ଭୁବନେଶ୍ୱର : ପ୍ରସ୍ତାବିତ ପୁରୀ ବିମାନବନ୍ଦରକୁ ଚୂଡାନ୍ତ ସବୁଜ ସଙ୍କେତ ମିଳିପାରିନଥିବାବେଳେ ଏବେ ରାଜ୍ୟ ସରକାର ଚିଲିକାରେ ‘ସି-ପ୍ଲେନ୍’ ସେବାପାଇଁ ପୁଣିଥରେ ଯେଉଁ ପ୍ରସ୍ତାବ ରଖିଛନ୍ତି ତାହାକୁ ପରିବେଶ ଅନୁମତି ମିଳିବ କି ନାହିଁ ସେଥିଘେନି ସନ୍ଦେହ ଉପୁଜିଛି ।
ଚିଲିକା ମତ୍ସ୍ୟଜୀବୀ ମହାସଂଘ ସମେତ ଚିଲିକା ଆଖପାଖରେ ବହୁ ସଂସ୍ଥା ଓ ପରିବେଶପ୍ରେମୀମାନେ ଚିଲିକାର ସି-ପ୍ଲେନ୍ ସେବାକୁ ବହୁ ପୂର୍ବରୁ ବିରୋଧକରି ଆସୁଛନ୍ତି । ନବୀନ ପଟ୍ଟନାୟକଙ୍କ ସରକାର ଅମଳରେ ଏହି ପ୍ରସ୍ତାବ ଉଠିବାମାତ୍ରେ ଦଳମତ ନିର୍ବିଶେଷରେ ବ୍ୟାପକ ବିରୋଧ ହୋଇଥିଲା । ସେହିଭଳି ଗତ ସରକାର ସମୟରେ ପୁରୀରେ ବିମାନବନ୍ଦର ପାଇଁ ଯେଉଁ ପ୍ରସ୍ତାବ ଥିଲା ତାହାକୁ ଅଦ୍ୟାବଧି ସମ୍ପୂର୍ଣ୍ଣ ମଞ୍ଜୁରୀ ମିଳିନଥିବାରୁ କାମ ଆରମ୍ଭ ହୋଇପାରୁ ନାହିଁ ।
ଚିଲିକା ମତ୍ସ୍ୟଜୀବୀ ମହାସଂଘର କିଛି କର୍ମକର୍ତ୍ତା ଅଭିଯୋଗ କରୁଛନ୍ତି ଯେ ଏହି ହ୍ରଦରେ ମୋଟର ଚାଳିତ ଡଙ୍ଗା ମାଧ୍ୟମରେ ଯାତ୍ରୀ ଓ ପର୍ଯ୍ୟଟକ ପରିବହନ କରାଯାଉଥିବାରୁ ଏଥିରୁ ନିର୍ଗତ ତେଲ ପଡି ଏବଂ ଶବ୍ଦ ପ୍ରଦୂଷଣ ଯୋଗୁଁ ମାଛ, କଙ୍କଡା ଉତ୍ପାଦନ ବ୍ୟାହତ ହେବା ସଂଗେ ସଂଗେ ପକ୍ଷୀମାନଙ୍କ ନିରାପଦ ଆଶ୍ରୟସ୍ଥଳୀଗୁଡିକ ମଧ୍ୟ ବିପଦର ବଳୟ ମଧ୍ୟକୁ ଚାଲିଯାଉଛି । ଏକଦା ପାଖାପାଖି ଦେଢ ହଜାର ବର୍ଗକିଲୋମିଟର ପରିମିତ ଅଞ୍ଚଳର ଚିଲିକା ହ୍ରାଦ ଏବେ ସଙ୍କୁଚିତ ହୋଇ ହୋଇ ହଜାରେ ବର୍ଗ କିଲୋମିଟରରୁ କମ୍ ହୋଇଗଲାଣି । ଏହାଛଡା ଚିଲକାରେ ରାଜଧାନୀ ଭୁବନେଶ୍ୱର ସମେତ ବିଭିନ୍ନ ସହରାଞ୍ଚଳର ବର୍ଜ୍ୟ ପାଣି ମିଶିବା ଯୋଗୁଁ ଜଳ ପ୍ରଦୂଷିତ ହୋଇ ଚାଲିଛି ।
ଏଭଳି ସ୍ଥିତିରେ ଚିଲିକା ଆଖପାଖର ଯେଉଁ ମତ୍ସ୍ୟଜୀବି ପରିବାରଗୁଡିକ ସେମାନଙ୍କର ଦାନା କନା ପାଇଁ ଚିଲିକାର ମାଛ, ଚିଙ୍ଗୁଡି ଓ କଙ୍କଡା ଉପରେ ନିର୍ଭର କରୁଥିଲେ ସେମାନେ ବାଧ୍ୟହୋଇ ଭିଟାମାଟି ଛାଡି ଦାଦନ ଖଟିବାକୁ ଅନ୍ୟ ରାଜ୍ୟକୁ ପଳାଉଛନ୍ତି । ଏହି ପୃଷ୍ଠଭୂମିରେ ପର୍ଯ୍ୟଟକଙ୍କୁ ମଜା ଦେବାପାଇଁ ଚିଲିକାର ଜଳ ରାଶି ଉପରେ ବିମାନ ଅବତରଣ କଲେ ତାହା ହ୍ରଦର ଜୈବ ବିବିଧତାକୁ ନଷ୍ଟ କରିବା ସହିତ ଭବିଷ୍ୟତ ପାଇଁ ବିପଦ ଡାକି ଆଣିବ । କେବଳ ସେତିକି ନୁହେଁ, ଏଥିଯୋଗୁଁ ଡଲଫିନ୍ ଓ ପକ୍ଷୀମାନେ ବି ବିପଦରେ ପଡିବେ ।
ଏ ପରିପ୍ରେକ୍ଷୀରେ ଚିଲିକାକୁ ଘେରିମୁକ୍ତ କରିବା ସହିତ ପ୍ରଦୂଷଣ ଦାଉରୁ ରକ୍ଷା କରିବା ସଂଗେ ସଂଗେ ଉପକୂଳ ରାଜପଥ ନାମରେ ଚିଲିକା ଉପରେ ପୋଲ ନିର୍ମାଣ ନକରିବା ଏବଂ ଏଠାରେ ସି-ପ୍ଲେନ ସେବା ଆରମ୍ଭ ନକରିବାକୁ ବିଭିନ୍ନ ମହଲରୁ ଦାବି ହେଉଛି । ସେହିଭଳି ସମୁଦ୍ର ତଟବର୍ତ୍ତୀ ଅଞ୍ଚଳରେ ବିମାନବନ୍ଦର କରାଗଲେ ତାହାର ପରିବେଶ ଉପରେ ବ୍ୟାପକ ପ୍ରତିକୂଳ ପ୍ରଭାବ ପଡିବ ଏବଂ ଏଥିଯୋଗୁଁ ଶ୍ରୀମନ୍ଦିରର ନିରାପତ୍ତା ପାଇଁ ମଧ୍ୟ ପ୍ରଶ୍ନବାଚୀ ଉଠିବ ବୋଲି ପରିବେଶବିତ୍ ଓ ପ୍ରାଚୀନ କିର୍ତ୍ତୀରାଜି ସଂରକ୍ଷଣ ସହ ବହୁବର୍ଷ ଧରି ଜଡିତ ଅନେକ ଗବେଷକ ମତ ଦେଉଛନ୍ତି । ବଡ ବଡ ବିମାନ ଆସିଲେ ତାହାର କମ୍ପନ ଯୋଗୁଁ ଶ୍ରୀମନ୍ଦିରର ବ୍ୟାପକ କ୍ଷତି ହୋଇପାରେ ଏବଂ ଏହାଛଡା ସାମୁଦ୍ରିକ ଝଡ ସମୟରେ ବିମାନବନ୍ଦର ମଧ୍ୟ ନଷ୍ଟ ହୋଇଯାଇପାରେ ।
ଏ ସବୁ ସମସ୍ୟାକୁ ଆଖିଆଗରେ ରଖି ରାଜ୍ୟ ସରକାର ପୁରୀ ନିକଟରେ ବିମାନବନ୍ଦର ଓ ଚିଲିକା ହ୍ରଦରେ ସି-ପ୍ଲେନ୍ ଅବତରଣ ଭଳି ପ୍ରସ୍ତାବରୁ ଦୂରେଇ ରହିବାପାଇଁ ପରିବେଶବିତ୍ମାନେ କହୁଛନ୍ତି । ହୀରାକୁଦ ଜଳଭଣ୍ଡାରରେ ସି-ପ୍ଲେନ ଅବତରଣ ଲାଗି ପ୍ରସ୍ତାବ ରହିଛି ତାହା କାର୍ଯ୍ୟକାରୀ ହେଲେ ହୀରାକୁଦ ନଦୀବନ୍ଧ ପ୍ରତି କ’ଣ ସମସ୍ୟା ସୃଷ୍ଟିହେବ ସେ ବିଷୟରେ ଅନୁଧ୍ୟାନ କରିବାପାଇଁ ପରିବେଶପ୍ରେମୀମାନେ ମତ ଦେଉଛନ୍ତି । (ତଥ୍ୟ)