ଭୁବନେଶ୍ୱର : ରାଜ୍ୟ ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକଙ୍କୁ ଆଜି କାଳିମାଡ ହୋଇଛି । ଶ୍ରୀ ପଟ୍ଟନାୟକ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ତାଙ୍କ ପ୍ରକୋଷ୍ଠରେ ବସିଥିବାବେଳେ କିଛି ଅଜଣା ମୁଖାପିନ୍ଧା ଯୁବକ ତାଙ୍କ ଉପରେ କାଳିମାଡ କରିଛନ୍ତି । କାଳିମାଡରେ ତାଙ୍କ ଜାମାପଟା ପୂରା ଭିଜି ଯାଇଥିବା ଜଣାଯାଇଛି ।
ନିଟ୍ ପରୀକ୍ଷାରେ ହୋଇଥିବା କେଳେଙ୍କାରୀ ବିରୁଦ୍ଧରେ ଆନ୍ଦୋଳନ ପାଇଁ ପ୍ରଦେଶ କଂଗ୍ରେସ କର୍ମକର୍ତ୍ତାମାନେ ପ୍ରସ୍ତୁତ ହେଉଥିବାବେଳେ ଶ୍ରୀ ପଟ୍ଟନାୟକ ତାଙ୍କ ପ୍ରକୋଷ୍ଠରେ ବସିଥିଲେ । ତେବେ ଆନ୍ଦୋଳନ ପାଇଁ ଯିବା ପୂର୍ବରୁ ହଠାତ୍ ଯୁବକମାନେ ଅତର୍କିତ କାଳିମାଡ କରିଥିଲେ । କାଳିମାଡ ପରେ ଶ୍ରୀ ପଟ୍ଟନାୟକ କାଳିଲଗା ଜାମା ପିନ୍ଧି କର୍ମକର୍ତ୍ତାମାନଙ୍କ ସହିତ ଧାରାଣାସ୍ଥଳକୁ ଯାଇଥିବା ଦେଖିବାକୁ ମିଳିଥିଲା ।
ତେବେ ଏଭଳି କାଣ୍ଡ ସଂକ୍ରାନ୍ତରେ ଶ୍ରୀ ପଟ୍ଟନାୟକ କହିଛନ୍ତି ଯେ ରାଜଧାନୀରେ ଏଭଳି ଘଟିଥାଏ । କେତେବେଳେ ଫୁଲମାଳ ତ ଆଉ କେତେବେଳେ ଜୋତାମାଳ ପିନ୍ଧିବାକୁ ପଡେ । ସେ ଛାତ୍ର ଜୀବନରୁ ରାଜନୀତି କରୁଛନ୍ତି । ରାଜନୀତିରେ ତାଙ୍କର ୪୦ବର୍ଷ ବିତିଲାଣି । ପୂର୍ବରୁ ମଧ୍ୟ ପ୍ରଦେଶ କଂଗ୍ରେସ ସଭାପତି ଦାୟିତ୍ୱରେ ଥିବାବେଳେ ଏଭଳି ଅଘଟଣ ଘଟିଥିଲା । ଏଥିରେ ସେ ଦବିଯିବାର ଲୋକ ନୁହନ୍ତି ।