ଭୁବନେଶ୍ୱର : ରାଜ୍ୟର ୨୭ ହଜାରରୁ ଉର୍ଦ୍ଧ୍ୱ ଅଙ୍ଗନବାଡି କେନ୍ଦ୍ରରେ ବିଦ୍ୟୁତ୍ ସଂଯୋଗ ନଥିବାବେଳେ ୩୫ ହଜାରରୁ ଅଧିକ କେନ୍ଦ୍ରରେ ଶୌଚାଳୟ ସୁବିଧା ନାହିଁ । ରାଜ୍ୟ ବିଧାନସଭାରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଦେଇଥିବା ତଥ୍ୟରୁ ଏହି ସୂଚନା ମିଳିଛି ।
ରାଜ୍ୟରେ ଅଙ୍ଗନବାଡି କେନ୍ଦ୍ରଗୁଡିକ ସଂକ୍ରାନ୍ତରେ ବିଜେପି ବିଧାୟକ ଟଙ୍କଧର ତ୍ରିପାଠୀ ପଚାରିଥିବା ପ୍ରଶ୍ନର ଉତ୍ତରର ଉପମୁଖ୍ୟମନ୍ତ୍ରୀ ଦର୍ଶାଇଛନ୍ତି ଯେ ରାଜ୍ୟରେ ମୋଟ୍ ୭୪,୨୨୪ଟି ଅଙ୍ଗନବାଡି କେନ୍ଦ୍ର ରହିଥିବାବେଳେ ଏଥି ମଧ୍ୟରୁ ୫୪,୦୭୪ ଟି କେନ୍ଦ୍ରର ନିଜସ୍ୱ ଗୃହ ନାହିଁ । ସେହିଭଳି ୨୭,୦୫୧ ଅଙ୍ଗନବାଡି କେନ୍ଦ୍ରରେ ବିଦ୍ୟୁତ୍ ସୁବିଧା ନଥିବାବେଳେ ୩୫,୦୫୯ଟି କେନ୍ଦ୍ରରେ ଶୌଚାଳୟ ସୁବିଧା ନାହିଁ ।
ରାଜ୍ୟରେ ଥିବା ଏହିସବୁ ଅଙ୍ଗନବାଡି କେନ୍ଦ୍ରଗୁଡିକରେ ୬ମାସରୁ ୬ବର୍ଷ ବୟସର ୨୭,୧୧,୮୮୬ ଜଣ ଶିଶୁ ପଞ୍ଜିକୃତ ହେଉଛନ୍ତି । ଯେଉଁସବୁ ସ୍ଥାନରେ ଅଙ୍ଗନବାଡିର ନିଜସ୍ୱ ଘର ନାହିଁ ସେଠାରେ ନିକଟସ୍ଥ ବିଦ୍ୟାଳୟ ଘର କିମ୍ବା ଭଡାଘରେ ଏହି କେନ୍ଦ୍ରଗୁଡିକ କାର୍ଯ୍ୟ କରୁଛି । ତେବେ ଛୋଟ ଛୋଟ ପିଲା ଖେଳିବା ଓ ପାଠପଢା ଶିଖିବାପାଇଁ ଥିବା କେନ୍ଦ୍ର ମଧ୍ୟରୁ ଏତେସବୁ କେନ୍ଦ୍ରରେ ବିଦ୍ୟୁତ୍ ଓ ଶୌଚାଳୟ ସୁବିଧା ନଥିବା ଏବେ ପିଲାମାନଙ୍କର ପରିଷ୍କାର ପରିଚ୍ଛନ୍ନତା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ଉପମୁଖ୍ୟମନ୍ତ୍ରୀଙ୍କ ସୂଚନା ଅନୁଯାୟୀ ଗଞ୍ଜାମ ଜିଲ୍ଲାରେ ସର୍ବାଧିକ ୫୧୬୨ଟି ଅଙ୍ଗନବାଡି କେନ୍ଦ୍ର ରହିଥିବାବେଳେ ଏଠାରେ ୨ଲକ୍ଷ ୩୩ହଜାରରୁ ଅଧିକ ପିଲା ପଞ୍ଜିକୃତ ହୋଇଛନ୍ତି । ତେବେ ଜିଲ୍ଲାରେ ମାତ୍ର ୩୩୦୮ଟି ଅଙ୍ଗନବାଡି କେନ୍ଦ୍ରର ନିଜସ୍ୱ ଘର ଥିବାବେଳେ ୩୮୬୯ଟି କେନ୍ଦ୍ରରେ ବିଦ୍ୟୁତ ସୁବିଧା ଓ ୩୯୬୭ଟି କେନ୍ଦ୍ରରେ ଶୌଚାଳୟ ସୁବିଧା ରହିଛି । ତେବେ ସମସ୍ତ ଅଙ୍ଗନବାଡି କେନ୍ଦ୍ରରେ ପାନୀୟଜଳର ସୁବିଧା ରହିଛି ।
ରାଜ୍ୟ ରାଜଧାନୀ ଥିବା ଖୋରଧା ଜିଲ୍ଲାରେ ୨୨୫୪ଟି ଅଙ୍ଗନବାଡି କେନ୍ଦ୍ର ଥିବାବେଳେ ଏଠାରେ ୧ଲକ୍ଷରୁ ଅଧିକ ପିଲା ପଞ୍ଜିକୃତ ହୋଇଛନ୍ତି । ତେବେ ଏଠାରେ ମାତ୍ର ୧୬୨୨ଟି କେନ୍ଦ୍ରର ନିଜସ୍ୱ ଗୃହ ଥିବାବେଳେ ୨୧୧୬ ଟି କେନ୍ଦ୍ରରେ ବିଜୁଳି ଓ ୧୭୪୫ଟି କେନ୍ଦ୍ରରେ ଶୌଚାଳୟ ସୁବିଧା ରହିଛି ।
କୁନି କୁନି ପିଲାମାନେ ଅଙ୍ଗନବାଡିରେ ଖେଳ କୁଦ ସହିତ ଖାଦ୍ୟ ଗ୍ରହଣ କରିଥାନ୍ତି । ଏଠାରେ ସେମାନଙ୍କର ସ୍ୱାସ୍ଥ୍ୟ ପରୀକ୍ଷା ହେଉଥିବାବେଳେ ସେମାନଙ୍କୁ ଅଙ୍ଗନବାଡି ଦିଦି ଓ ସହାୟିକାମାନେ ମଧ୍ୟ ରହିଥାନ୍ତି । ତେବେ ବିନା ବିଜୁଳି ଓ ଶୌଚାଳୟରେ ଏହି ପିଲା ଓ ସେମାନଙ୍କ ତତ୍ୱାବଧାରକମାନେ କିଭଳି ସମୟ କାଟୁଥିବେ ତାହା ସହଜରେ ଅନୁମେୟ । ତେଣୁ ନିଜସ୍ୱ ଘର ତିଆରି ସହିତ ବର୍ତ୍ତମାନ ଥିବା ସମସ୍ତ ଅଙ୍ଗନବାଡି କେନ୍ଦ୍ରରେ ଶୌଚାଳୟ ସୁବିଧା କରିବାପାଇଁ ମତପ୍ରକାଶ ପାଉଛି । (ତଥ୍ୟ)