ଭୁବନେଶ୍ୱର : ବିଶ୍ୱ ଶିଶୁ ଶ୍ରମ ବିରୋଧୀ ଦିବସ ପାଳନ ପାଳନ ଅବସରରେ ଚଳିତବର୍ଷର ବିଷୟବସ୍ତୁ “ଅଗ୍ରଗତି ସ୍ପଷ୍ଟ, କିନ୍ତୁ ଆହୁରି ଅନେକ କିଛି କରିବାକୁ ଅଛି: ଆସନ୍ତୁ ପ୍ରୟାସକୁ ତ୍ୱରାନ୍ୱିତ କରିବା !” ଆନ୍ତର୍ଜାତୀୟ ଶ୍ରମ ସଂଗଠନ ଏବଂ ୟୁନିସେଫ ଦ୍ୱାରା ଆଜି ପ୍ରକାଶିତ ନୂତନ ଆକଳନ ଅନୁଯାୟୀ, ୨୦୨୪ ମସିହାରେ ପ୍ରାୟ ୧୩୮ ନିୟୁତ ଶିଶୁ ଶିଶୁ ଶ୍ରମରେ ନିୟୋଜିତ ଅଛନ୍ତି, ଯେଉଁଥିରେ ପ୍ରାୟ ୫୪ ନିୟୁତ ବିପଜ୍ଜନକ କାର୍ଯ୍ୟରେ ନିୟୋଜିତ ଅଛନ୍ତି ଯାହା ସେମାନଙ୍କ ସ୍ୱାସ୍ଥ୍ୟ, ସୁରକ୍ଷା କିମ୍ବା ବିକାଶକୁ ବିପଦରେ ପକାଇପାରେ।
ବିଶ୍ୱ ଶିଶୁ ଶ୍ରମ ବିରୋଧୀ ଦିବସସମସ୍ତ ପ୍ରକାରର ଶିଶୁ ଶ୍ରମକୁ ଦୂର କରିବା ଏବଂ ପ୍ରତ୍ୟେକ ଶିଶୁ ପାଇଁ ଶିକ୍ଷା, ସୁରକ୍ଷା ଏବଂ ଶୋଷଣ ମୁକ୍ତ ଜୀବନର ଅଧିକାର ଉପଭୋଗ କରିବା ନିଶ୍ଚିତ କରିବା ପାଇଁ ଏକ ବିଶ୍ୱବ୍ୟାପୀ ଆହ୍ୱାନ। ଏହି ଦିନକୁ ପାଳନ କରିବା ପାଇଁ ପିପୁଲସ୍ କଲଚରାଲ୍ ସେଣ୍ଟର (ପିକକ୍) , ରାଜ୍ଯର ଅନ୍ୟତମ ଅଗ୍ରଣୀ ସ୍ୱେଚ୍ଛାସେବୀ ସଂଗଠନ, ରାଜ୍ୟର ବିଭିନ୍ନ ଜିଲ୍ଲା ଯଥା ଖୋର୍ଦ୍ଧା, ବାଲେଶ୍ୱର, କେଉଁଝର, କଟକ ଏବଂ କେନ୍ଦ୍ରାପଡା ସମେତ ଓଡିଶାର ବିଭିନ୍ନ ଜିଲ୍ଲା ତଥା ଜାତୀୟ ସ୍ତରରେ ବ୍ୟାପକ ସଚେତନତା କାର୍ଯ୍ୟକ୍ରମ ଆୟୋଜନ କରିଥିଲା।
ତୃଣମୂଳ ସ୍ତରରେ ଲୋକଙ୍କୁ ଜଡିତ କରିବା ଏବଂ ଏହି ସମସ୍ୟା ବିଷୟରେ ସଚେତନତା ପ୍ରସାର କରିବା ପାଇଁ ବିଭିନ୍ନ ପ୍ରକାରର କାର୍ଯ୍ୟକଳାପ କରାଯାଇଥିଲା ଯଥା ସଭା, ରାଲି, କାନ୍ଥ ଚିତ୍ର, ସଚେତନତା ବାର୍ତ୍ତା, ପୋଷ୍ଟର ତିଆରି, ମାନବ ଶୃଙ୍ଖଳ, ସାମାଜିକ ଗଣମାଧ୍ୟମ ଅଭିଯାନ, ରେଡିଓ ସମ୍ପର୍କ ୮୯.୬ ମାଧ୍ୟମରେ ସଚେତନତା ମୂଳକ କାର୍ଯ୍ୟକ୍ରମ ପ୍ରସାର କରଯାଇଥିଲା ।
ଏହି ଦିନଟି ପିକକ୍ ଦ୍ୱାରା ଏପ୍ରିଲ ୩୦ରୁ ଆରମ୍ଭ ହୋଇଥିବା ୪୪ ଦିନିଆ ଶିଶୁ ଶ୍ରମ ବିରୋଧୀ ଅଭିଯାନର ଶେଷ ଦିନ ଥିଲା। ଏହି ଦିବସ ଅବସରରେ ପିକକ୍ ଦ୍ୱାରା ଗଠିତ କେଳାସାହି ବସ୍ତିର କିଶୋର କିଶୋରୀ ଗୋଷ୍ଠୀର ନେତ୍ରୀ ତଥା ଦଶମ ଶ୍ରେଣୀ ଛାତ୍ରୀ ଦିୟା ଦାସ କହିଥିଲେ, “ସମସ୍ତ ପିଲା ସ୍କୁଲ ଯିବା ଉଚିତ ଏବଂ ସେମାନଙ୍କୁ ସ୍ୱପ୍ନ ଦେଖିବା, ଶିଖିବା ଏବଂ ଏକ ଉନ୍ନତ ଭବିଷ୍ୟତ ଗଠନ କରିବାର ସୁଯୋଗ ଦିଆଯିବା ଉଚିତ। କୌଣସି ପିଲାକୁ ଜୀବିକା ନିର୍ବାହ ପାଇଁ ନିଜ ଶୈଶବକୁ ବଳିଦାନ ଦେବାକୁ ପଡ଼ିବ ନାହିଁ।“
କେନ୍ଦୁଝରର ଇକୋସେଭର୍ସ ଯୁବ ଗୋଷ୍ଠୀ ର ସଦସ୍ୟ ସଂଗ୍ରାମ ଦେହୁରୀ କହିଥିଲେ, “ପ୍ରତ୍ୟେକ ଶିଶୁ ଶ୍ରମ ନୁହେଁ ଏକ ସୁନ୍ଦର ଶୈଶବ ପାଇବା ଉଚିତ। ଆସନ୍ତୁ ସମସ୍ତେ ମିଶି ଶିଶୁଶ୍ରମକୁ ସମାପ୍ତ କରିବା ଏବଂ ଶିକ୍ଷା, ସ୍ୱପ୍ନ ଏବଂ ସ୍ୱାଧୀନତାକୁ ଗୁରୁତ୍ଵଦେଇ ଏକ ସୁନ୍ଦର ଭବିଷ୍ୟତ ନିର୍ମାଣ କରିବା !” ଏହି ଦିବସ ପାଳନର ଲକ୍ଷ୍ୟ ଉପରେ ଗୁରୁତ୍ଵଦେଇ ପିକକ୍ ର ସମ୍ପାଦକ ରଞ୍ଜନ କୁମାର ମହାନ୍ତି କହିଥିଲେ, “ଶିଶୁଶ୍ରମ ବନ୍ଦ କରିବା ପାଇଁ ଆମେ ସମସ୍ତେ ହାତ ମିଳାଇବା ଉଚିତ। ଆସନ୍ତୁ ଆମେ ଏପରି ଏକ ବିଶ୍ୱ ପାଇଁ କାମ କରିବା ଯେଉଁଠାରେ କୌଣସି ଶିଶୁକୁ ଶ୍ରମରେ ନିଯୋଜିତ କରିବାକୁ ବାଧ୍ୟ କରାଯିବ ନାହିଁ, ଯେଉଁଠାରେ ପ୍ରତ୍ୟେକ ଶିଶୁ ସ୍କୁଲରେ ରହିବ, ସୁରକ୍ଷିତ ରହିବ ଏବଂ ସ୍ୱପ୍ନ ଦେଖିବା ପାଇଁ ମୁକ୍ତ ରହିବ। ଶିଶୁ ମାନଙ୍କର ସୁରକ୍ଷା କେବଳ ଏକ ଦାୟିତ୍ୱ ନୁହେଁ – ଏହା ଏକ ନୈତିକ କର୍ତ୍ତବ୍ୟ”