ନିର୍ବାଚନ ରାଲି ଯୋଗୁଁ ଆମେରିକାରେ ୩୦ହଜାରରୁ ଅଧିକ ଲୋକ କରୋନାରେ ସଂକ୍ରମିତ ହୋଇଥିବାବେଳେ ୭୦୦ରୁ ଅଧିକ ମରିଥିବା ଖବର ଗଣମାଧ୍ୟମରେ ପ୍ରକାଶ ପରେ ଏବେ ବାଲେଶ୍ୱର ଓ ତିର୍ତ୍ତୋଲ ଅଞ୍ଚଳରେ ଉଭୟ ସାଧାରଣ ଜନତା ଓ ନେତାଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି ।
ଏଠାରେ ଉଲ୍ଲେଖନୀୟ ଯେ ଗଣମାଧ୍ୟମରେ ପ୍ରକାଶିତ ଗବେଷଣାଲବ୍ଧ ତଥ୍ୟ ଅନୁଯାୟୀ ଆମେରିକାର ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପ କରିଥିବା ନିର୍ବାଚନୀ ରାଲିଗୁଡିକ ବସ୍ତୁତଃ କରୋନାର ସୁପରସ୍ପ୍ରେଡର ହୋଇଛନ୍ତି । କରୋନା କଟକଣା ନମାନି ସେଠାରେ ରାଜନୈତିକ ନେତାମାନେ ରାଲି କରିଥିବାବେଳେ ସେମାନଙ୍କ ସମର୍ଥକମାନେ ସାମାଜିକ ଦୂରତ୍ୱ ନରଖିବା, ମାସ୍କ ନପିନ୍ଧିବା ଓ ସାନିଟାଇଜର ବ୍ୟବହାର ନକରିବା କାରଣରୁ ସେଠାରେ କରୋନା ବ୍ୟାପିଛି । ଏମିତିକି ନିର୍ବାଚନ ମଝିରେ ନିଜେ ଟ୍ରମ୍ପ ଓ ତାଙ୍କର ଅନେକ ଆଗଧାଡିର ପ୍ରଚାରକ ମଧ୍ୟ କରୋନା ସଂକ୍ରମିତ ହୋଇଛନ୍ତି ।
ଓଡିଶାର ବାଲେଶ୍ୱର ସଦର ଓ ତିର୍ତ୍ତୋଲ ସଂରକ୍ଷିତ ବିଧାନସଭା ଆସନ ପାଇଁ ଉପନିର୍ବାଚନ ପରିପ୍ରେକ୍ଷୀରେ ସରକାର ଓ ନିର୍ବାଚନ କମିଶନ କୋଭିଡକୁ ଆଖିଆଗରେ ରଖି ବ୍ୟାପକ କଟକଣା ଜାରି କରିଥିବାବେଳେ ବିଭିନ୍ନ ରାଜନୈତିକଦଳ ଏ ସବୁର ଖୋଲା ଉଲ୍ଲଙ୍ଘନ କରିଛନ୍ତି । ଶୀତ ବଢିଲେ ଚିଲିକାକୁ ସାଇବେରିଆ ଓ ଅନ୍ୟ ବିଦେଶୀ ରାଷ୍ଟ୍ରରୁ ଚଢେଇମାନେ ଆସି ଖରାଦିନେ ଫେରିଯିବା ଭଳି ନିର୍ବାଚନ ପ୍ରଚାର ଶେଷରେ ବହିରାଗତ ନେତାମାନେ ନିର୍ବାଚନ ମଣ୍ଡଳୀ ଛାଡି ଫେରିଛନ୍ତି ।
ତେବେ ଏମାନେ ଯେତେସବୁ ସଭା ସମିତି, ଶୋଭାଯାତ୍ରା, ଭୋଜିଭାତ ଓ ଅନ୍ୟାନ୍ୟ ପ୍ରଚାର ଅଭିଯାନ ଚଳାଇଥିଲେ ସେଗୁଡିକରେ କରୋନା କଟକଣାର ଖୋଲା ଉଲ୍ଲଙ୍ଘନ ହୋଇଥିବା ଦୃଷ୍ଟିରୁ ଏ ସବୁରେ ଅଂଶଗ୍ରହଣ କରିଥିବା ଲୋକେ ଓ ସେମାନେ ମିଶିଥିବା ଅନ୍ୟାନ୍ୟ ଜନତାଙ୍କୁ ଯଦି ଆମେରିକା ଭଳି କରୋନା ସଂକ୍ରମଣ ହୁଏ ତେବେ ସେଥିଲାଗି କିଏ ଦାୟୀ ରହିବ ବୋଲି ଚର୍ଚ୍ଚା ଚାଲିଛି ।
ପ୍ରଚାର ସାରି ଫେରିଥିବା ନେତା ଓ ସେମାନଙ୍କ ଅନୁଚରମାନଙ୍କ ମଧ୍ୟରୁ ଅନେକ ଏବେ ନିଜ ନିଜର କରୋନା ପରୀକ୍ଷା କରାଇବାରେ ବ୍ୟସ୍ତ । ବହୁ ଲୋକଙ୍କ ସହିତ ଏମାନେ ମିଶିଥିବାରୁ କାଳେ କାହା ପାଖକୁ କରୋନା ଆସିଥିବ ସେଥିଘେନି ଅନେକ ନେତା ଫେରିବାପରେ ବି ନିଜ ଘରେ ସଂଗରୋଧରେ ରହୁଛନ୍ତି । ତେବେ ବାଲେଶ୍ୱର ଓ ତିର୍ତ୍ତୋଲ ଅଞ୍ଚଳର କର୍ମୀ ଓ ଭୋଟରମାନେ ନେତାମାନଙ୍କ ବିଶୃଙ୍ଖଳ ଆଚରଣ ଯୋଗୁଁ ସଂକ୍ରମିତ ହୋଇଛନ୍ତି କି ନାହିଁ ସେକଥା ଚିନ୍ତା କରିବାକୁ ଏମାନଙ୍କ ପାଖରେ ବେଳ ନାହିଁ ।
ଓଡିଶାରେ ଜୁଲାଇରୁ ଅକ୍ଟୋବର ଅଧ ପର୍ଯ୍ୟନ୍ତ କରୋନାର ଦ୍ରୁତ ସଂକ୍ରମଣ ହୋଇଥିବାବେଳେ ଏବେ ସ୍ଥିତିରେ ସାମାନ୍ୟ ସୁଧାର ଆସିଛି । ତେବେ ଶୀତ ବଢିଲେ କରୋନା ସଂକ୍ରମଣ ବଢିବା ଘେନି ବୈଜ୍ଞାନିକମାନେ ଆଶଙ୍କାବ୍ୟକ୍ତ କରୁଥିବାବେଳେ ସରକାର ବି ଏକାକଥା କହୁଛନ୍ତି । ଯେଉଁମାନଙ୍କୁ ଆଗରୁ କରୋନା ହୋଇଛି ସେମାନଙ୍କ ଭିତରୁ ସୁସ୍ଥ ହୋଇଥିବା କେତେକ ଲୋକଙ୍କୁ ଇତି ମଧ୍ୟରେ ପୁନଃ ସଂକ୍ରମଣ ହେଉଥିବା ଘେନି ଆଇଏଲ୍ଏସ୍ ସୂଚନା ଦେଇଛି ।
ଏଥିଘେନି ଲୋକେ ଚିନ୍ତାରେ ଥିବାବେଳେ ଦଶହରା ଭଳି ଦୀପାବଳୀକୁ ନିରାଡମ୍ବର ଭାବେ ପାଳନ କରିବାକୁ ମନସ୍ଥିର କରିଛନ୍ତି । କିନ୍ତୁ ଇତି ମଧ୍ୟରେ କେତେକ ସହରରେ ବାଣ ଦୋକାନ ଖୋଲିବାକୁ କର୍ତ୍ତୃପକ୍ଷ ଇସାରା ଦେଇଥିବା ପରିପ୍ରେକ୍ଷୀରେ ବାଣ ଫୁଟିଲେ କୋଭିଡ ଆକ୍ରାନ୍ତ ଓ ଏଥିରୁ ସୁସ୍ଥ ହୋଇଥିବା ଲୋକଙ୍କ ସ୍ୱାସ୍ଥ୍ୟପ୍ରତି ଗୁରୁତର ପ୍ରତିକୂଳ ପ୍ରଭାବ ପଡିବ ବୋଲି ବିଶେଷଜ୍ଞମାନେ କିନ୍ତୁ ସତର୍କ କରାଇ ଦେଲେଣି ।