ଭୁବନେଶ୍ୱର : ଏକୋଇଶିଟି ଆଇଟିଡିଏ ଜିଲ୍ଲାରେ ଅନୁସୂଚିତ ଜାତି ଓ ଜନଜାତି ବିଭାଗ ପକ୍ଷରୁ ଆଦର୍ଶ ବିଦ୍ୟାଳୟ ପ୍ରତିଷ୍ଠା କରାଯିବ । ଏହି ଆଦର୍ଶ ବିଦ୍ୟାଳୟଗୁଡିକୁ ଅମର ଶହୀଦ ଲକ୍ଷ୍ମଣ ନାଏକଙ୍କ ନାମରେ ନାମିତ ହେବ ।
ବିଭାଗୀୟ ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ ଶହୀଦ ଲକ୍ଷ୍ମଣ ନାଏକ ଓ ଅନ୍ୟ ସଂଗ୍ରାମୀମାନଙ୍କ ବଳିଦାନର ଅମର ଗାଥା ଛାତ୍ରଛାତ୍ରୀମାନଙ୍କ ମଧ୍ୟରେ ପ୍ରଚାର ପ୍ରସାର କରିବାପାଇଁ ବିଦ୍ୟାଳୟ ପାଠ୍ୟକ୍ରମରେ ଅଗ୍ରାଧିକାର ଭିତ୍ତିରେ ରଖାଯିବା ସକାଶେ ଉଦ୍ୟମ ଚାଲିଛି । ବିଶେଷକରି ସ୍ୱାଧୀନତା ସଂଗ୍ରାମରେ ଆଦିବାସୀ ସମ୍ପ୍ରଦାୟର ଯୋଗଦାନ ଓ ବଳିଦାନ ସଂକ୍ରାନ୍ତରେ ସ୍ୱତନ୍ତ୍ର ପାଠ୍ୟପୁସ୍ତକମାନ ପ୍ରଣୟନ କରାଯାଇ ବିଭିନ୍ନ ଶ୍ରେଣୀରେ ପଢାଯିବ ।
ଏଠାରେ ଉଲ୍ଲେଖନୀୟ ଯେ ପାପଡାହାଣ୍ଡି ଠାରେ ସ୍ୱାଧୀନତା ସଂଗ୍ରାମକାଳରେ ହୋଇଥିବା ପୁଲିସ୍ ଗୁଳିରେ ଅନ୍ୟୁନ ୧୯ଜଣ ଶହୀଦ ହୋଇଥିବାବେଳେ ୧୪୦ଜଣଙ୍କୁ ଗିରଫ କରାଯାଇଥିଲା । ଗିରଫ ବ୍ୟକ୍ତିମାନଙ୍କ ମଧ୍ୟରୁ ୨୫ରୁ ଅଧିକ ପୁଲିସ୍ର ଅତ୍ୟାଚାର ଓ ଜେଲ୍ ଭିତରେ ଠିକଣା ଚିକିତ୍ସା ଓ ଖାଦ୍ୟ ନପାଇ ମୃତ୍ୟୁବରଣ କରିଥିଲେ । ମାଥିଲି ଗୁଳିକାଣ୍ଡରେ ବି ଅନ୍ୟୁନ ୬ଜଣ ଶହୀଦ ହୋଇଥିବାବେଳେ ଲକ୍ଷ୍ମଣ ନାଏକଙ୍କୁ ମିଛ ମାମଲାରେ ଫାଶୀ ଦିଆଯାଇଥିଲା । ମାଥିଲି ଘଟଣାରେ ୫୪ଜଣଙ୍କ ବିରୁଦ୍ଧରେ ମାମଲା ରୁଜୁ କରାଯାଇଥିବାବେଳେ ସେମାନଙ୍କ ଭିତରୁ ୪୯ଜଣଙ୍କୁ କାରାଦଣ୍ଡ ଓ ଲକ୍ଷ୍ମଣ ନାଏକଙ୍କୁ ମୃତ୍ୟୁ ଦଣ୍ଡାଦେଶ ହୋଇଥିଲା । ଏହାଛଡା ମାଥିଲି ଘଟଣାରେ ଗିରଫ ହୋଇଥିବା ବ୍ୟକ୍ତିଙ୍କ ମଧ୍ୟରୁ କେତେକ ଜେଲରେ ଓ ଜେଲ୍ ବାହାରେ ପୁଲିସ୍ ଅତ୍ୟାଚାରରେ ମଧ୍ୟ ମରିଥିଲେ ।
ସୁନ୍ଦରଗଡ ଜିଲ୍ଲାର ଆମ୍କୋ-ସିମ୍କୋ ଗୁଳିକାଣ୍ଡରେ ୪୦ରୁ ଅଧିକ ଆଦିବାସୀ ଜୀବନ ଦେଇଥିଲେ । ସେତେବେଳେ ସେଠାରେ ନିର୍ମଳମୁଣ୍ଡାଙ୍କ ନେତୃତ୍ୱରେ ଆନ୍ଦୋଳନ ଚାଲୁଥିଲା । ସେହିଭଳି ପାଇକ ବିଦ୍ରୋହ ସମୟରେ ଘୁମୁସରର କନ୍ଧମାନେ ସକ୍ରିୟ ଅଂଶଗ୍ରହଣ କରିଥିଲେ । ଏମିତିକି ବନ୍ଦୀ ପାରଳା ଗଜପତିଙ୍କୁ କାରାମୁକ୍ତ କରିବାପାଇଁ ମହାରାଣୀଙ୍କ ନେତୃତ୍ୱରେ ଯେଉଁ ସଂଗ୍ରାମ ହୋଇଥିଲା ସେଥିରେ ବି ଅନେକ ଆଦିବାସୀ ସୈନିକ ସେମାନଙ୍କ ବୀରତ୍ୱର ପରାକାଷ୍ଠା ଦେଖାଇଥିଲେ ।
ଓଡିଶାର ନୀଳଗିରି ଭାରତର ପ୍ରଥମ ଗଡଜାତ ହିସାବରେ ମିଶିଥିଲା । ନୀଳିଗିରି ପ୍ରଜା ଆନ୍ଦୋଳନରେ ଆଦିବାସୀମାନଙ୍କର ସକ୍ରିୟ ଯୋଗଦାନ ରହିଥିଲା । କେନ୍ଦୁଝର, ମୟୁରଭଞ୍ଜ, କଳାହାଣ୍ଡି, ବୌଦ୍ଦ, କନ୍ଧମାଳ, ନୟାଗଡ, ତାଳଚେର, ଢେଙ୍କାନାଳ ଆଦିରେ ମଧ୍ୟ ବହୁ ଆଦିବାସୀ ପ୍ରଜାମଣ୍ଡଳ ଆନ୍ଦୋଳନରେ ସାମିଲ ହୋଇଥିଲେ । ଦୋରା ବିଷୋୟୀ, ଚକରା ବିଷୋୟୀ, ଲୋଚନ ବିଷୋୟୀ, କଷ୍ଟି ଡାକୁଆ, ରେଣ୍ଡୋ ମାଝୀ, ମାଧୋ ସିଂ, ବିର୍ସା ମୁଣ୍ଡା ଆଦିଙ୍କ ବଳିଦାନ ଇତିହାସରେ ଯେଭଳି ସ୍ଥାନିତ ହେବାକଥା ତାହା ଏଯାବତ୍ ହୋଇପାରିନାହିଁ ।
ଏ ସଂକ୍ରାନ୍ତରେ ବାରମ୍ବାର ବିଭିନ୍ନ ମହଲରୁ ଦାବି ହେଉଥିବା ପରିପ୍ରେକ୍ଷୀରେ ରାଜ୍ୟ ସରକାର ସ୍ୱତନ୍ତ୍ର କମିଟି ମାଧ୍ୟମରେ ଓଡିଶାରେ ସ୍ୱାଧୀନତା ସଂଗ୍ରାମର ଇତିହାସ ଏବଂ ସେଥିରେ ଆଦିବାସୀମାନଙ୍କ ଯୋଗଦାନର ବ୍ୟାପକ ତଥ୍ୟ ସଂଗ୍ରହ କରି ଖୁବଶୀଘ୍ର ସେଗୁଡିକୁ ପାଠ୍ୟପୁସ୍ତକରେ ସାମିଲ କରିବେ ବୋଲି ମନ୍ତ୍ରୀ ଶ୍ରୀ ଗଣ୍ଡ ସୂଚନା ଦେଇଛନ୍ତି । (ତଥ୍ୟ)