ଭୁବନେଶ୍ୱର : ପ୍ରାଥମିକ ସ୍ତରରେ ଅଧାରୁ ପାଠପଢା ଛାଡୁଥିବା ପିଲାଙ୍କ ସଂଖ୍ୟା ଖୋରଧା ଜିଲ୍ଲାରେ ସର୍ବାଧିକ ଥିବାବେଳେ ମାଧ୍ୟମିକ ସ୍ତରରେ ଏହି ସଂଖ୍ୟା ଗଞ୍ଜାମ ଜିଲ୍ଲାରେ ସର୍ବାଧିକ ରହିଛି । ସମସ୍ତ ପ୍ରକାର ମାଗଣା ଯୋଜନା ସତ୍ୱେ ଛାତ୍ରଛାତ୍ରୀମାନଙ୍କର ଏଭଳି ଅଧାରୁ ପାଠପଢା ଛାଡିବା ଏବେ କର୍ତ୍ତୃପକ୍ଷଙ୍କୁ ଚିନ୍ତାରେ ପକାଇ ଦେଇଛି ।
୨୦୨୪-୨୫ ବର୍ଷରେ ପ୍ରାଥମିକ ସ୍ତରରେ ୨୪୫ ଜଣ ଛାତ୍ରଛାତ୍ରୀ ଅଧାରୁ ପାଠପଢା ଛାଡି ଦେଇଛନ୍ତି । ସେହିଭଳି ମାଧ୍ୟମିକ ସ୍ତରରେ ୯୩୮୭ ଜଣ ଛାତ୍ରଛାତ୍ରୀ ଅଧାରୁ ପାଠପଢା ଛାଡିଥିବା ସରକାରୀ ରେକର୍ଡ କହୁଛି । ଏହି ସୂଚନା ଅନୁଯାୟୀ ପ୍ରାଥମିକ ସ୍ତରରେ ଖୋରଧା ଜିଲ୍ଲାରେ ୧୨୫ଜଣ ଛାତ୍ରଛାତ୍ରୀ ଅଧାରୁ ପାଠ ଛାଡିଛନ୍ତି । ରାୟଗଡା ଜିଲ୍ଲାରେ ଏହି ସଂଖ୍ୟା ୭୪ ଥିବାବେଳେ ସୁନ୍ଦରଗଡରେ ୨୫, କୋରାପୁଟରେ ୧୭, ନୂଆପଡାରେ ୧୦, ସୋନପୁରରେ ୨ ଏବଂ କନ୍ଧମାଳ ଜିଲ୍ଲାରେ ଏହା ମାତ୍ର ୧ ରହିଛି ।
ତେବେ ମାଧ୍ୟମିକ ସ୍ତରରେ ଅନୁଗୁଳ, ବରଗଡ, ଜଗତ୍ସିଂହପୁର, କେନ୍ଦ୍ରାପଡା, ମୟୁରଭଞ୍ଜସୋନପୁର ଓ ସୁନ୍ଦରଗଡ ଜିଲ୍ଲାକୁ ବାଦ୍ ଦେଲେ ଅନ୍ୟ ସମସ୍ତ ଜିଲ୍ଲାରେ ପିଲାମାନେ ଅଧାରୁ ପାଠଛାଡିଛନ୍ତି । ଗଞ୍ଜାମ ଜିଲ୍ଲାରେ ୧୩୨୭ଜଣ ଛାତ୍ରଛାତ୍ରୀ ଅଧାରୁ ପାଠ ଛାଡିଥିବାବେଳେ ନବରଙ୍ଗପୁରରେ ୧୦୫୨ ଏବଂ ବାଳେଶ୍ୱରରେ ଏହି ସଂଖ୍ୟା ୧୦୬୨ ରହିଛି । ବଲାଙ୍ଗିରରେ ୭୨୨, କୋରାପୁଟରେ ୫୭୧, ନୂଆପଡାରେ ୫୪୧, କନ୍ଧମାଳରେ ୩୬୧, ଗଜପତିରେ ୩୩୮ ଜଣ ଛାତ୍ରଛାତ୍ରୀ ଅଧାରୁ ପାଠ ଛାଡିଛନ୍ତି ।
ରାଜ୍ୟ ସରକାର ପ୍ରଥମରୁ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଏକାଧିକ ମାଗଣା ଯୋଜନା କାର୍ଯ୍ୟକାରୀ କରୁଛନ୍ତି । ମଧ୍ୟାହ୍ନ ଭୋଜନ ଠାରୁ ଆରମ୍ଭ କରି ମାଗଣା ପୋଷାକ, ଜୋତା, ବ୍ୟାଗ୍, ବହିପତ୍ର ପ୍ରଦାନ କରାଯାଉଛି । ହାଇସ୍କୁଲ ସ୍ତରରେ ଛାତ୍ରୀମାନଙ୍କୁ ପୋଷାକ ସହିତ ସାଇକେଲ, ପୁସ୍ତକ ଆଦି ଯୋଗାଯାଉଛି । ଅନୁସୂଚିତ ଜନଜାତି ଓ ଜାତି ବର୍ଗର ଛାତ୍ରଛାତ୍ରୀମାନେ ଷ୍ଟାଇପେଣ୍ଡ ବି ପାଉଛନ୍ତି । ସରକାର ମଧ୍ୟାହ୍ନଭୋଜନ ଯୋଜନାକୁ ଇତି ମଧ୍ୟରେ ୧୦ମ ଶ୍ରେଣୀ ପର୍ଯ୍ୟନ୍ତ ବୃଦ୍ଧି କରିଛନ୍ତି ।
ଏହା ସତ୍ୱେ ବି ମାଧ୍ୟମିକ ସ୍ତରରେ ଛାତ୍ରଛାତ୍ରୀମାନେ ଅଧାରୁ ପାଠଛାଡିବା ବିଶେଷକରି ଦଶମ ପରୀକ୍ଷା ପୂର୍ବରୁ ପିଲମାନେ ପାଠ ଛାଡିଦେବା କର୍ତ୍ତୃପକ୍ଷଙ୍କୁ ଚିନ୍ତାରେ ପକାଇ ଦେଇଛି । ଚଳିତବର୍ଷ ମାଟ୍ରିକ ପରୀକ୍ଷାରେ ଅନେକ ଛାତ୍ରଛାତ୍ରୀ ପରୀକ୍ଷାରୁ ଦୂରେଇ ଯାଇଥିବାବେଳେ ଖୋଦ୍ ରାଜଧାନୀରେ ଜଣେ ଛାତ୍ରୀ ବାହାହୋଇ ଚାଲିଯାଇଥିବା କର୍ତ୍ତୃପକ୍ଷଙ୍କ ନଜରକୁ ଆସିଥିଲା । ସେହିଭଳି ପୁଅପିଲାମାନେ ମଧ୍ୟ କମ୍ ବୟସରୁ ରୋଜଗାର ଆଶାରେ ଅଧାରୁ ପାଠ ଛାଡି ଦେଉଛନ୍ତି ।
ଦାଦନ ପ୍ରବଣ ଜିଲ୍ଲାରେ ଅଧାରୁ ପାଠ ଛାଡିବା ସ୍ଥିତି ଉତ୍କଟ ହୋଇଥିବାବେଳେ ଏହାକୁ କିଭଳି ରୋକାଯିବ ତାହା ଏବେ କର୍ତ୍ତୃପକ୍ଷଙ୍କ ପାଇଁ ଚିନ୍ତାର କାରଣ ହୋଇଛି । (ତଥ୍ୟ)