ଯାଜପୁର : ଯାଜପୁର ଜିଲ୍ଲାରୁ କିଛି ସନ୍ଦିଗ୍ଧ ଦେଶବିରୋଧୀ ତତ୍ତ୍ୱଙ୍କ ସହ ଲିଙ୍କ୍ ଥିବା ଜଣେ କାଶ୍ମୀର ଠକକୁ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସଟିଏଫ୍) ଗିରଫ କରିଛି।
ଗିରଫ ଅଭିଯୁକ୍ତ ଜଣକ ହେଲେ ୩୭ ବର୍ଷିୟ ସୟଦ ଇଶାନ ବୁଖାରୀ ଓରଫ ଇଶାନ ବୁଖାରୀ ଓରଫ ଡାକ୍ତର ଇଶାନ ବୁଖାରୀ ।
ଗତକାଲି ଯାଜପୁର ଜିଲ୍ଲା ନେଉଳପୁର ଅଞ୍ଚଳରେ ଚଢ଼ଉ କରି ଏସ୍ ଟିଏଫ୍ ର ଏକ ସ୍ବତନ୍ତ୍ର ଟିମ୍ ସୟଦ ବୁଖାରୀଙ୍କୁ ଗିରଫ କରିଥିବା ଏସ୍ ଟିଏଫ୍ ଆଇଜି ଜୟ ନାରାୟଣ ପଙ୍କଜ ସୂଚନା ଦେଇଛନ୍ତି।
ଶ୍ରୀ ପଙ୍କଜ କହିଛନ୍ତି ଯେ ଅଭିଯୁକ୍ତକୁ କାଶ୍ମୀର ପୋଲିସ ଏକ ଠକେଇ ଏବଂ ଜାଲିଆତି ମାମଲାରେ ଖୋଜୁଛି ଏବଂ ତାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ବିଚାରାଧୀନ ଅଛି ।
ସେ କେରଳର ସନ୍ଦିଗ୍ଧ ବ୍ୟକ୍ତି ଏବଂ କିଛି ପାକିସ୍ତାନୀ ନାଗରିକଙ୍କ ସହ ଯୋଗାଯୋଗରେ ଥିବା ମଧ୍ୟ ଜଣାପଡ଼ିଥିଲା।
ଆଇଜିପି ଆହୁରି ମଧ୍ୟ କହିଛନ୍ତି ଯେ ଅଭିଯୁକ୍ତକୁ କାଶ୍ମୀର ପୋଲିସ ଏକ ଠକେଇ ଏବଂ ଜାଲିଆତି ମାମଲାରେ ଖୋଜୁଛି ଏବଂ ତାଙ୍କ ବିରୋଧରେ ଗୋଟିଏ ଜାମିନଯୋଗ୍ୟ ୱାରେଣ୍ଟ (ଏନବିଡବ୍ଲୁ) ବିଚାରାଧୀନ ଅଛି।
ପଞ୍ଜାବ ସହ ମଧ୍ୟ ତାଙ୍କର କିଛି ସମ୍ପର୍କ ରହିଛି। ଅଭିଯୁକ୍ତ କିମ୍ବା ତାଙ୍କ ବାପାଙ୍କ ବିରୋଧରେ ମାମଲା ବିଚାରାଧୀନ ରହିଛି। ଅଧିକ ତଦନ୍ତ ପରେ ସବିଶେଷ ତଥ୍ୟ ଜଣାପଡ଼ିବ ବୋଲି ଶ୍ରୀ ପଙ୍କଜ ଗଣମାଧ୍ୟମକୁ କହିଛନ୍ତି।
ତଦନ୍ତ ବେଳେ ଏସ୍ ଟିଏଫ୍ ଜାଣିବାକୁ ପାଇଥିଲା ଯେ ଅଭିଯୁକ୍ତ କଶ୍ମୀର, ୟୁପି, ମହାରାଷ୍ଟ୍ର ଓ ଓଡ଼ିଶା ସମେତ ଭାରତର ବିଭିନ୍ନ ଅଞ୍ଚଳର ୬-୭ ଜଣ ଯୁବତୀଙ୍କୁ ବିବାହ କରିଥିଲେ। ସେ ବିଭିନ୍ନ ୱେବସାଇଟ୍ / ଆପ୍ ରେ ମଧ୍ୟ ସକ୍ରିୟ ଥିଲେ ଏବଂ ଅନ୍ତର୍ଜାତୀୟ ଡିଗ୍ରୀଧାରୀ ଡାକ୍ତର ଭାବରେ ପରିଚୟ ଦେଇ ଅନେକ ଝିଅଙ୍କ ସହିତ ରୋମାଣ୍ଟିକ ସମ୍ପର୍କରେ ଥିଲେ ।
ଚଢ଼ାଉ ସମୟରେ ୧୦୦ରୁ ଅଧିକ କାଗଜପତ୍ର ସମେତ ଅନେକ ଆପତ୍ତିଜନକ ସାମଗ୍ରୀ ଜବତ ହୋଇଛି। ଅଭିଯୁକ୍ତ ଜଣକ ଜଣେ ନ୍ୟୁରୋ ସ୍ପେଶାଲିଷ୍ଟ ଡାକ୍ତର, ଜଣେ ଆର୍ମି ଡାକ୍ତର, ପିଏମଓର ଜଣେ ଅଧିକାରୀ, ଏନଆଇଏର କିଛି ଉଚ୍ଚ ପଦସ୍ଥ ଅଧିକାରୀଙ୍କ ଘନିଷ୍ଠ ସହଯୋଗୀ ବୋଲି ଜଣାପଡିଛି ।
ଆମେରିକାର କର୍ନେଲ ୟୁନିଭର୍ସିଟି, କାନାଡିଆନ୍ ହେଲ୍ଥ ସର୍ଭିସେସ୍ ଇନଷ୍ଟିଚ୍ୟୁଟ୍, ଖ୍ରୀଷ୍ଟିଆନ୍ ମେଡିକାଲ କଲେଜ ଭେଲୋର ଇତ୍ୟାଦି ଦ୍ୱାରା ଜାରି କରାଯାଇଥିବା ମେଡିକାଲ ଡିଗ୍ରୀ ସାର୍ଟିଫିକେଟ୍ ଭଳି ଅନେକ ନକଲି କାଗଜପତ୍ର ଜବତ କରାଯାଇଛି।
ଏଥିସହ କିଛି ଖାଲି କାଗଜପତ୍ର, ସତ୍ୟପାଠ, ବଣ୍ଡ, ଅନେକ ପରିଚୟପତ୍ର, ଏଟିଏମ୍ କାର୍ଡ, ଖାଲି ଚେକ୍, ଆଧାର କାର୍ଡ, ଭିଜିଟିଂ କାର୍ଡ ଆଦି ଜବତ କରାଯାଇଛି।