ଭୁବନେଶ୍ୱର : ଓଡ଼ିଶାର ସର୍ବପୂରାତନ ଉତ୍କଳ ବିଶ୍ୱବିଦ୍ୟାଳୟ ତାହାର ପ୍ରତିଷ୍ଠାର ୮୩ବର୍ଷ ପୂର୍ତ୍ତି କରିବା ଅବସରରେ ଏହାକୁ ପ୍ରତ୍ୟେକ ବିଦ୍ୟାର୍ଥୀଙ୍କର ସ୍ୱପ୍ନର ବିଶ୍ୱବିଦ୍ୟାଳୟ ଏବଂ ସଫଳତାର ସ୍ୱପ୍ନପଥ ବୋଲି ଉଲ୍ଲେଖ କରି ବିଜ୍ଞାପନ ଛପାଯାଇଛି । ତେବେ ଶିକ୍ଷକ ଓ ଅଣଶିକ୍ଷକ କର୍ମଚାରୀ ଅଭାବରୁ ଏହି ଗୌରବାବହ ଶିକ୍ଷାନୁଷ୍ଠାନ ଏବେ ଉତ୍କଟ ସଂକଟ ମଧ୍ୟରେ ଗତି କରୁଛି ।
ଏଠାରେ ଉଲ୍ଲେଖନୀୟ ଯେ ବିଶ୍ୱନାଥ ଦାଶଙ୍କ ପ୍ରଧାନମନ୍ତ୍ରୀତ୍ୱ ସମୟରେ ଉତ୍କଳ ବିଶ୍ୱବିଦ୍ୟାଳୟ ପ୍ରତିଷ୍ଠା ପାଇଁ ଯେଉଁ ଉଦ୍ୟମ ଆରମ୍ଭ ହୋଇଥିଲା ତାହା ସଫଳ ହୋଇଥିଲା ମହାରାଜା କୃଷ୍ଣଚନ୍ଦ୍ର ଗଜପତି ନାରାୟଣ ଦେବଙ୍କ ସରକାରରେ ପଣ୍ଡିତ ଗୋଦାବରିଶ ମିଶ୍ର ଶିକ୍ଷା ମନ୍ତ୍ରୀ ଥିବାବେଳେ ୧୯୪୩ ଜୁନ୍ ୩୦ ତାରିଖରେ ଏ ସଂକ୍ରାନ୍ତୀୟ ବିଧେୟକ ଗୃହୀତ ହେବା ସହ ରାଜ୍ୟପାଳଙ୍କ ସ୍ୱୀକୃତି ଲାଭ କରିବା ପରେ କଟକର ରେଭେନ୍ସା କଲେଜ୍ ସୌଧରେ ୧୯୪୩ ନଭେମ୍ବର ୨୭ ତାରିଖରେ ଉତ୍କଳ ବିଶ୍ୱବିଦ୍ୟାଳୟ ଜନ୍ମ ନେଇଥିଲା ।
ରାଜ୍ୟର ଏହି ପ୍ରଥମ ବିଶ୍ୱବିଦ୍ୟାଳୟରେ ଚିନ୍ତାମଣି ଆଚାର୍ଯ୍ୟ, ପ୍ରାଣକୃଷ୍ଣ ପରିଜାଙ୍କଠାରୁ ଆରମ୍ଭ କରି ମନ୍ମଥନାଥ ଦାସ, ମହେନ୍ଦ୍ର କୁମାର ରାଉତ, ବିଦ୍ୟାଧର ମିଶ୍ର, ଗୋକୁଳାନନ୍ଦ ଦାସଙ୍କ ଭଳି ବହୁ ପ୍ରଥିତଯଶା ଶିକ୍ଷାବିତ୍ କୁଳପତି ଭାବେ ବିଭିନ୍ନ ସମୟରେ ଦାୟିତ୍ୱ ନିର୍ବାହ କରିଛନ୍ତି । ତେବେ ବର୍ଷାଧିକ କାଳ ଧରି ଉତ୍କଳ ବିଶ୍ୱବିଦ୍ୟାଳୟର ନିୟମିତ କୁଳପତି ନଥିବାବେଳେ ଏବେ ତାହା ଭାରପ୍ରାପ୍ତ କୁଳପତିଙ୍କ ତତ୍ତ୍ୱାବଧାନରେ ଚାଲୁଛି । ଉତ୍କଳ ସମେତ ରାଜ୍ୟର ଅନ୍ୟୁନ ୧୫ଟି ସରକାରୀ ବିଶ୍ୱବିଦ୍ୟାଳୟରେ ଏବେ ନିୟମିତ କୁଳପତି ନାହାନ୍ତି ।
ଉଚ୍ଚଶିକ୍ଷା ବିଭାଗ ନିୟନ୍ତ୍ରଣରେ ଥିବା ଉତ୍କଳ ବିଶ୍ୱବିଦ୍ୟାଳୟ ଲାଗି ୨୪୪ଟି ମଞ୍ଜୁରୀପ୍ରାପ୍ତ ଶିକ୍ଷକ ପଦବୀ ଥିବାବେଳେ ସେଥିରୁ ୧୨୪ରୁ ଅଧିକ ପଦବୀ ଖାଲି ପଡିଛି । ଏମିତିକି ଏହି ବିଶ୍ୱବିଦ୍ୟାଳୟ ପାଇଁ ଥିବା ୪୬ଟି ମଞ୍ଜୁରୀପ୍ରାପ୍ତ ପ୍ରଫେସର ପଦବୀରୁ ପ୍ରାୟ ୩୫ଟି ଖାଲି ପଡିଥିବାରୁ ଅନେକ ବିଭାଗରେ ପ୍ରଫେସର ନାହାନ୍ତି । ସହଯୋଗୀ ଓ ସହକାରୀ ପ୍ରଫେସର ପଦବୀରୁ ବି ୮୦ରୁ ଅଧିକ ଖାଲି ପଡିଛି । ଉତ୍କଳ ବିଶ୍ୱବିଦ୍ୟାଳୟର ଏଭଳି ଉତ୍କଟ ଅବସ୍ଥାରେ ଭରସା କେବଳ ଅତିଥି ଅଧ୍ୟାପକମାନଙ୍କ ଉପରେ ।
କେବଳ ସେତିକି ନୁହେଁ, ଉତ୍କଳ ବିଶ୍ୱବିଦ୍ୟାଳୟ ପାଇଁ ୯୮୦ଟି ମଞ୍ଜୁରୀପ୍ରାପ୍ତ ଅଣଶିକ୍ଷକ ପଦବୀ ଥିବାବେଳେ ସେଥିରୁ ବି ପ୍ରାୟ ୭୭୫ ପଦବୀ ଖାଲି ପଡିଛି ବୋଲି କୁହାଯାଉଛି । କାମ ଚଳାଇବା ପାଇଁ ଅବସରପ୍ରାପ୍ତ ଓ ଠିକା କର୍ମଚାରୀଙ୍କୁ ରଖାଯାଉଛି । ଏହି ବିଶ୍ୱବିଦ୍ୟାଳୟର ସ୍ଥିତି ଏମିତି ବିପର୍ଯ୍ୟସ୍ତ ହୋଇଛି ଯେ ବିଶ୍ୱବିଦ୍ୟାଳୟ ପରିସରରେ ଶିକ୍ଷକ, ପ୍ରଶାସକ ଓ ଅଣଶିକ୍ଷକ କର୍ମଚାରୀଙ୍କ ପାଇଁ ଥିବା କ୍ୱାଟର୍ସଗୁଡ଼ିକ ଭିତରୁ ଅଧିକାଂଶ ଖାଲି ପଡିଥିବାରୁ ତାହାକୁ ଅନ୍ୟମାନେ ଜବରଦଖଲ କରି ଭଡ଼ା ଲଗାଇବା ପର୍ଯ୍ୟନ୍ତ ମଧ୍ୟ କଥା ଯାଇଛି । ଅବଶ୍ୟ ଏହି ସମସ୍ୟା ଉତ୍କଟତର ହେବାରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ପୁଲିସ ସହାୟତାରେ ଇତିମଧ୍ୟରେ ଅନେକଗୁଡ଼ିଏ କ୍ୱାଟର୍ସକୁ ଜବରଦଖଲମୁକ୍ତ କରିଛନ୍ତି ।
ଶିକ୍ଷକ ଓ କର୍ମଚାରୀ ଅଭାବରୁ ବିଶ୍ୱବିଦ୍ୟାଳୟରେ ଅଧ୍ୟାପନା, ଗବେଷଣା, ପରୀକ୍ଷା ପରିଚାଳନା ଓ ପ୍ରଶାସନିକ କାର୍ଯ୍ୟରେ ବ୍ୟାଘାତ ଉପୁଜୁଥିବା ଘେନି ବାରମ୍ବାର ଛାତ୍ରଛାତ୍ରୀମାନେ ଅଭିଯୋଗ କରୁଛନ୍ତି । ବହ ବିଳମ୍ବରେ ହେଲେ ମଧ୍ୟ ନିୟମିତ କୁଳପତି ଚୟନ ପାଇଁ ଇତିମଧ୍ୟରେ ରାଜ୍ୟ ସରକାର ଓ କୁଳାଧିପତିଙ୍କ ଦପ୍ତର କାର୍ଯ୍ୟାନୁଷ୍ଠାନ ଆରମ୍ଭ କରିଛନ୍ତି ଏବଂ ଖୁବ୍ଶୀଘ୍ର ନୂଆ କୁଳପତି ନିଯୁକ୍ତି ପାଇବେ ବୋଲି କୁହାଯାଉଛି । ତେବେ ଚଳିତ ଶିକ୍ଷାବର୍ଷ ଶେଷ ପୂର୍ବରୁ ନୂଆ ପ୍ରଫେସର ଏବଂ ସହଯୋଗୀ ଓ ସହକାରୀ ପ୍ରଫେସରଙ୍କ ସମେତ ଅଣଶିକ୍ଷକ କର୍ମଚାରୀ ନିଯୁକ୍ତି ପାଇବା ସମ୍ଭାବନା କ୍ଷୀଣ । (ତଥ୍ୟ)