ଭୁବନେଶ୍ୱର : ପଦ୍ମପୁର ବିଧାନସଭା ଆସନରୁ ଦଳୀୟ ପ୍ରାର୍ଥୀଭାବେ ବର୍ଷା ସିଂହ ବରିହାଙ୍କ ନାମରେ ମୋହର ମାରିଛି ବିଜେଡି । ବର୍ଷା ହେଉଛନ୍ତି ପଦ୍ମପୁରର ସ୍ୱର୍ଗତ ବିଜେଡି ବିଧାୟକ ବିଜୟ ରଞ୍ଜନ ସିଂହ ବରିହାଙ୍କ ଝିଅ ।
ବିଜେଡି ପ୍ରାର୍ଥୀ ଭାବେ ସ୍ୱର୍ଗତ ବିଧାୟକଙ୍କ ପତ୍ନି, ପୁତୁରାବୋହୁ ଓ ଝିଅଙ୍କ ନାମ ଚର୍ଚ୍ଚାରେ ଥିବାବେଳେ ଶେଷରେ ଝିଅ ବର୍ଷାଙ୍କୁ ବିଜେଡି ପ୍ରାର୍ଥୀ କରିଛି । ତେବେ ବର୍ଷା ବିବାହିତା ଏବଂ ସେ ହେଉଛନ୍ତି ପୁରୀ ଜିଲ୍ଲା ସତ୍ୟବାଦୀର ପୂର୍ବତନ ବିଧାୟକ ତଥା ବର୍ତ୍ତମାନର ବିଜେପିର ବରିଷ୍ଠ ନେତା ରମା ରଞ୍ଜନ ବଳିୟାର ସିଂହଙ୍କ ବୋହୂ । ତାଙ୍କ ପୁତ୍ର ସ୍ମୃତି ସୌରଭ ବଳିୟାରସିଂହଙ୍କୁ ଅଳ୍ପ ଦିନ ତଳେ ବର୍ଷା ବିବାହ କରିଛନ୍ତି ।
ଆଜି ବିଜେଡି ତାହାର ପ୍ରାର୍ଥୀଙ୍କ ନାମ ଘୋଷଣା କରିଥିବାବେଳେ ପୂର୍ବରୁ ବିଜେପି ତାହାର ପ୍ରାର୍ଥୀଭାବେ ପଦ୍ମପୁରର ପୂର୍ବତନ ବିଧାୟକ ପ୍ରଦୀପ ପୁରୋହିତଙ୍କ ନାମ ଘୋଷଣା କରିଥିବାବେଳେ କଂଗ୍ରେସ ତାହାର ପୂର୍ବତନ ବିଧାୟକ ସତ୍ୟଭୂଷଣ ସାହୁଙ୍କ ନାମ ଘୋଷଣା କରିଛି ।
ବିଜେଡି ଆଜି ତାହାର ପ୍ରାର୍ଥୀ ଘୋଷଣା କରିଥିବାବେଳେ ପଦ୍ମପୁର ବିଧାନସଭା ଆସନରେ ତ୍ରିମୁଖୀ ଲଢେଇ ହେବା ନିଶ୍ଚିତ ହୋଇଛି । ଆସନ୍ତା ମାସ ୫ତାରିଖରେ ପଦ୍ମପୁର ଉପନିର୍ବାଚନ ପାଇଁ ମତଦାନ ହେବାକୁ ଥିବାବେଳେ ନାମାଙ୍କନପତ୍ର ଦାଖଲର ଶେଷ ଦିନ ଅର୍ଥାତ ୧୭ତାରିଖ ପରେ କେତେ ପ୍ରାର୍ଥୀ ମଇଦାନରେ ଉଭା ହେବେ ତାହା ଜଣାପଡିବ ।