ଭୁବନେଶ୍ୱର : ରାଜ୍ୟସଭା ଉପନିର୍ବାଚନ ପାଇଁ ବରିଷ୍ଠ ନେତ୍ରୀ ମମତା ମହାନ୍ତ ବିଜେପି ପ୍ରାର୍ଥୀ ଭାବେ ନାମାଙ୍କନ ପତ୍ର ଦାଖଲ କରିଛନ୍ତି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଜେପି ରାଜ୍ୟ ସଭାପତି ମନମୋହନ ସାମଲ, ଦଳର ଓଡ଼ିଶା ପ୍ରଭାରୀ ବିଜୟପାଲ ସିଂହ ତୋମାର ଏବଂ ଦଳର ଅନେକ ବିଧାୟକଙ୍କ ସହ ମମତା ବିଧାନସଭାରେ ରିଟର୍ଣ୍ଣିଂ ଅଫିସରଙ୍କ ନିକଟରେ ନାମାଙ୍କନ ପତ୍ର ଦାଖଲ କରିଥିଲେ।
ଶାସକ ବିଜେପିର ୭୮ ବିଧାୟକ ଓ ୩ ଜଣ ସ୍ୱାଧୀନ ବିଧାୟକଙ୍କ ସମର୍ଥନ ଥିବାରୁ ମମତା ଓଡ଼ିଶାରୁ ରାଜ୍ୟସଭାକୁ ନିର୍ବାଚିତ ହେବାକୁ ଯାଉଛନ୍ତି। ୧୪୭ ଆସନ ବିଶିଷ୍ଟ ବିଧାନସଭାରେ ବିଜେଡି, କଂଗ୍ରେସ ଓ ସିପିଏମ୍ ର ଯଥାକ୍ରମେ ୫୧, ୧୪ ଓ ଜଣେ ସଦସ୍ୟ ଅଛନ୍ତି।
ନାମାଙ୍କନ ପତ୍ର ଦାଖଲ କରିବା ପରେ ଶ୍ରୀମତୀ ମହାନ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଗୃହମନ୍ତ୍ରୀ ଅମିତ ଶାହା, ବିଜେପି ସଭାପତି ଜେପି ନଡ୍ଡା ଓ ମାଝୀଙ୍କୁ କୃତଜ୍ଞତା ଜଣାଇଛନ୍ତି। ସେ ରାଜ୍ୟବାସୀ ଓ ତାଙ୍କ ସମ୍ପ୍ରଦାୟର ଲୋକଙ୍କ ପାଇଁ କାମ କରିବେ ବୋଲି ପ୍ରତିଶ୍ରୁତି ଦେଇଥିଲେ।
ଶ୍ରୀ ମହାନ୍ତଙ୍କ ବିଜୟ ଉପରେ ଆସ୍ଥା ପ୍ରକଟ କରି ମୁଖ୍ୟମନ୍ତ୍ରୀ କହିଛନ୍ତି, ସେ ବିଜୟୀ ହୋଇ ରାଜ୍ୟସଭାରେ ଓଡ଼ିଶାର ପ୍ରତିନିଧିତ୍ୱ କରିବେ ବୋଲି ଆମେ ଆଶାବାଦୀ।
ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲ୍ଲାର ଲୋକପ୍ରିୟ କୁଡୁମି ସମ୍ପ୍ରଦାୟର ନେତ୍ରୀ ମମତା ମହାନ୍ତ ୨୦୨୦ରେ ବିଜେଡି ପ୍ରାର୍ଥୀ ଭାବେ ରାଜ୍ୟସଭାକୁ ନିର୍ବାଚିତ ହୋଇ ଜୁଲାଇ ୩୧ତାରିଖରେ ନିଜ ଆରଏସ୍ ଆସନ ଓ ବିଜେଡିର ପ୍ରାଥମିକ ସଦସ୍ୟପଦରୁ ଇସ୍ତଫା ଦେଇ ଅଗଷ୍ଟ ୧ତାରିଖରେ ବିଜେପିରେ ଯୋଗ ଦେଇଥିଲେ।
ଆସନ୍ତା ସେପ୍ଟେମ୍ବର ୩ ତାରିଖରେ ହେବାକୁ ଥିବା ଓଡ଼ିଶାଉପନିର୍ବାଚନ ପାଇଁ ସମ୍ଭାବ୍ୟ ପ୍ରାର୍ଥୀକୁ ନେଇ ଚାଲିଥିବା ସମସ୍ତ ରାଜନୈତିକ କଳ୍ପନାଜଳ୍ପନାର ଅନ୍ତ ଘଟାଇ ମଙ୍ଗଳବାର ବିଜେପି ତାଙ୍କୁ ରାଜ୍ୟସଭା ଆସନ ପାଇଁ ପ୍ରାର୍ଥୀ କରିଛି।
ବର୍ତ୍ତମାନ ବିଜୁ ଜନତା ଦଳର ୮ ଜଣ ରାଜ୍ୟସଭା ସଦସ୍ୟ ଥିବା ବେଳେ ବିଜେପିର ଜଣେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଅଛନ୍ତି, ଯିଏ କି ବିଜେଡି ସମର୍ଥନରେ ଲଗାତାର ଦୁଇ ଥର ରାଜ୍ୟରୁ ନିର୍ବାଚିତ ହୋଇଛନ୍ତି।