ଭୁବନେଶ୍ୱର : ୨୦୩୬ ମସିହା ସୁଦ୍ଧା ଓଡିଶାକୁ ସମୃଦ୍ଧ କରିବାପାଇଁ ରାଜ୍ୟ ସରକାର ଯେଉଁ ପରିକଳ୍ପନା କରିଛନ୍ତି ତାହାର ସଫଳ ରୂପାୟନ ଲାଗି ପ୍ରାଥମିକ ବିଦ୍ୟାଳୟରୁ ବିଶ୍ୱବିଦ୍ୟାଳୟ ସ୍ତର ପର୍ଯ୍ୟନ୍ତ ଶିକ୍ଷା କ୍ଷେତ୍ରରେ କ୍ରାନ୍ତି ଆଣିବାଲାଗି ଉତ୍କଳଦିବସ ପାଳନ ଅବସରରେ ବିଭିନ୍ନ ସଂଗଠନ ମତବ୍ୟକ୍ତ କରିଛନ୍ତି ।
ପ୍ରାଥମିକ, ଉଚ୍ଚପ୍ରାଥମିକ ଓ ଉଚ୍ଚମାଧ୍ୟବିକ ବିଦ୍ୟାଳୟ ସ୍ତରରେ ଲାଗି ରହିଥିବା ଶିକ୍ଷକ ମରୁଡି ଯୋଗୁଁ ଓଡିଶାରେ ସରକାରୀ ବିଦ୍ୟାଳୟଗୁଡିକରେ ଶିକ୍ଷା ବ୍ୟବସ୍ଥାର ଅବନତି ଘଟୁଥିବାବେଳେ ଇଂରାଜୀମାଧ୍ୟମ ବେସରକାରୀ ବିଦ୍ୟାଳୟଗୁଡିକର ସଂଖ୍ୟା ବୃଦ୍ଧି ଯୋଗୁଁ ପିଲାମାନଙ୍କ ଭିତରେ ଓଡିଆ ଭାଷା ଦୁର୍ବଳ ହୋଇପଡୁଛି । ସରକାରୀ ରିପୋର୍ଟ ମୁତାବକ ଅଷ୍ଟମଶ୍ରେଣୀରେ ପଢୁଥିବା ଛାତ୍ରଛାତ୍ରୀଙ୍କ ମଧ୍ୟରୁ ଅଧିକାଂଶ ୫ମ, ୬ଷ୍ଠ ଶ୍ରେଣୀର ଓଡିଆ ବହି ଠିକଣା ଭାବେ ପଢିପାରୁ ନାହାନ୍ତି କିମ୍ବା ଏହାର ଗୋଟିଏ ଦୁଇଟି ଅନୁଚ୍ଛେଦ ମଧ୍ୟ ନିର୍ଭୁଲ ଭାବେ ଲେଖିପାରୁ ନାହାନ୍ତି ।
ହିନ୍ଦୀ ଓ ସଂସ୍କୃତ ପଢାଇବାପାଇଁ ସମ୍ପୃକ୍ତ ବିଷୟରେ ସ୍ୱତନ୍ତ୍ର ଯୋଗ୍ୟତା ହାସଲ କରିଥିବା ବ୍ୟକ୍ତିଙ୍କୁ ଶିକ୍ଷକ ଭାବେ ଚୟନ କରାଯାଇଥାଏ । କିନ୍ତୁ ପ୍ରାଥମିକ ବିଦ୍ୟାଳୟରୁ ହାଇସ୍କୁଲ ପର୍ଯ୍ୟନ୍ତ ଓଡିଆ, ଭାଷା, ସାହିତ୍ୟ ପଢାଇବା ଦାୟିତ୍ୱ ଯେଉଁମାନଙ୍କ ଉପରେ ରହୁଛି ସେମାନଙ୍କ ଲାଗି ଓଡିଆ ଭାଷାର ନିର୍ଦ୍ଦିଷ୍ଟ ଶିକ୍ଷାଗତ ଯୋଗ୍ୟତା ରଖାଯାଇନାହିଁ । ଇଂରାଜୀ ସାହିତ୍ୟକ୍ଷେତ୍ରରେ ବି ଅନୁରୂପ ସମସ୍ୟା ରହିଛି । ଫଳରେ ଓଡିଶାର ସରକାରୀ ବିଦ୍ୟାଳୟଗୁଡିକରେ ବହୁ ଛାତ୍ରଛାତ୍ରୀଙ୍କ ଉଭୟ ଓଡିଆ ଓ ଇଂରାଜୀର ଜ୍ଞାନ ଉତ୍କୃଷ୍ଟମାନର ହୋଇପାରୁନାହିଁ ।
ଏହି ସମସ୍ୟାକୁ ଆଖିଆଗରେ ରଖି ପ୍ରାଥମିକ ବିଦ୍ୟାଳୟରୁ ହାଇସ୍କୁଲ ପର୍ଯ୍ୟନ୍ତ ଯେତେସବୁ ଶିକ୍ଷକ ଓ ପ୍ରଧାନଶିକ୍ଷକ ପଦବୀ ଖାଲି ପଡିଛି ତାହାକୁ ତୁରନ୍ତ ପୂରଣ କରି ପ୍ରଥମରୁ ଦଶମଶ୍ରେଣୀ ପର୍ଯ୍ୟନ୍ତ ଓଡିଶାର ପିଲାମାନଙ୍କର ଓଡିଆ ଭାଷା ଜ୍ଞାନ ଯେଭଳି ସମୃଦ୍ଧ ହେବ ସେ ସଂକ୍ରାନ୍ତରେ ଓଡିଶା ସରକାର ସ୍ୱତନ୍ତ୍ର ଯୋଜନା ପ୍ରଣୟନ କରିବାକୁ ଉଭୟ ଶିକ୍ଷକ ଓ ଅଭିଭାବକ ମହଲରୁ ଦାବି ହେଉଛି ।
କେବଳ ସେତିକି ନୁହେଁ, ଯୁକ୍ତ ଦୁଇ, ଡିଗ୍ରୀ କଲେଜ ଓ ବିଶ୍ୱବିଦ୍ୟାଳୟଗୁଡିକରେ ମଧ୍ୟ ଶିକ୍ଷକ ମରୁଡି ଅବସ୍ଥା ଉତ୍କଟତର ସ୍ଥିତିରେ ରହିଛି । ଉଚ୍ଚଶିକ୍ଷା ବିଭାଗ ଅଧିନରେ ଥିବା ରାଜ୍ୟର ସରକାରୀ ବିଶ୍ୱବିଦ୍ୟାଳୟଗୁଡିକରେ ପାଖପାଖି ୬୦ ପ୍ରତିଶତ ପଦବୀ ଖାଲି ପଡିଛି । ଉତ୍କଳ ବିଶ୍ୱବିଦ୍ୟାଳୟ ଭଳି ରାଜ୍ୟର ସର୍ବପୁରାତନ ବିଶ୍ୱବିଦ୍ୟାଳୟ ମାତ୍ର ୯ଜଣ ପ୍ରଫେସରରେ ଚାଲୁଛି । ପ୍ରାୟ ସବୁ ସରକାରୀ ବିଶ୍ୱବିଦ୍ୟାଳୟରେ ଓଡିଆ ଭାଷା ସାହିତ୍ୟ ବିଭାଗ ଏବେ ଅତି ଦୟନୀୟ ଅବସ୍ଥାରେ ରହିଛି । ଫଳରେ ଉଚ୍ଚଶିକ୍ଷା କ୍ଷେତ୍ରରେ ଅଧ୍ୟାପନା ଓ ଗବେଷଣା କାର୍ଯ୍ୟ ମଧ୍ୟ ବ୍ୟାହତ ହେଉଛି ।
ପ୍ରାଥମିକ ବିଦ୍ୟାଳୟରୁ ବିଶ୍ୱବିଦ୍ୟାଳୟ ପର୍ଯ୍ୟନ୍ତ ବର୍ଷ ବର୍ଷ ଧରି ପାଖପାଖି ଲକ୍ଷେ ପଦବୀ ଖାଲି ପଡିଥିବା ପରିପ୍ରେକ୍ଷୀରେ ଶିକ୍ଷା ବ୍ୟବସ୍ଥା ଦୁର୍ବଳ ହୋଇପଡୁଛି । ଏ ପରିପ୍ରେକ୍ଷୀରେ ସ୍ୱତନ୍ତ୍ର ଓଡିଶା ପ୍ରଦେଶ ଗଠନର ୧୦୦ବର୍ଷ ପୂର୍ତ୍ତି ୨୦୩୬ ମସିହାରେ ହେବାକୁ ଯାଉଥିବାବେଳେ ଓଡିଶାକୁ ସମୃଦ୍ଧ କରିବାପାଇଁ ରାଜ୍ୟ ସରକାର ଯେଉଁ ଘୋଷଣା କରୁଛନ୍ତି ଏବେ ଠାରୁ ଶିକ୍ଷା ବ୍ୟବସ୍ଥାରେ ସୁଧାର ଆଣିବାପାଇଁ ଉଦ୍ୟମ କଲେ ଅନ୍ତତଃପକ୍ଷେ ୧୧ବର୍ଷ ଭିତରେ ଓଡିଶାରେ ଓଡିଆ ଭାଷା ସାହିତ୍ୟ ଶିକ୍ଷା ସ୍ଥିତିରେ ଉନ୍ନତି ଆସିପାରିବ ବୋଲି ଶିକ୍ଷାବିତମାନେ ଆଶାବ୍ୟକ୍ତ କରୁଛନ୍ତି । ଆସନ୍ତା ଗ୍ରୀଷ୍ମାବକାଶ ପୂର୍ବରୁ ସବୁ ସ୍ତରରେ ଶିକ୍ଷକ ନିଯୁକ୍ତି ଦିଆଯାଇ ପାରିଲେ ବ୍ୟବସ୍ଥାରେ ସୁଧାର ଆସିପାରିବ ବୋଲି ଆଶା କରାଯାଉଛି । (ତଥ୍ୟ)