ଭୁବନେଶ୍ୱର : ରାଜ୍ୟ ରାଜଧାନୀର ଦୁଇଟି ପ୍ରମୁଖ ହାଟକୁ ସ୍ଥାନାନ୍ତରଣ ଯୋଜନା ଏବେ ଶୀତଳଭଣ୍ଡାରରେ । ସହରର ଜନସଂଖ୍ୟା ସହିତ ଗାଡିମୋଟର ବୃଦ୍ଧି ପାଉଥିବାରୁ ସରକାର ହାଟ ସ୍ଥାନାନ୍ତରଣ ଯୋଜନା କରିଥିବାବେଳେ ତାହା କାର୍ଯ୍ୟକାରୀ ହୋଇପାରୁ ନାହିଁ ।
ରାଜଧାନୀର ଏକ ନମ୍ବର ଅଞ୍ଚଳର ରହିଛି ହୋଲସେଲ୍ ପରିବା ହାଟ । ଦୈନିକ ଏଠାରୁ ଶତାଧିକ ଟ୍ରକରେ କଞ୍ଚା ପରିବା ଆସିଥାଏ । ପାଇକାରୀ ବ୍ୟବସାୟ ସହିତ ଏଠାରେ ଦୈନିକ ହାଟ ମଧ୍ୟ ବସିଥାଏ । ବ୍ୟବସାୟର କାୟା ବିସ୍ତାର ଯୋଗୁଁ ହାଟର କଳେବର ବଢିବାରେ ଲାଗିଛି । ଆଖପାଖରେ ଥିବା ସରକାରୀ କ୍ୱାଟର୍ସ ଓ ଖାଲି ସ୍ଥାନକୁ ଏହା ବ୍ୟାପୁଛି । ତେଣୁ ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି ୨୦୨୨ ମସିହାରେ ଏକନମ୍ବରରେ ଥିବା ହୋଲସେଲ ପରିବା ବଜାରକୁ ଭଗବାନପୁରକୁ ଉଠାଇ ଦେବାକୁ ଯୋଜନା ହୋଇଥିଲା । ଭଗବାନପୁର ଠାରେ ମଧ୍ୟ ସ୍ଥାନ ଚିହ୍ନଟ ସହିତ କାର୍ଯ୍ୟ ଆରମ୍ଭ ହୋଇଥିଲା ।
ହେଲେ କୌଣସି କାରଣରୁ ଏବେ ପରିବାହାଟ ସ୍ଥାନାନ୍ତରଣ ଯୋଜନା ଶୀତଳଭଣ୍ଡାରରେ ରହିଗଲାଣି । ଏକ ନମ୍ବର ଅଞ୍ଚଳରେ ସରକାରୀ କ୍ୱାଟର୍ସରେ ରହୁଥିବା ଲୋକଙ୍କ ଠାରୁ ଆରମ୍ଭକରି ବ୍ୟାଙ୍କ୍, ହାଇସ୍କୁଲ, ମହିଳା କଲେଜ ସମେତ ଅନ୍ୟାନ୍ୟ ସରକାରୀ ଦପ୍ତରର ଲୋକେ ଟ୍ରାଫିକ ଜାମ୍ରେ ଦୈନିକ ହନ୍ତସନ୍ତ ହେଉଛନ୍ତି । କେବେ ହାଟ ସ୍ଥାନାନ୍ତରିତ ହେବ ତାହାର ଉତ୍ତର କାହା ପାଖରେ ନାହିିଁ ।
ସେହିଭଳି ସହରର ମଧ୍ୟସ୍ଥଳରେ ଚାରି ନମ୍ବର ଅଞ୍ଚଳରେ ରହିଛି ମାଛ ହାଟ । ହୋଲସେଲ୍ ସହିତ ଖୁଚୁରା ମାଛ କାରବାର ଏଠାରେ ହେଉଛି । ଦୈନିକ ଏଠାକୁ ରାଜ୍ୟ ଭିତରୁ ଓ ବାହାରୁ ଟ୍ରକ ଟ୍ରକ ମାଛ ଆସୁଛି । ସେହିଭଳି ଏଠାରୁ ମଧ୍ୟ ଉପକୂଳ ଓଡିଶାର ବିଭିନ୍ନ ସ୍ଥାନକୁ ମାଛ ଯାଉଛି । ହେଲେ ଦିନକୁ ଦିନ ବ୍ୟବସାୟ ବଢୁଥିବାବେଳେ ମାଛ ହାଟର କଳେବର ବୃଦ୍ଧି ପାଇଁ ସ୍ଥାନ ନାହିଁ । ଫଳରେ ଏଠାକୁ ଦୈନିକ ଆସୁଥିବା ଶତାଧିକ ଯାନ ଆଖପାଖର ଗଳିକନ୍ଦିରେ ରହି ଟ୍ରାଫିକ ସମସ୍ୟା ସୃଷ୍ଟି କରୁଛି । ସେହିଭଳି ମାଛ ହାଟର ବର୍ଜ୍ୟ ମଧ୍ୟ ନିକଟରେ ଥିବା ବିଧାୟକ କଲୋନୀ, ପୋଷ୍ଟାଲ ଓ ଟେଲିକମ୍ କଲୋନୀ, ଏଜି କଲୋନୀ, ରିଜର୍ଭବ୍ୟାଙ୍କ୍ କଲୋନୀ ପାଇଁ ସମସ୍ୟା ସୃଷ୍ଟି କରୁଛି ।
ମାଛ ହାଟରୁ ବାହାରୁଥିବା ବର୍ଜ୍ୟ ରାସ୍ତାଘାଟରେ ପଡିବା ଦ୍ୱାରା ସ୍ଥାନୀୟ ଅଞ୍ଚଳ ଦୁର୍ଗନ୍ଧରେ ଫାଟି ପଡୁଛି । ଲୋକେ ପରିବା ହାଟକୁ ନାକରେ ରୁମାଲ ଦେଇ ଆସୁଛନ୍ତି । ମାଛ ବେପାରୀମାନେ ଧିରେ ଧିରେ ହାଟରୁ ବାହାରି ଆଖପାଖ ରାସ୍ତାରେ ବସିଲେଣି ।
ସ୍ଥିତିକୁ ଦେଖି ଦୀର୍ଘଦିନର ଏହି ବୃହତ୍ ହୋଲସେଲ୍ ମାଛ ହାଟକୁ ଅନ୍ୟତ୍ର ସ୍ଥାନାନ୍ତର ପାଇଁ ସ୍ଥିର ହୋଇଥିଲା । ବହୁ ବିଚାର ଆଲୋଚନା ପରେ ଏହା କୁଆଖାଇ ନଦୀପଠାକୁ ଉଠିବ ବୋଲି ବିଏମ୍ସି ବି ସୂଚନା ଦେଇଥିଲା । ଏହି ଯୋଜନାକୁ ଦୀର୍ଘଦିନ ବିତିଥିଲେ ମଧ୍ୟ ପରିବା ହାଟ ସ୍ଥାନାନ୍ତରଣ ଭଳି ତାହା ବି ଶୀତଳଭଣ୍ଡାରରେ ରହିଯାଇଛି ।
ଦୃଢ ଘୋଷଣା ଓ ସମସ୍ତ ପ୍ରକାର ପ୍ରସ୍ତୁତି ସତ୍ୱେ ରାଜଧାନୀର କେନ୍ଦ୍ରସ୍ଥଳରେ ଥିବା ଦୁଇଟି ହୋଲସେଲ୍ ହାଟ କାହିଁକି ସ୍ଥାନାନ୍ତରଣ ହୋଇପାରୁନାହିଁ ତାହା ବଡ ପ୍ରଶ୍ନବାଚୀ ସୃଷ୍ଟି କରିଛି । ତୁରନ୍ତ ଏ ଦିଗରେ ପଦକ୍ଷେପ ନିଆନଗଲେ ସହରବାସୀ କେବଳ ଟ୍ରାଫିକ ସମସ୍ୟାରେ ହଲାପଟା ହେବେନାହିଁ ଆଗାମୀ ଦିନରେ ଗୁରୁତର ପରିବେଶଗତ ସମସ୍ୟା ମଧ୍ୟ ଉପୁଜିବ ବୋଲି ମତପ୍ରକାଶ ପାଉଛି । (ତଥ୍ୟ)