ବ୍ୟାଙ୍କଗୁଡ଼ିକ ବିଭିନ୍ନ ସ୍ୱୟଂ ସହାୟିକା ଗୋଷ୍ଠୀମାନଙ୍କୁ କୋଭିଡ୍ ଋଣ ପ୍ରଦାନ କରୁଥିବା ବେଳେ ଏହି ଋଣ ବାବଦକୁ ପରିଶୋଧ ହେବାକୁ ଥିବା ସୁଧ ରାଜ୍ୟ ସରକାରଙ୍କ ମିଶନ୍ ଶକ୍ତି ଋଣ (ସୁଧ ଛାଡ଼) ମାଧ୍ୟମରେ ଫେରସ୍ତ କରାଯିବାର ବ୍ୟବସ୍ଥା ହୋଇଛି ।
ବିଜେପି ବିଧାୟିକା କୁସୁମ ଟେଟେଙ୍କ ଏକ ପ୍ରଶ୍ନର ଉତ୍ତରରେ ମହିଳା ଓ ଶିଶୁ ବିକାଶ ଏବଂ ମିଶନ୍ ଶକ୍ତି ମନ୍ତ୍ରୀ ଟୁକୁନି ସାହୁ ଆଜି ବିଧାନସଭାରେ ଏହି ସୂଚନା ଦେଇଛନ୍ତି । ମନ୍ତ୍ରୀ ଦର୍ଶାଇଛନ୍ତି ଯେ ମହିଳା ସ୍ୱୟଂ ସହାୟିକା ଗୋଷ୍ଠୀଗୁଡ଼ିକର ଆର୍ଥିକ ସ୍ଥିତିର ସୁଧାର ପାଇଁ ମିଶନ୍ ଶକ୍ତି ଋଣ ପ୍ରଦାନ କରାଯାଉଥିବା ବେଳେ ନିୟମିତ ଋଣ କିସ୍ତି ପରିଶୋଧ କ୍ଷେତ୍ରରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଉପରେ ସମସ୍ତ ସୁଧ ସରକାର ବହନ କରୁଛନ୍ତି । ଫଳରେ ଏହି ଋଣ ନେଇଥିବା ଗୋଷ୍ଠୀଗୁଡ଼ିକୁ ଶୂନ ପ୍ରତିଶତ ସୁଧରେ ଅର୍ଥ ଉପଲବ୍ଧ କରାଯାଇପାରୁଛି ।
କୋଭିଡ୍ ମହାମାରୀ ସମୟରେ ମହିଳା ସ୍ୱୟଂ ସହାୟିକା ଗୋଷ୍ଠୀର ଆର୍ଥିକ ସ୍ଥିତି ସୁଦୃଢ଼ କରିବା ପାଇଁ ରାଜ୍ୟ ସରକାର ମିଶନ୍ ଶକ୍ତି ମାଧ୍ୟମରେ ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି । ଏହି ଗୋଷ୍ଠୀଗୁଡ଼ିକର ଆର୍ଥିକ ଉନ୍ନତି ପାଇଁ ମିଶନ୍ ଶକ୍ତି ଋଣ ପ୍ରଦାନ କରାଯାଉଛି ।
ସ୍ୱୟଂ ସହାୟିକା ଗୋଷ୍ଠୀ ଦ୍ୱାରା ପରିଚାଳିତ ବିଭିନ୍ନ କାର୍ଯ୍ୟକ୍ରମକୁ ସୁଦୃଢ଼ କରିବା ନିମନ୍ତେ ସହାୟତା ଯୋଗାଇଦେବା ପାଇଁ ବ୍ଲକ୍ ସ୍ତରୀୟ ମହାସଂଘଗୁଡ଼ିକୁ ୨୫ ଲକ୍ଷ ଟଙ୍କାର ଆବର୍ତ୍ତମାନ ପାଣ୍ଠି ପ୍ରଦାନ କରାଯାଇଛି । ଜରୁରୀ ସମୟରେ ଉକ୍ତ ପାଣ୍ଠି ବ୍ୟବହାର କରି ସ୍ୱୟଂ ସହାୟିକା ଗୋଷ୍ଠୀ ସଦସ୍ୟାମାନଙ୍କୁ ସହଜରେ ଋଣ ପ୍ରଦାନ କରିବା ନିମନ୍ତେ ବ୍ଲକ୍ ସ୍ତରୀୟ ମହାସଂଘଗୁଡ଼ିକ କାର୍ଯ୍ୟ କରୁଛନ୍ତି ।