ଭୁବନେଶ୍ୱର : ଆଇନ୍ ଅଦାଲତଙ୍କ ନିର୍ଦ୍ଦେଶକୁ ଠିକଣା ଭାବେ ପ୍ରତିପାଳନ କରାଯାଉନଥିବା ଘେନି ଓଡିଶା ହାଇକୋର୍ଟ ଅସନ୍ତୋଷ ବ୍ୟକ୍ତ କରି ଦୁଇଜଣ ବରିଷ୍ଠ ଅଧିକାରୀଙ୍କୁ ବ୍ୟକ୍ତିଗତ ଭାବେ କୋର୍ଟରେ ହାଜର ହେବାପାଇଁ ଆଦେଶ ଦେଇଛନ୍ତି । ଏହି ପ୍ରସଙ୍ଗକୁ ଘେନି ଏବେ ସରକାରୀ ସ୍ତରରେ ହଇଚଇ ସୃଷ୍ଟି ହୋଇଛି ।
ଅନୁକମ୍ପାମୂଳକ ନିଯୁକ୍ତି ପ୍ରସଙ୍ଗରେ ଓଡିଶା ହାଇକୋର୍ଟଙ୍କ ରାୟର ଅନୁପାଳନ କରିବା ପରିବର୍ତ୍ତେ ପୁରୀ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଏକ ନିର୍ଦ୍ଦେଶନାମାରେ ଓଲଟା କାର୍ଯ୍ୟାନୁଷ୍ଠାନ କରିଥିବା ଘେନି ଗୁରୁତର ଅଭିଯୋଗ ଆସିଛି । ବଞ୍ଚିତ ପ୍ରାର୍ଥୀଙ୍କୁ ରାୟ ମୁତାବକ ନିଯୁକ୍ତି ଦେବାପାଇଁ ବିଚାର କରିବା ପରିବର୍ତ୍ତେ ପୁରୀ ସିଡିଏମଓ ଆପିଲେଟ ଅଥରିଟୀ ଭଳି ବ୍ୟବହାର ପ୍ରଦର୍ଶନ କରି ନିଯୁକ୍ତି ଦିଆଯାଇ ପାରିବନାହିଁ ବୋଲି ରୋକଠୋକ୍ ଭାବେ ଶୁଣାଇ ଦେଇଛନ୍ତି । ରାଜ୍ୟ ସରକାରଙ୍କ ଯେଉଁ ଆଇନ୍ ଓ ନିର୍ଦ୍ଦେଶକୁ ଅଦାଲତ ଖାରଜ କରିଦେଇଥିଲେ ସିଡିଏମଓ ତାହାକୁ ପୁର୍ନବାର ଦୋହରାଇଛନ୍ତି । ଏ ପରିପ୍ରେକ୍ଷୀରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଆସନ୍ତା ଏପ୍ରିଲ ୪ତାରିଖରେ ବ୍ୟକ୍ତିଗତ ଭାବେ ଉପସ୍ଥିତ ହେବାପାଇଁ ହାଇକୋର୍ଟ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ।
ସେହିପରି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଏକ ନିଯୁକ୍ତି ମାମଲାରେ କୋର୍ଟଙ୍କ ରାୟକୁ ଅକ୍ଷରେ ଅକ୍ଷରେ ପ୍ରତିପାଳନ କରିନଥିବାରୁ ଅଦାଲତ ମଧ୍ୟ ଅସନ୍ତୋଷ ବ୍ୟକ୍ତି କରି ତାଙ୍କୁ ଏପ୍ରିଲ ୪ତାରିଖରେ ବ୍ୟକ୍ତିଗତ ଭାବେ କୋର୍ଟରେ ଉପସ୍ଥିତ ରହିବାପାଇଁ ଆଦେଶ ଦେଇଛନ୍ତି । ସରକାରୀ ଅଧିକାରୀମାନେ ଆଇନ୍ ଅଦାଲତର ରାୟକୁ ସମ୍ମାନ ଦେବା ପରିବର୍ତ୍ତେ କେତେକ କ୍ଷେତ୍ରରେ ନିଜକୁ ଆପିଲେଟ୍ ଅଥରିଟୀ ଭାବେ ଧରିନେଉଥିବାରୁ ଆଇନ୍ ପ୍ରତି ସେମାନଙ୍କର ଅବମାନନା ଭାବ ବଢି ଚାଲୁଛି ।
ସ୍ୱାସ୍ଥ୍ୟ ବିଭାଗ ଅନ୍ୟଏକ ମାମଲାରେ ଜଣେ ଅବସରପ୍ରାପ୍ତ ଅର୍କମଣ୍ୟା ବୃଦ୍ଧା କର୍ମଚାରୀଙ୍କୁ ନିୟମିତ ପେନ୍ସନ ସହ ତାଙ୍କର ବେତନ ନିର୍ଦ୍ଧାରଣ ଓ ଛୁଟି ମଞ୍ଜୁରୀ ଆଦି କାର୍ଯ୍ୟ କରିବାରେ ଅହେତୁକ ବିଳମ୍ବ କରୁଥିବା ପରିପ୍ରେକ୍ଷୀରେ ବିଭାଗୀୟ ଶାସନ ସଚିବ ଏହା ଉପରେ ତ୍ୱରିତ କାର୍ଯ୍ୟାନୁଷ୍ଠାନ କରିବାପାଇଁ ହାଇକୋର୍ଟ ନିର୍ଦ୍ଦେଶ ଦେଇଥିଲେ । ନିର୍ଦ୍ଧାରିତ ସମୟସୀମା ମଧ୍ୟରେ ଏହାର ଅନୁପାଳନ କରାଯାଇନଥିବାରୁ ଅବସର ଗ୍ରହଣର ୧୦ବର୍ଷ ପରେ ସମ୍ପୃକ୍ତ ଭିନ୍ନକ୍ଷମ ମହିଳା ଜଣଙ୍କ ହାଇକୋର୍ଟରେ ଏକ ଅଦାଲତ ଅବମାନନା ମାମଲା ରୁଜୁ କରିଥିଲେ । ଏ ସଂକ୍ରାନ୍ତରେ ହାଇକୋର୍ଟ ଆଉ ଅଧିକ ଦୁଇମାସ ସମୟ ଦେଇଥିଲେ ମଧ୍ୟ ଏଯାବତ୍ ତାଙ୍କ ସମସ୍ୟାର ପୂର୍ଣ୍ଣ ସମାଧାନ ହୋଇପାରି ନଥିବାରୁ ସ୍ୱାସ୍ଥ୍ୟ ବିଭାଗ ପାଇଁ ଅଡୁଆ ବଢିପାରେ ।
ସେହିପରି ଏକ ଓଏଏସ୍ ନିଯୁକ୍ତି ମାମଲାରେ ୨୦୨୩ ମସିହାରେ ଓଡିଶା ହାଇକୋର୍ଟ ଦେଇଥିବା ରାୟର କିଛି ଅଂଶ ଅନୁପାଳନ କରାଯାଇ ବହୁ ବିଳମ୍ବରେ ଯୋଗ୍ୟ ପ୍ରାର୍ଥୀଙ୍କୁ ସରକାର ନିଯୁକ୍ତି ଦେଇଛନ୍ତି । ରାୟର ନିର୍ଦ୍ଦେଶ ମୁତାବକ ଏଡି ପ୍ରାର୍ଥୀଙ୍କୁ ୫ବର୍ଷର ବେତନ ପରିବର୍ତ୍ତେ ମାତ୍ର ୧ଲକ୍ଷ ଟଙ୍କାର କ୍ଷତିପୂରଣ ଦେବାକୁ କୁହାଯାଇଥିଲା । ଏ ସଂକ୍ରାନ୍ତରେ ସାଧାରଣ ପ୍ରଶାସନ ବିଭାଗ ଓଡିଶା ଲୋକସେବା ଆୟୋଗଙ୍କୁ ଚିଠିଟିଏ ଲେଖିଦେଇ ଚୁପ୍ ବସିଛନ୍ତି ।
ସେହିଭଳି ଉକ୍ତ ବଞ୍ଚିତ ପ୍ରାର୍ଥୀଙ୍କ ନିଯୁକ୍ତିପତ୍ରରେ ହାଇକୋର୍ଟଙ୍କ ରାୟ ମୁତାବକ ତାଙ୍କ ବରିଷ୍ଠତା ଯୋଗ୍ୟତା ଆଧାରରେ ନିର୍ଦ୍ଧାରଣ କରାଯିବା ସହିତ ତାଙ୍କ କନିଷ୍ଠ ଯେଉଁ ହାରରେ ଇନକ୍ରିମେଣ୍ଟ ସହ ବର୍ଦ୍ଧିତ ବେତନ ପାଉଛନ୍ତି ଉକ୍ତ ପ୍ରାର୍ଥୀଙ୍କୁ ସେହି ହାରରେ ବେତନ ଦେବାପାଇଁ ଉଲ୍ଲେଖ ରହିଥିଲା । ଆଇନ୍, ଅର୍ଥ, ସାଧାରଣ ପ୍ରଶାସନ ଓ ରାଜସ୍ୱ ବିଭାଗ ରାୟର ପୂର୍ଣ୍ଣ ଅନୁପାଳନ ପାଇଁ ମତ ଦେଇଥିବାବେଳେ ସାଧାରଣ ପ୍ରଶାସନ ବିଭାଗର ଚିଠି ସତ୍ୱେ ଏଯାବତ୍ ସମ୍ପୃକ୍ତ କର୍ତ୍ତୃପକ୍ଷ ଏହାର ଅନୁପାଳନ କରୁନାହାନ୍ତି । ଏ ସଂକ୍ରାନ୍ତରେ ବିଭାଗୀୟ କର୍ତ୍ତୃପକ୍ଷଙ୍କ ପାଇଁ ଅଡୁଆ ବଢିପାରେ ବୋଲି ବିଧି ବିଶେଷଜ୍ଞ ଓ ଅଧିକାରୀମାନେ ଆଶଙ୍କାବ୍ୟକ୍ତ କରୁଛନ୍ତି ।