ଭୁବନେଶ୍ୱର : ଗଣେଶ ଚତୁର୍ଥୀରୁ ରାଜ୍ୟରେ ପାର୍ବଣଋତୁ ଆରମ୍ଭ ହୋଇଥିବାବେଳେ ବଜାରରେ ଏବେ ପୂଜାସାମଗ୍ରୀ ଓ ଭୋଗ ଆଦିବାପାଇଁ ଗହଳି ଲାଗି ରହିଛି । ତେବେ ବଜାରରେ ମିଳୁଥିବା ଭୋଗ ଆଦିର ମାନ ଯାଞ୍ଚ ହେଉନଥିବାରୁ ଲୋକେ ଅତ୍ୟନ୍ତ ନିମ୍ନମାନର ଖାଦ୍ୟ ସାମଗ୍ରୀ ଖରିଦ କରୁଥିବା ଦେଖିବାକୁ ମିଳୁଛି ।
ପୂଜାପାଇଁ ଲୋକେ ପୂଜାସାମଗ୍ରୀ ଦୋକାନରୁ ଘିଅ, ମହୁ, ଲଡୁ, ଉଖୁଡା, ସେଓ ଆଦି ବିପୁଳ ପରିମାଣରେ ଖରିଦ କରୁଛନ୍ତି । ପୂଜା ସାମଗ୍ରୀ ଦୋକାନ ବାହାରେ ବି ଋତୁକାଳୀନ ବ୍ୟବସାୟୀଙ୍କ ପସରା ଖୋଲିଛି । ଏମାନେ ବି ଭୋଗସାମଗ୍ରୀ ବିକ୍ରି କରିବାରେ ଲାଗିଛନ୍ତି । ହେଲେ ଏହିସବୁ ସାମଗ୍ରୀର ଯାଞ୍ଚ ହେଉନାହିଁ । ଯିଏ ଯେଭଳି ପାରୁଛି ସେଭଳି ମାନର ବିକ୍ରି କରୁଛି ।
ପୂଜା ସାମଗ୍ରୀ ଦୋକାନରେ ମିଳୁଥିବା କେତେକ ଘିଅ ଉପରେ ସ୍ପଷ୍ଟ ଲେଖାହୋଇଛି ଏହା କେବଳ ପୂଜା ପାଇଁ । ଏହି ଗାଈଘିଅ କିଲୋ ପ୍ରତି ୧୦୦ ଟଙ୍କାରେ ମିଳୁଛି । ବିକିଲା ବେଳେ ଦୋକାନୀ ବୁଝାଇ ଦେଉଛି ଏଥିରେ କେବଳ ପୂଜା କରିବେ । ଆଦୌ ଖାଇବେ ନାହିଁ । ସେହିଭଳି ବିକ୍ରି ହେଉଥିବା ମହୁକୁ ବି ଭୋଗରେ ମିଶାଇବାକୁ ମନାକରୁଛନ୍ତି । ପୂଜାପାଇଁ ମିଳୁଥିବା ଉଖୁଡା ଓ ଲଡୁ ଆଦିର ମଧ୍ୟ ସମାନ ଅବସ୍ଥା ।
ସେହିଭଳି ଗଣେଶଙ୍କ ନିକଟରେ ଭୋଗ ପାଇଁ ବିଭିନ୍ନ ସ୍ଥାନରେ ମିଳୁଥିବା ବୁନ୍ଦିଲଡୁ, ଖସାଲଡୁ, ବୁନ୍ଦି, ଛଣାସେଓ ଆଦିର ମାନ ମଧ୍ୟ ଯାଞ୍ଚ ହେଉନାହିଁ । ବେସନ ସହିତ ବିଭିନ୍ନ ସାମଗ୍ରୀ ମିଶାଇ ଅତ୍ୟନ୍ତ ଶସ୍ତା ଦେଲରେ ବ୍ୟବସାୟୀମାନେ ଏହାକୁ ପ୍ରସ୍ତୁତ କରୁଛନ୍ତି । ପୂଜା ବଜାରରେ ଗ୍ରାହକଙ୍କ ବିକଳିଆ ଅବସ୍ଥା ଦେଖି ଚଢା ଦରରେ ଏହାକୁ ବିକ୍ରି କରୁଛନ୍ତି ।
ବର୍ତ୍ତମାନ ବର୍ଷାଋତୁ ଚାଲିଥିବାରୁ ବିଭିନ୍ନ ସ୍ଥାନରେ ପେଟରୋଗ ସହିତ ଝାଡା ଓ ଜ୍ୱର ଆଦି ଲାଗି ରହିଛି । ଏଭଳି ସ୍ଥିତିରେ ନିମ୍ନମାନର ସାମଗ୍ରୀରେ ପ୍ରସ୍ତୁତ ଭୋଗ ଖାଇଲେ ସ୍ଥିତି ବିଗିଡିବା ନେଇ ସ୍ୱାସ୍ଥ୍ୟ ବିଶେଷଜ୍ଞମାନେ ଆଶଙ୍କା ପ୍ରକାଶ କରୁଛନ୍ତି । ତେଣୁ ସହରାଞ୍ଚଳରେ ପାର୍ବଣ ସମୟରେ ବହୁଳ ଭାବେ ବିକ୍ରି ହେଉଥିବା ପୂଜା ସାମଗ୍ରୀ ବିଶେଷକରି ଭୋଗସାମଗ୍ରୀର ମାନ ଯାଞ୍ଚ ପାଇଁ ମତପ୍ରକାଶ ପାଉଛି ।
ଉଲ୍ଲେଖନୀୟ ଯେ ବିଏମସି ଅଞ୍ଚଳରେ ଖାଦ୍ୟ ସୁରକ୍ଷାର ଯାଞ୍ଚ ପାଇଁ ଫୁଡ୍ ଇନ୍ସପେକ୍ଟରମାନେ ରହିଥିବାବେଳେ ସେମାନେ ଏହିସବୁ ଖାଦ୍ୟର ମାନ ଯାଞ୍ଚ କରିବାକଥା । ହେଲେ କମ୍ ସଂଖ୍ୟକ ଅଧିକାରୀଙ୍କ ସାଙ୍ଗକୁ ଅଧିକ ସଂଖ୍ୟକ ଭୋଗ ଦୋକାନ ରହିଥିବାବେଳେ ଯାଞ୍ଚ ଏକ ପ୍ରକାର ନାହିଁ କହିଲେ ଚଳେ । ତେଣୁ ପାର୍ବଣ ଋତୁ ଶେଷ ପର୍ଯ୍ୟନ୍ତ ଭୋଗ ଓ ପୂଜା ସାମଗ୍ରୀର ବ୍ୟାପକଯାଞ୍ଚ ପାଇଁ ମତପ୍ରକାଶ ପାଉଛି । (ତଥ୍ୟ)