ଗୁରୁତ୍ୱପୂର୍ଣ୍ଣ ଭିତ୍ତିଭୂମି ପ୍ରକଳ୍ପର ସମୀକ୍ଷା କରିଥିଲେ। ଚାରିଟି ରାଜ୍ୟରେ ଥିବା ଏସବୁ ପ୍ରକଳ୍ପ ଲାଗି ପ୍ରାୟ ୩୦ ହଜାରକୋଟି ଟଙ୍କା ଖର୍ଚ୍ଚ ହେଉଛି। ଆର୍ଥିକ ଅଭିବୃଦ୍ଧି, ଆଞ୍ଚଳିକ ସଂଯୋଗୀକରଣ, ଶିଳ୍ପ ବିକାଶ ଏବଂ ଜନ କଲ୍ୟାଣ ପାଇଁ ଏହି ପ୍ରକଳ୍ପଗୁଡ଼ିକ ଗୁରୁତ୍ୱପୂର୍ଣ୍ଣ । ଏଗୁଡ଼ିକର ସମୀକ୍ଷା ସମୟରେ ଧାର୍ଯ୍ୟ ସମୟସୀମା, ଆନ୍ତଃ-ସଂସ୍ଥା ସମନ୍ୱୟ, ସମସ୍ୟାର ସମାଧାନ ଏବଂ ଠିକ୍ ସମୟରେ ପ୍ରକଳ୍ପଗୁଡ଼ିକର ପରିସମାପ୍ତି ଉପରେ ଗୁରୁତ୍ୱାରୋପ କରାଯାଇଥିଲା।
ପ୍ରଧାନମନ୍ତ୍ରୀ ବିଶେଷ ଭାବେ କହିଥିଲେ, ଭିତ୍ତିଭୂମି ପ୍ରକଳ୍ପଗୁଡ଼ିକରେ ବିଳମ୍ବ କେବଳ ଖର୍ଚ୍ଚ ବୃଦ୍ଧି କରେ ନାହିଁ, ବରଂ ଲୋକମାନଙ୍କୁ ଓ ଶିଳ୍ପଗୁଡ଼ିକୁ ସମୟୋଚିତ ଲାଭରୁ ବଞ୍ଚିତ କରେ। ସେ ସମ୍ପୃକ୍ତ ମନ୍ତ୍ରଣାଳୟ ଏବଂ ରାଜ୍ୟ ସରକାରଙ୍କୁ ମିଶନ-ମୋଡରେ ପଡ଼ି ରହିଥିବା ସମସ୍ୟାଗୁଡ଼ିକର ସମାଧାନ କରିବା ଏବଂ ଉଚ୍ଚ ସ୍ତରରେ କଡ଼ା ତଦାରଖ ସୁନିଶ୍ଚିତ କରିବାକୁ କହିଥିଲେ।
ଭିତ୍ତିଭୂମି ପ୍ରକଳ୍ପଗୁଡ଼ିକ ଲାଗି ଦକ୍ଷ ଯୋଜନା ପ୍ରସ୍ତୁତ କରିବା ଏବଂ ସମୟାନୁବର୍ତ୍ତୀ କାର୍ଯ୍ୟକାରିତା ସୁନିଶ୍ଚିତ ପାଇଁ ପିଏମ ଗତିଶକ୍ତି ଜାତୀୟ ମାଷ୍ଟର ପ୍ଲାନର ବ୍ୟବହାର ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ପୋର୍ଟାଲରେ ପ୍ରକଳ୍ପ ବିବରଣୀ, ଉପଯୋଗୀତା, ଭିତ୍ତିଭୂମି ସ୍ତର, ମଞ୍ଜୁରୀ ଏବଂ ଅନ୍ୟାନ୍ୟ କ୍ଷେତ୍ରସ୍ତରୀୟ ସୂଚନାର ନିୟମିତ ଓ ସମୟାନୁବର୍ତ୍ତୀ ତଥ୍ୟ ପ୍ରଦାନ ଉପରେ ମଧ୍ୟ ସେଜୋର ଦେଇଥିଲେ। ସେ ଆହୁରି କହିଥିଲେ, ଏହି ମଞ୍ଚସଦ୍ୟତମ ଭୂମିଗତ ପରିସ୍ଥିତିକୁ ପ୍ରତିଫଳିତ କରିବା ଉଚିତ ଯାହା ଦ୍ଵାରା ପୂର୍ବରୁ ପ୍ରତିବନ୍ଧକଗୁଡ଼ିକୁ ଚିହ୍ନଟ କରାଯାଇପାରିବ । ଏଥିସହିତଆନ୍ତଃ-ଏଜେନ୍ସି ସମନ୍ୱୟକୁ ଉନ୍ନତ କରାଯାଇପାରିବ ଏବଂ ନିର୍ଭରଯୋଗ୍ୟ, ବାସ୍ତବ-ସମୟ ତଥ୍ୟ ଆଧାରରେ ନିଷ୍ପତ୍ତି ନିଆଯାଇପାରିବ।
ପ୍ରଧାନମନ୍ତ୍ରୀ ଯକ୍ଷ୍ମା ମୁକ୍ତ ଭାରତ ଅଭିଯାନର ସମୀକ୍ଷା କରିଥିଲେ ଏବଂ କୃତ୍ରିମ ବୁଦ୍ଧିମତ୍ତା (ଏଆଇ) ସମେତ ନବୀନ ଡିଜିଟାଲ ପ୍ରଯୁକ୍ତିବିଦ୍ୟାର ଉପଯୋଗ କରିବାର ଆବଶ୍ୟକତା ଉପରେ ଗୁରୁତ୍ୱ ଦେଇଥିଲେ। ସଚେତନତା, ରୋଗୀଙ୍କ ନିୟମିତ ଚିକିତ୍ସା ଏବଂ ସାମାଜିକ ଏକଜୁଟତା ପାଇଁ ସେ ଏନସିସିକ୍ୟାଡେଟ ଏବଂ ମାଇ ଭାରତସ୍ୱେଚ୍ଛାସେବକମାନଙ୍କର ଏକ ଦଳ ଗଠନ କରିବାକୁ ପରାମର୍ଶ ଦେଇଥିଲେ।
ପ୍ରଧାନମନ୍ତ୍ରୀ ସାଇବର ଅପରାଧ ଏବଂ ଡିଜିଟାଲ ଗିରଫଦାରୀ ସମ୍ବନ୍ଧୀୟ ଅଭିଯୋଗଗୁଡ଼ିକର ମଧ୍ୟ ସମୀକ୍ଷା କରିଥିଲେ। ନାଗରିକମାନଙ୍କୁ ଠକିବା ପାଇଁ ଡିଜିଟାଲ ପ୍ଲାଟଫର୍ମର ଅପବ୍ୟବହାର ବୃଦ୍ଧି ପାଇବାକୁ ନେଇ ସେ ଚିନ୍ତା ପ୍ରକଟ କରିଥିଲେ।ସେବିଶେଷ ଭାବେ କହିଥିଲେ ଯେ ସମସ୍ତ ସମ୍ପୃକ୍ତ ସଂସ୍ଥାଏପରି ମାମଲାଗୁଡ଼ିକର ସମନ୍ୱିତ, ସମ୍ବେଦନଶୀଳ ଏବଂ ସମୟବଦ୍ଧ ପରିଚାଳନା କରିବା ଆବଶ୍ୟକ। ନାଗରିକମାନଙ୍କୁ ଗୋଟିଏ ବିଭାଗ କିମ୍ବା ସଂସ୍ଥାରୁ ଅନ୍ୟ ଏକ ବିଭାଗକୁ ଦୌଡ଼ିବାକୁ ବାଧ୍ୟ କରାଯିବା ଉଚିତ୍ ନୁହେଁ। ସ୍ପଷ୍ଟ ଦାୟିତ୍ୱବୋଧ, ଦ୍ରୁତ ପ୍ରତିକ୍ରିୟା, ଆଇନ ପ୍ରବର୍ତ୍ତନ ସଂସ୍ଥା, ବ୍ୟାଙ୍କ ଓ ଡିଜିଟାଲ ପ୍ଲାଟଫର୍ମ ମଧ୍ୟରେ ଉତ୍ତମ ସମନ୍ୱୟ ଏବଂ ଦୃଢ଼ ଜନସଚେତନତାର ଆବଶ୍ୟକତା ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ ସାଇବର ଠକେଇ ମାମଲାରେ, ଆର୍ଥିକ କ୍ଷତିକୁ ରୋକିବା ଏବଂ ଜନସାଧାରଣଙ୍କ ବିଶ୍ୱାସ ଫେରାଇ ଆଣିବା ପାଇଁ ସମୟୋଚିତ କାର୍ଯ୍ୟାନୁଷ୍ଠାନ ଗୁରୁତ୍ୱପୂର୍ଣ୍ଣ। ସେ ସମସ୍ତ ଅଂଶୀଦାରମାନଙ୍କୁ ନିବାରଣ, ଅଭିଯୋଗ ଦାଖଲ, ତଦନ୍ତ ଏବଂ ଅଭିଯୋଗ ସମାଧାନ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଘନିଷ୍ଠ ସମନ୍ୱୟ ରକ୍ଷା କରି କାର୍ଯ୍ୟ କରିବାକୁ କହିଥିଲେ। ରାଜ୍ୟଗୁଡ଼ିକ ସାଇବର ଠକେଇ ମାମଲାରେ ଦ୍ରୁତ ପଞ୍ଜିକରଣ ଏବଂ ପ୍ରତିକ୍ରିୟା ପାଇଁ ଇ-ଜିରୋ ଏଫଆଇଆର ବ୍ୟବସ୍ଥାକୁ ସକ୍ଷମ କରିବା ଦିଗରେ କାର୍ଯ୍ୟ କରିବା ଉଚିତ ବୋଲି ସେ ଜୋର୍ ଦେଇ କହିଥିଲେ ।