ଭୁବନେଶ୍ୱର : ବିଜୁ ଜନତା ଦଳ ଆଜି ତାହାର ଅବଶିଷ୍ଟ ଗୋଟିଏ ଲୋକସଭା ଆସନ ସହିତ ଆଉ ୯ଟି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି ।
ବାଲେଶ୍ୱର ଲୋକସଭା ଆସନ ପାଇଁ ସଦ୍ୟ ବିଜେଡିରେ ଯୋଗ ଦେଇଥିବା ଲେଖାଶ୍ରୀ ସାମନ୍ତ ସିଂହାରଙ୍କ ନାମ ବିଜେଡି ଘୋଷଣା କରିଛି । ବିଜେପିରୁ ଆସି ଚାରି ଦିନ ତଳେ ଲେଖାଶ୍ରୀ ବିଜେଡିରେ ଯୋଗ ଦେଇଥିଲେ ।
ସେହିଭଳି ବିଧାନସଭା ଆସନ ମଧ୍ୟରେ ଭୁବନେଶ୍ୱର ମଧ୍ୟ ଆସନରେ ବିଜେଡି ପୁଣିଥରେ ଅନନ୍ତ ନାରାୟଣ ଜେନାଙ୍କୁ ରିପିଟ୍ କରିଥିବାବେଳେ ସମ୍ବଲପୁରରୁ ପ୍ରସନ୍ନ ଆଚାର୍ଯ୍ୟ, ନର୍ଲାରୁ ମନୋରମା ମହାନ୍ତି, ପାରାଦୀପ୍ରୁ ଗୀତାଞ୍ଜଳି ରାଉତରାୟ, ବାଲିଗୁଡାରୁ ଚନ୍ଦ୍ରମଣି କହଁର, ଲକ୍ଷ୍ମୀପୁରର ପ୍ରଭୁ ଜାନି, ତେଲକୋଇରୁ ମାଧବ ସର୍ଦ୍ଦାର, ତାଳଚେରରୁ ବ୍ରଜ ପ୍ରଧାନ, ରେଢାଖୋଲରୁ ରୋହିତ ପୂଜାରୀଙ୍କ ନାମ ଘୋଷଣା ହୋଇଛି ।
ବିଜେଡିର ଆଜି ଏହି ପ୍ରାର୍ଥୀ ତାଲିକା ଘୋଷଣା ପରେ ଦଳ ପକ୍ଷରୁ ସମସ୍ତ ୨୧ଟି ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା ହୋଇଥିବାବେଳେ ବିଧାନସଭା ପ୍ରାର୍ଥୀଙ୍କ ସଂଖ୍ୟା ୧୧୭ରେ ପହଞ୍ଚିଛି । ଦଳ ପକ୍ଷରୁ ଆହୁରି ୩୦ଟି ବିଧାନସଭା ପାଇଁ ପ୍ରାର୍ଥୀ ଘୋଷଣା କରାଯିବ ।