ଭୁବନେଶ୍ୱର : ରାଜଧାନୀରେ ଥିବା ନିକୋ ପାର୍କର ପୁନରୁଦ୍ଧାର କରିବେ ମହିଳା ସ୍ୱୟଂ ସହାୟିକା ଗୋଷ୍ଠି (ଏସଏଚଜି) । ଏଥିପାଇଁ ୨୨ଟି ଏସଏଚଜିଙ୍କୁ ଦାୟିତ୍ୱ ଦିଆଯାଇଛି । ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ତରଫରୁ ସହରାଞ୍ଚଳ ଜଳାଶୟ ପୁନରୁଦ୍ଧାର ଓ ନବୀକରଣ ଉପରେ ଆଜିି ଆୟୋଜିତ କର୍ମଶାଳାରେ ଏହି ସୂଚନା ଦିଆଯାଇଛି ।
ଏହି କର୍ମଶାଳାକୁ ବି.ଏମ୍.ସି ମେୟର ସୁଲୋଚନା ଦାସ ଆନୁଷ୍ଠାନିକ ଭାବେ ଉଦ୍ଘାଟନ କରି ସହରାଞ୍ଚଳ ମାନଙ୍କରେ ଜଳାଶୟ ପୁନରୁଦ୍ଧାର ଓ ନବୀକରଣର ଜରୁରୀ ଆବଶ୍ୟକତା ସଂପର୍କରେ ଆଲୋକପାତ କରିଥିଲେ । ଏହି ଯୋଜନାରେ ପାଇଲଟ ପ୍ରକଳ୍ପ ଭାବେ ସ୍ୱୟଂ ସହାୟକ ଗୋଷ୍ଠୀ ମାନଙ୍କ ଦ୍ୱାରା ନିକୋ ପାର୍କକୁ ନିଆଯାଇଛି ଓ ୨୨ ଟି ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟା ମାନେ ସଂପୃକ୍ତ ହୋଇଛନ୍ତି । ବିକାଶ କ୍ଷେତ୍ରରେ ଗୋଷ୍ଠୀ ସହଭାଗିତା ଦ୍ୱାରା ବିକାଶ ପ୍ରକ୍ରିୟା ତ୍ୱାରାନ୍ୱିତ ହୋଇପାରିଛି ବୋଲି ସେ କହିଥିଲେ ।
ସ୍ୱତନ୍ତ୍ର ସଚିବ ସାଗରିକା ପଟ୍ଟନାୟକ ରାଜ୍ୟରେ ସହରାଚଂଳ ମାନଙ୍କରେ ଜଳାଶୟ ପୁନରୁଦ୍ଧାର ଉପରେ ଆଲୋକପାତ କରି ଏ ଦିଗରେ ରାଜ୍ୟ ସରକାରଙ୍କର ଯୋଜନା ସଂପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ । ସେ କହିଥିଲେ ଯେ ସହରାଞ୍ଚଳ ମାନଙ୍କରେ ଥିବା ଜଳାଶୟ ଗୁଡିକ ସରକାରଙ୍କର ନୁହେଁ ବରଂ ଜନସାଧାରଙ୍କର ନିଜର ବୋଲି ଭାବି ସେ ସବୁର ଯତ୍ନ ନେବାର ଆବଶ୍ୟକତା ରହିଛି ।
ରାଜ୍ୟ ସହରାଟଂଳ ବିକାଶ ସଂସ୍ଥାର ନିର୍ଦ୍ଦେଶକ ଶାରଦା ପ୍ରସାଦ ପଣ୍ଡା ସ୍ୱାଗତ ଭାଷଣ ପ୍ରଦାନ କରି ରାଜ୍ୟର ୧୧୫ ଟି ପୌରାଚଂଳରେ ୧୭୦୦ ଜଳାଶୟ ପୁନରୁଦ୍ଧାର ଓ ନବୀକରଣ ପାଇଁ ଲକ୍ଷ୍ୟ ରହିଛି । ୨୦୨୪ ମସିହା ସୁଦ୍ଧା ଗୋଷ୍ଠୀ ସହଭାଗିଦାରୀରେ ସମ୍ପୂର୍ଣ୍ଣ କରାଯିବ ।
ମିଶନ ଶକ୍ତି ଗୋଷ୍ଠୀ ମାନେ ଏବେ ଗୁରୁଦାୟିତ୍ୱ ତୁଲାଉଥିବାରୁ ଆଗାମୀ ଦିନରେ ଏହି ଜଳାଶୟ ପୁନରୁଦ୍ଧାର ଓ ନବୀକରଣ କାର୍ଯ୍ୟକୁ ଉଚ୍ଚତର ସୋପାନକୁ ନେଇ ଯାଇ ପାରିବେ ବୋଲି ଶ୍ରୀ ପଣ୍ଡା କହିଥିଲେ । ସ୍ୱତନ୍ତ୍ର ସଚିବ ତଥା ମୁଖ୍ୟଯନ୍ତ୍ରୀ ଭକ୍ତକବି ଦାସ ପ୍ରକଳ୍ପ ତଦାରକ ଓ ପ୍ରଶାସନିକ ଦାୟିତ୍ୱ ଉପରେ ବକ୍ତବ୍ୟ ରଖିବା ସହିତ ଧନ୍ୟବାଦ ଅର୍ପଣ କରିଥିଲେ ।
ବେଙ୍ଗୀଲୁରୁର ଲେକ୍ମ୍ୟାନ୍ ଭାବେ ପରିଚିତ ଆନନ୍ଦ ମାଲିଗଭାଡ ପରିବେଶ ଅନୁକୁଳ ଜଳାଶୟ ପୁନରୁଦ୍ଧାର ମଡେଲର ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତି ନୀତି ଓ ଆଭିମୁଖ୍ୟ ଉପରେ ଆଲୋଚନା ରଖିଥିଲେ । ଉକ୍ତ କର୍ମଶାଳାରେ ବି.ଏମ୍.ସି ଓ ସି.ଏମ୍.ସି ସମେତ ଖୋର୍ଦ୍ଧା , କଟକ , ପୁରୀ ,ନୟାଗଡ , ଅନୁଗୋଳ , ବୌଦ୍ଧ , ଯାଜପୁର , ବରଗଡ ଓ ଜଗତସିଂହପୁର ଭଳି ୯ଗୋଟି ଜିଲ୍ଲାର ୨୧ ଗୋଟି ପୌରାଚଂଳର ନିର୍ବାହୀ ଅଧିକାରୀ , ଯନ୍ତ୍ରୀ ଓ ଅଧ୍ୟକ୍ଷ, କର୍ପୋରେଟର ଓ କାଉନସିଲରମାନେ ଯୋଗ ଦେଇଛନ୍ତି ।