ଟିଟିଲାଗଡ଼: ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଲଗାତାର ଷଷ୍ଠ ଥର ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି।
ମୁଖ୍ୟମନ୍ତ୍ରୀ ତୁସ୍ରା ବିମାନବନ୍ଦରରେ ପହଞ୍ଚିବା ପରେ ହଜାର ହଜାର ସମର୍ଥକ ତାଙ୍କୁ ସ୍ୱାଗତ କରିଥିଲେ। ପରେ ସେ ନାମାଙ୍କନ ପତ୍ର ଦାଖଲ ପାଇଁ ଟିଟିଲାଗଡ଼ ଆସିଥିଲେ।
ଟିଟିଲାଗଡ଼ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ବିଜେଡି ବରିଷ୍ଠ ନେତା ଏୟୁ ସିଂହଦେଓ, ୫ଟି ଅଧ୍ୟକ୍ଷ ଭିକେ ପାଣ୍ଡିଆନ, ବରିଷ୍ଠ ବିଜେଡି ନେତା କଳିକେଶ ନାରାୟଣ ସିଂହଦେଓଙ୍କ ଉପସ୍ଥିତିରେ ନବୀନ ରିଟର୍ଣ୍ଣିଂ ଅଫିସରଙ୍କ ନିକଟରେ ନାମାଙ୍କନ ପତ୍ର ଦାଖଲ କରିଥିଲେ।
ମନ୍ତ୍ରୀ ଟୁକୁନି ସାହୁଙ୍କ ସମେତ ବଲାଙ୍ଗୀର ଜିଲ୍ଲାର ବିଧାୟକ ଓ ସାଂସଦ ପ୍ରାର୍ଥୀଙ୍କ ସମେତ ବହୁ ବରିଷ୍ଠ ନେତା ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ଉପସ୍ଥିତ ଥିଲେ।
ଶ୍ରୀ ପଟ୍ଟନାୟକଙ୍କୁ ବିଜେଡି ବରିଷ୍ଠ ନେତା ଏୟୁ ସିଂହଦେଓ ଓ ବିଜେଡି ବଲାଙ୍ଗୀର ବିଧାୟକ ପ୍ରାର୍ଥୀ କଳିକେଶ ନାରାୟଣ ସିଂହଦେଓ ସ୍ୱାଗତ କରିଥିଲେ।
ମୁଖ୍ୟମନ୍ତ୍ରୀ ତାଙ୍କ ଘନିଷ୍ଠ ବନ୍ଧୁ ତଥା ଜଣେ ପ୍ରବଳ ସମର୍ଥକ, ପୂର୍ବତନ ମନ୍ତ୍ରୀ ତଥା ସାଂସଦ ଶ୍ରୀ ସିଂହଦେଓଙ୍କୁ ଦେଖି ଖୁସି ହୋଇଥିଲେ।
ନାମାଙ୍କନ ପତ୍ର ଦାଖଲ କରିବା ପରେ ଶ୍ରୀ ପଟ୍ଟନାୟକ ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରିଥିଲେ ଏବଂ ଉଭୟ ବନ୍ଧୁ ରାଜ୍ୟରେ ନିର୍ବାଚନ ଓ ଗ୍ରୀଷ୍ମ ପ୍ରବାହକୁ ନେଇ ଅନେକ ସମୟ ଧରି କଥା ହୋଇଥିଲେ।
ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ବଲାଙ୍ଗୀର ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରୁଥିବା କଳିକେଶଙ୍କୁ ଶୁଭେଚ୍ଛା ଜଣାଇବା ସହ ବଲାଙ୍ଗୀର ଜିଲ୍ଲାରେ ଚାଲିଥିବା ନିର୍ବାଚନ ପ୍ରକ୍ରିୟା ସମ୍ପର୍କରେ ପଚାରି ବୁଝିଥିଲେ। ଆଗାମୀ ନିର୍ବାଚନରେ ସଫଳତା କାମନା କରିଛନ୍ତି ମୁଖ୍ୟମନ୍ତ୍ରୀ ।
ଗତ ୨୦୧୯ ନିର୍ବାଚନ ଭଳି ଏଥର ମଧ୍ୟ ବିଜେଡି ସୁପ୍ରିମୋ ଦୁଇଟି ବିଧାନସଭା ଆସନରୁ ନିର୍ବାଚନ ଲଢୁଛନ୍ତି।
ଗତ ଏପ୍ରିଲ ୩୦ ତାରିଖରେ ଗଞ୍ଜାମ ଛତ୍ରପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ହିଞ୍ଜିଳି ବିଧାନସଭା ଆସନ ପାଇଁ ଶ୍ରୀ ପଟ୍ଟନାୟକ ନାମାଙ୍କନ ପତ୍ର ଦାଖଲ କରିଥିଲେ।
ହିଞ୍ଜିଳି ବ୍ୟତୀତ ସେ ପଶ୍ଚିମ ଓଡ଼ିଶାର କଣ୍ଟାବାଞ୍ଜି ବିଧାୟକ ଆସନରୁ ମଧ୍ୟ ନିର୍ବାଚନ ଲଢୁଛନ୍ତି, ଯେଉଁଥିପାଇଁ ସେ ଗତ ୨ ତାରିଖରେ ତାଙ୍କ ବନ୍ଧୁ ଓ ସାଥୀ ଦଳୀୟ ସଦସ୍ୟଙ୍କ ଉପସ୍ଥିତିରେ ନାମାଙ୍କନ ପତ୍ର ଦାଖଲ କରିଥିଲେ।
