ଭୁବନେଶ୍ୱର : ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା (ବିଏସକେୱାଇ)ରେ ବଡ ଘୋଟାଲା ପଦାକୁ ଆସିବା ଏବଂ ଏହି ଅଭିଯୋଗରେ କଟକର ଗୋଟିଏ ଡାକ୍ତରଖାନା କଳାତାଲିକାଭୁକ୍ତ ହେବା ସହିତ କିଛି ଲୋକ ଗିରଫ ହେବାପରେ ଏବେ ସ୍ୱାସ୍ଥ୍ୟ ବିଭାଗ ତତ୍ପର ହୋଇ ଉଠିଛି । ଆଗାମୀ ଦିନରେ ବିଏସକେୱାଇ ସଚେତନତା କାର୍ଯ୍ୟକୁ ଜୋରଦାର ପାଇଁ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଶାସନ ସଚିବ ଶାଳିନୀ ପଣ୍ଡିତ ନିର୍ଦ୍ଦେଶ ଦେଇଛନ୍ତି ।
ଆଜି ଶ୍ରୀମତୀ ପଣ୍ଡିତ ବିଏସକେୱାଇ ସେଲ୍ କାର୍ଯ୍ୟର ସମୀକ୍ଷା କରିବା ଅବସରରେ କର୍ତ୍ତୃପକ୍ଷଙ୍କୁ ଏଭଳି ନିର୍ଦ୍ଦେଶ ଦେଇଛନ୍ତି । ସେ କହିଛନ୍ତି ଯେ ଲୋକଙ୍କଠାରୁ ମିଳିଥିବା ମତାମତ ଆଧାରରେ ମୋ ସରକାର ବ୍ୟବସ୍ଥାରେ ଶତ ପ୍ରତିଶତ ଅନୁପାଳନ ନିଶ୍ଚିତ କରିବାକୁ କୁହାଯାଇଥିଲା । ଏଥିପାଇଁ ଟୋଲ୍ ଫ୍ରି ନମ୍ବର ୧୦୪ (କଲ୍ ସେଣ୍ଟର୍) ଏବଂ ୧୫୫୩୬୯ (କାର୍ଡ ସମ୍ବନ୍ଧୀୟ) ମାଧ୍ୟମରେ ଗ୍ରହଣ କରାଯାଇଥିବା ଅଭିଯୋଗର ସମାଧାନ ପାଇଁ ଅଧ୍ୟକ୍ଷ ମଧ୍ୟ ଗୁରୁତ୍ୱାରୋପ କରିଥିଲେ ।
ସମୀକ୍ଷାରୁ ଜଣାଯାଇଛି ଯେ ସୋସିଆଲ ମିଡିଆ ସମେତ ବିଭିନ୍ନ ୱିଣ୍ଡୋ ମାଧ୍ୟମରେ ଗ୍ରହଣ କରାଯାଇଥିବା ୯୫ ପ୍ରତିଶତରୁ ଅଧିକ ଅଭିଯୋଗ ଉପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ବୈଠକରେ ବିଏସକେୱାଇ ପ୍ରଦର୍ଶନ ଅନୁଯାୟୀ ରାଜ୍ୟ ଭିତରେ ଓ ବାହାରେ ଥିବା ଡାକ୍ତରଖାନାଗୁଡ଼ିକର ରାଙ୍କିଙ୍ଗ୍ ଏବଂ ମାନଦଣ୍ଡ ଉପରେ ବିଚାରବିମର୍ଶ କରାଯାଇଥିଲା । ଅନ୍ୟ ସେବା-କୈନ୍ଦ୍ରିକ ସହଯୋଗୀ ମାନଦଣ୍ଡ ସହିତ ରାକିଂର ମୁଖ୍ୟ ମାନଦଣ୍ଡ ଭାବରେ ରୋଗୀଙ୍କ ସନ୍ତୁଷ୍ଟି ସ୍ତରକୁ ନେବାକୁ ନିଷ୍ପତ୍ତି ନିଆଯାଇଥିଲା ।
ରୋଗୀମାନଙ୍କ ସୁବିଧା ପାଇଁ ଡାକ୍ତରଖାନାର ପ୍ରମୁଖ ସ୍ଥାନରେ ସୂଚନା ଚିହ୍ନ ଲଗାଇବା ଉପରେ ଅଧ୍ୟକ୍ଷ ମଧ୍ୟ ଗୁରୁତ୍ୱାରୋପ କରିଥିଲେ । ଇଣ୍ଟରନେଟ୍ ସଂଯୋଗର ଗତି, ଓସୱାସ କାର୍ଯ୍ୟକ୍ଷମତା, ମାନବ ସମ୍ବଳକୁ ମଜବୁତ କରିବା ଏବଂ ବିଏସକେୱାଇ ସଫ୍ଟୱେୟାରର ଉନ୍ନତି ସମ୍ବନ୍ଧୀୟ କାର୍ଯ୍ୟକାରିତା ଉପରେ ଆଲୋଚନା କରାଯାଇଥିଲା । ସମସ୍ୟାର ସମାଧାନ ସହିତ ଅଧ୍ୟକ୍ଷ ବିଭିନ୍ନ କାର୍ଯ୍ୟ ସମାପ୍ତ କରିବା ପାଇଁ ସମୟସୀମା ସ୍ଥିର କରିଥିଲେ ।
ଏହି ସମୀକ୍ଷା ବୈଠକରେ ମୁଖ୍ୟ କାର୍ଯ୍ୟର୍ନିବାହୀ ଅଧିକାରୀ ବୃନ୍ଦା ଡି ଯୁଗ୍ମ ସିଇଓ ଶ୍ରୀ ଶୁଭାନନ୍ଦ ମହାପାତ୍ର, ବିଭିନ୍ନ ତାଲିକାଭୁକ୍ତ ହସ୍ପିଟାଲର ଦାୟିତ୍ୱରେ ଥିବା ନୋଡାଲ୍ ଅଧିକାରୀ ଓ ବରିଷ୍ଠ ଅଧଫିସରମାନେ ଅଂଶଗ୍ରହଣ କରିଥିଲେ ।