ଭୁବନେଶ୍ୱର : ସ୍ଥାନୀୟ ଅନୁସୂଚିତ ଜାତି ଓ ଅନୁସୂଚିତ ଜନଜାତି ଗବେଷଣା ତଥା ପ୍ରଶିକ୍ଷଣ ପ୍ରତିଷ୍ଠାନର ସାନ୍ତାଳ ଘର ପ୍ରାଙ୍ଗଣ ଓ ଜୁଆଙ୍ଗ ମଣ୍ଡରେ ଓଡ଼ିଶାର ଦୁଇଗୋଟି ଜନଜାତି ଯଥା-ବାଥୁଡ଼ି ଓ ସାନ୍ତାଳମାନଙ୍କର କଳା ଓ କଳାବସ୍ତୁ ପ୍ରଦର୍ଶନୀ ଉଦ୍ଘାଟିତ ହୋଇଛି ।
ଭାରତ ସରକାରଙ୍କ ଆଦିବାସୀ ବ୍ୟାପାର ମନ୍ତ୍ରଣାଳୟ ସହଯୋଗିତାରେ ଆୟୋଜିତ ଏହି ପ୍ରଦର୍ଶନୀକୁ ଅନୁସୂଚିତ ଜାତି ଓ ଅନୁସୂଚିତ ଜନଜାତି ଗବେଷଣା ତଥା ପ୍ରଶିକ୍ଷଣ ପ୍ରତିଷ୍ଠାନର ନିର୍ଦ୍ଦେଶକ ଶ୍ରୀ ଇନ୍ଦ୍ରମଣି ତ୍ରିପାଠୀ ଉଦ୍ଘାଟନ କରିଥିଲେ । ଉଦ୍ଘାଟନ ଅବସରରେ ଶ୍ରୀ ତ୍ରିପାଠୀ ଜନଜାତି କାରିଗରମାନଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିବା ସହିତ ସେମାନଙ୍କର ଉତ୍ପାଦନ ସଂପର୍କରେ ପଚାରି ବୁଝିଥିଲେ ।
ଏହି କାର୍ଯ୍ୟକ୍ରମରେ ୧୦ ଜଣ କାରିଗର ଅଂଶଗ୍ରହଣ କରିଛନ୍ତି । ସେମାନଙ୍କ ମଧ୍ୟରୁ ପାଞ୍ଚ ଜଣ ହେଉଛନ୍ତି ସବାଇ ଘାସ ଶିଳ୍ପ ଓ ପାଞ୍ଚ ଜଣ ହେଉଛନ୍ତି ଡୋକରା ଶିଳ୍ପ କାରିଗର । ସବାଇ ଓ ଡୋକରା ଶିଳ୍ପରେ ଅଂଶଗ୍ରହଣ କରିଥିବା କାରିଗରମାନେ ସାନ୍ତାଳ ଓ ବାଥୁଡ଼ି ଜନଜାତି ସଂପ୍ରଦାୟର ଅଟନ୍ତି । ସବାଇ ଘାସ ଶିଳ୍ପରେ ସମସ୍ତ ମହିଳା ଅଂଶଗ୍ରହଣ କରିଥିବାବେଳେ ଡୋକରା ଶିଳ୍ପରେ ତିନିଜଣ ମହିଳା ଓ ଦୁଇଜଣ ପୁରୁଷ ଅଂଶଗ୍ରହଣ କରିଛନ୍ତି । ସବାଇ ଶିଳ୍ପ କାରିଗର ମୟୂରଭଞ୍ଜ ଜିଲ୍ଲାର ବାରିପଦା ଅଞ୍ଚଳରୁ ଆସିଥିବାବେଳେ ଡୋକରା ଶିଳ୍ପ କାରିଗର ମୟୂରଭଞ୍ଜ ଜିଲ୍ଲାର କପ୍ତିପଦା ଅଞ୍ଚଳରୁ ଆସିଛନ୍ତି ।
ଆଜିଠାରୁ ଫେବୃଆରୀ ୩ ତାରିଖ ପର୍ଯ୍ୟନ୍ତ ୧୫ ଦିନ ଧରି ଏହି କାର୍ଯ୍ୟକ୍ରମ ଚାଲିବ । ଏହି କାର୍ଯ୍ୟକ୍ରମରେ ସକାଳ ୧୦ ଘଟିକାଠାରୁ ୫ ଘଟିକା ପର୍ଯ୍ୟନ୍ତ ସବାଇ କ୍ରାଫ୍ଟ ଓ ଡୋକରା କ୍ରାଫ୍ଟର କାରିଗରମାନେ ସେମାନଙ୍କର କଳାବସ୍ତୁ ପ୍ରସ୍ତୁତିର ପ୍ରତ୍ୟକ୍ଷ ପ୍ରଦର୍ଶନ କରିବେ । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆବର୍ଗ କଲ୍ୟାଣ ବିଭାଗ ଏବଂ ଏସ୍ସିଏସ୍ଟିଆର୍ଟିଆଇ ପକ୍ଷରୁ ଏହି ପ୍ରଦର୍ଶନୀ ଆୟୋଜିତ ହୋଇଛି ।