ଭୁବନେଶ୍ୱର : ଓଡିଶାରେ ମହିଳାମାନଙ୍କ ପ୍ରତି ଘଟୁଥିବା ଅପରାଧର ସଂଖ୍ୟା ଗତ ୧୦ବର୍ଷ ମଧ୍ୟରେ ପ୍ରାୟ ୨ଗୁଣ ହୋଇଗଲାଣି । ଏଥିଯୋଗୁଁ ଆଇନ୍ ଅଦାଲତରେ ମାମଲାର ଚାପ ବୃଦ୍ଧି ପାଉଥିବାବେଳେ ମାମଲା ଫଏସଲା ଓ ଦଣ୍ଡବିଧାନ ହାର କିନ୍ତୁ ଢେର କମ୍ ରହୁଛି । ଅନ୍ୟ ପକ୍ଷରେ ନିର୍ଯ୍ୟାତିତା ମହିଳାମାନଙ୍କୁ ଆର୍ଥିକ ସହାୟତା ଦେବାଲାଗି କେନ୍ଦ୍ର ସରକାର ଗଠନ କରିଥିବା ନିର୍ଭୟା ପାଣ୍ଠିରୁ ଓଡିଶାକୁ ବର୍ଷକୁ ଶତାଧିକ କୋଟି ଟଙ୍କା ମିଳୁଛି ।
ଭାରତ ସରକାରଙ୍କ ସ୍ୱରାଷ୍ଟ୍ର ମନ୍ତ୍ରଣାଳୟ ପ୍ରକାଶ କରୁଥିବା କ୍ରାଇମ୍ ଇନ୍ ଇଣ୍ଡିଆ ରିପୋର୍ଟ ମୁତାବକ ୨୦୧୬ ବର୍ଷ ଶେଷସୁଦ୍ଧା ମହିଳାମାନଙ୍କ ପ୍ରତି ଘଟିଥିବା ଅପରାଧିକ ମାମଲାରୁ ୮୨,୩୬୪ ଟି ବିଚାର ପ୍ରତୀକ୍ଷାରେ ଥିଲା । ତେବେ ଏହି ବର୍ଷରେ ମାତ୍ର ୬୩୦୪ଟି ମାମଲା ଫଏସଲା ହୋଇଥିବାବେଳେ ସେଥିରୁ ୩୯୨ଟିରେ ଦଣ୍ଡବିଧାନ କରାଯାଇ ପାରିଥିଲା । କେନ୍ଦ୍ର ସରକାରଙ୍କ ଏହି ତଥ୍ୟ ମୁତାବକ ସେବର୍ଷ ମହିଳାମାନଙ୍କ ପ୍ରତି ଅପରାଧିକ ମାମଲାରେ ଓଡିଶାରେ ଦଣ୍ଡବିଧାନ ହାର ମାତ୍ର ୬.୨ ପ୍ରତିଶତ ଥିବାବେଳେ ଫଏସଲା ହାର ଥିଲା ୭.୭ ପ୍ରତିଶତ ।
୨୦୨୫ ସେପ୍ଟେମ୍ବର ମାସରେ କ୍ରାଇମ୍ ଇନ୍ ଇଣ୍ଡିଆ-୨୦୨୩ ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟର ତଥ୍ୟ ମୁତାବକ ୨୦୨୩ ଶେଷ ସୁଦ୍ଧା ୧,୭୭,୯୪୦ଟି ମହିଳାଙ୍କ ପ୍ରତି ଘଟିଥିବା ଅପରାଧିକ ମାମଲା ବିଚାର ପ୍ରତୀକ୍ଷାରେ ରହିଛି । ଉକ୍ତ ବର୍ଷରେ ଏଭଳି ମାମଲାରେ ଦଣ୍ଡବିଧାନ ହାର ଓଡିଶାରେ ୬.୯ ପ୍ରତିଶତ ଥିବାବେଳେ ଫଏସଲା ହାର ରହିଥିଲା ୫.୩ ପ୍ରତିଶତ ।
ଏଠାରେ ଉଲ୍ଲେଖନୀୟ ଯେ ରାଜଧାନୀ ନୂଆଦିଲ୍ଲୀରେ ଘଟିଥିବା ନିର୍ଭୟା ଗଣବଳାତ୍କାର ଘଟଣା ସାରା ଦେଶରେ ଆଲୋଡନ ସୃଷ୍ଟି କରିଥିବାବେଳେ କେନ୍ଦ୍ର ସରକାର ଅବସରପ୍ରାପ୍ତ ସୁପ୍ରିମକୋର୍ଟ ପ୍ରଧାନ ବିଚାରପତି ଜେ ଏସ୍ ବର୍ମାଙ୍କ ଅଧ୍ୟକ୍ଷତାରେ ଏକ କମିଶନ ବସାଇଥିଲେ । ଏହି କମିଶନ ଦାୟିତ୍ୱର ସହ କାର୍ଯ୍ୟ ର୍ନିବାହ କରି ମାତ୍ର ତିନିମାସ ସମୟ ଭିତରେ ରିପୋର୍ଟ ଦେଇଥିଲେ । ଉକ୍ତ ରିପୋର୍ଟକୁ ଆଧାର କରି ଆଇନ୍ରେ କେତେକ ସଂଶୋଧନ ଅଣାଯିବା ସହ କେନ୍ଦ୍ର ସରକାର ନିର୍ଯ୍ୟାତିତା ମହିଳାଙ୍କୁ ଆର୍ଥିକ ସହାୟତା ଦେବାପାଇଁ ସ୍ୱତନ୍ତ୍ର ଭାବେ ନିର୍ଭୟା ପାଣ୍ଠି ଗଠନ କରିଥିଲେ ।
ସରକାରୀ ତଥ୍ୟ ମୁତାବକ ୨୦୨୪-୨୫ ବର୍ଷ ଶେଷ ସୁଦ୍ଧା ଓଡିଶା ନିର୍ଭୟା ପାଣ୍ଠିରୁ ପାଇଥିବା ଅର୍ଥରୁ ୧୪୦ କୋଟି ଟଙ୍କା ଖର୍ଚ୍ଚ କରିସାରିଛି । ଏହି ପାଣ୍ଠିରୁ ଉତ୍ତରପ୍ରଦେଶ ସର୍ବାଧିକ ୭୦୦ କୋଟି ଟଙ୍କା ପାଇଥିବାବେଳେ ତାହା ପଛକୁ ରହିଛି ଦିଲ୍ଲୀ ।
ଆଇନ୍ରେ ସଂଶୋଧନ ସହିତ ବ୍ୟାପକ ଜନସଚେତନତା ସୃଷ୍ଟି କରାଯାଉଥିଲେ ମଧ୍ୟ ମହିଳାଙ୍କ ପ୍ରତି ଅତ୍ୟାଚାର ଥମୁନାହିଁ । ତେବେ ଅବସରପ୍ରାପ୍ତ ପୁଲିସ୍ ଅଧିକାରୀମାନେ କହୁଛନ୍ତି ଯେ ସଚେତନତା ବୃଦ୍ଧି ପାଉଥିବାରୁ ଅଧିକରୁ ଅଧିକ ସଂଖ୍ୟକ ମହିଳା ଏ ସଂକ୍ରାନ୍ତୀୟ ଅଭିଯୋଗ ଥାନା ଓ ଅଦାଲତରେ ଦରଜ କରୁଛନ୍ତି । ନିର୍ଭୟା ପାଣ୍ଠିରୁ ମିଳୁଥିବା ଅର୍ଥ କେତେକ କ୍ଷେତ୍ରରେ ନିର୍ଯ୍ୟାତିତାମାନଙ୍କୁ ଥଇଥାନ କରିବା କ୍ଷେତ୍ରରେ ସାହାଯ୍ୟ କରୁଛି ।
କେବଳ ଓଡିଶା ନୁହେଁ, ଉତ୍ତରପ୍ରଦେଶ, ପଶ୍ଚିମବଙ୍ଗ ଠାରୁ ଆରମ୍ଭ କରି ଦେଶର ବିଭିନ୍ନ ରାଜ୍ୟରେ ମହିଳାମାନଙ୍କ ପ୍ରତି ଅପରାଧର ସଂଖ୍ୟା ଢେର ଅଧିକ ରହୁଛି । ଗୋଟିଏ ପଟେ ମହିଳାମାନଙ୍କୁ ସଶକ୍ତ କରିବାପାଇଁ ମିଶନ ଶକ୍ତି ଠାରୁ ସୁଭଦ୍ରା ପର୍ଯ୍ୟନ୍ତ ବିଭିନ୍ନ ଯୋଜନା ଚାଲୁଥିବାବେଳେ ସରକାରୀ ଚାକିରି ଏବଂ ପଞ୍ଚାୟତ ଓ ପୌର ନିର୍ବାଚନରେ ମଧ୍ୟ ସେମାନଙ୍କ ଲାଗି ସ୍ୱତନ୍ତ୍ର ସ୍ଥାନ ସଂରକ୍ଷଣ ବ୍ୟବସ୍ଥା ଅଛି । ଇତି ମଧ୍ୟରେ ସମ୍ବିଧାନ ସଂଶୋଧନ କରି ସଂସଦ ଓ ବିଧାନସଭାରେ ମହିଳାମାନଙ୍କ ଲାଗି ଏକ ତୃତୀୟାଂଶ ଆସନ ସଂରକ୍ଷଣ ଆଇନ୍ ପାରିତ ହୋଇଥିଲେ ମଧ୍ୟ ଏହା ଏଯାବତ୍ କାର୍ଯ୍ୟକାରୀ ହୋଇନାହିଁ । ମହିଳମାନଙ୍କ ପାଇଁ ସମ୍ବିଧାନରେ ସମାନତାର ଅଧିକାର ଦିଆଯାଇଥିବାବେଳେ ସେମାନଙ୍କ ପ୍ରତି ଅପରାଧ ବୃଦ୍ଧି ପାଇବା ଯେକୌଣସି ସଭ୍ୟ ସମାଜ ବ୍ୟବସ୍ଥା ପ୍ରତି ଲଜ୍ଜାଜନକ ବୋଲି କୁହାଯାଉଛି । (ତଥ୍ୟ)