ଭୁବନେଶ୍ୱର : ଶିଶୁମାନଙ୍କ ପାଇଁ ସରକାରଙ୍କ ସକଳ ଯୋଜନା ସତ୍ୱେ ରାଜ୍ୟର ଦୁଇ ଆଦିବାସୀ ବହୁଳ ଜିଲ୍ଲା ମୟୁରଭଞ୍ଜ ଓ ନବରଙ୍ଗପୁର ଏ କ୍ଷେତ୍ରରେ ଢେର ଆଗରେ ରହିଛନ୍ତି । ଏଠାରେ ଅପପୁଷ୍ଟି ପୀଡିତ ଶିଶୁଙ୍କମାନଙ୍କ ସଂଖ୍ୟା ସରକାରୀ ତାଲିକାରେ ହଜାରେ ଉପରେ ରହୁଛି ।
ରାଜ୍ୟରେ ଅପପୁଷ୍ଟିକୁ ନିୟନ୍ତ୍ରଣକୁ ଆଣିବାପାଇଁ ସରକାର ଏକାଧିକ ଯୋଜନା କାର୍ଯ୍ୟକାରୀ କରୁଛନ୍ତି । ପରିପୂରକ ପୁଷ୍ଟି ଯୋଜନା ମାଧ୍ୟମରେ ଅଙ୍ଗନବାଡି କେନ୍ଦ୍ରରେ ପଞ୍ଜିକୃତ ୬ମାସରୁ ୬ବର୍ଷ ବୟସ ପର୍ଯ୍ୟନ୍ତ ସମସ୍ତ ଶିଶୁଙ୍କୁ ପ୍ରତି ମାସରେ ୨୫ଦିନ ହିସାବରେ ବର୍ଷକୁ ୩୦୦ ଦିନ ପାଇଁ ପୁଷ୍ଟିକର ଆହାର ଯୋଗାଇ ଦିଆଯାଉଛି । ଏହି ଯୋଜନରେ ୬ମାସରୁ ୩ବର୍ଷ ବୟସ ପର୍ଯ୍ୟନ୍ତ ଶିଶୁଙ୍କୁ ଛତୁଆ, ଅଣ୍ଡା, ଲଡୁ, ଶୁଖିଲା ରାସନ ଇତ୍ୟାଦି ଯୋଗାଇ ଦିଆଯାଉଛି । ଯେଉଁମାନେ ଅଣ୍ଡା ଖାଉନାହାନ୍ତି ସେମାନଙ୍କୁ ଅତିରିକ୍ତ ଲଡୁ ଦିଆଯାଉଛି । ସେହିଭଳି ୩ ରୁ ୬ବର୍ଷ ବୟସର ଶିଶୁଙ୍କୁ ଅଙ୍ଗନବାଡି କେନ୍ଦ୍ରରେ ସକାଳ ଜଳଖିଆ ସହିତ ଗରମ ରନ୍ଧାଖାଦ୍ୟ ଦିଆଯାଉଛି ।
ଏହାଛଡା ଅତିଶୟ ପୁଷ୍ଟିହୀନ ୬ମାସରୁ ୫ବର୍ଷ ବୟସର ଶିଶୁଙ୍କୁ ପ୍ରତିଦିନ ୧୦୦ଗ୍ରାମ ଉନ୍ନତ ଛତୁଆ ସହିତ ଗୋଟିଏ ଅଣ୍ଡା କ୍ରମାଗତ ଭାବେ ୧୧୨ ଦିନ ପାଇଁ ଯୋଗାଇ ଦିଆଯାଉଛି । ଏଥି ସହିତ ଅତିଶୟ କମ୍ ଓଜନର ଶିଶୁଙ୍କୁ ବେସନ ଅଟା ମିଶ୍ରିତ ଖାଦ୍ୟ ସହିତ କଦଳୀ ଓ ଅଣ୍ଡା କ୍ରମାଣ ଭାବେ ୭୫ ଦିନ ପାଇଁ ମିଳୁଛି । ୩ ରୁ ୬ବର୍ଷ ବୟସର ଶିଶୁ, ଯେଉଁମାନେ ଅଙ୍ଗନବାଡି କେନ୍ଦ୍ରଠାରୁ ଦୂର ଦୂରାନ୍ତରେ ବସବାସ କରୁଛନ୍ତି ସେମାନଙ୍କୁ ତାଙ୍କଗ୍ରାମରେ ଉଭୟ ସକାଳ ଜଳଖିଆ ଏବଂ ଗରମ ରନ୍ଧାଖାଦ୍ୟ ଯୋଗାଇ ଦିଆଯାଉଛି ।
ଏତେ ସବୁ ସତ୍ୱେ ୨୦୨୩-୨୪ ରେ ଅପପୁଷ୍ଟି ଶିଶୁମାନଙ୍କର ହୋଇଥିବା ସର୍ବଶେଷ ଗଣନାର ସୂଚନା ଅନୁଯାୟୀ ରାଜ୍ୟରେ ୧୩,୭୩୬ ଜଣ ଅପପୁଷ୍ଟି ପୀଡିତ ଶିଶୁ ରହିଛନ୍ତି । ଏହି ତାଲିକାରେ ସବୁଠାରୁ ଆଗରେ ରହିଛନ୍ତି ମୟୁରଭଞ୍ଜ ଓ ନବରଙ୍ଗପୁର ଜିଲ୍ଲା । ମୟୁରଭଞ୍ଜରେ ୧୬୬୨ ପୁଷ୍ଟିହୀନ ଶିଶୁ ଥିବାବେଳେ ନବରଙ୍ଗପୁରରେ ଏହି ସଂଖ୍ୟା ୧୦୧୭ ରହିଛି । କେବଳ ଏହି ଦୁଇ ଆଦିବାସୀ ଜିଲ୍ଲା ନୁହେଁ ରାଜ୍ୟର ପ୍ରତ୍ୟେକ ଜିଲ୍ଲାରେ ପୁଷ୍ଟିହୀନ ଶିଶୁ ରହିଛନ୍ତି ।
ସବୁଠାରୁ କମ୍ ୬୩ଜଣ ପୁଷ୍ଟିହୀନ ଶିଶୁ ବୌଦ୍ଧ ଜିଲ୍ଲାରେ ଥିବାବେଳେ ଜଗତ୍ସିଂହପୁର ଜିଲ୍ଲାରେ ୬୪ଜଣ ରହିଛନ୍ତି । ଅନ୍ୟ ସମସ୍ତ ଜିଲ୍ଲାରେ ଏହି ସଂଖ୍ୟା ତିନି ଅଙ୍କରେ ରହିଛି । ରାଜ୍ୟ ରାଜଧାନୀ ଥିବା ଖୋରଧା ଜିଲ୍ଲାରେ ୨୮୨ ଜଣ ପୁଷ୍ଟିହୀନ ଶିଶୁ ଥିବା ରେକର୍ଡ ହୋଇଥିବାବେଳେ କଟକରେ ୩୫୬, ପୁରୀରେ ୨୭୮, କେନ୍ଦ୍ରାପଡାରେ ୨୨୨, କେନ୍ଦୁଝରରେ ୯୦୧, ଯାଜପୁରରେ ୩୯୫ ରହିଛି । ତେବେ ଆଶ୍ୱାସନାର କଥା ହେଉଛି ସରକାରୀ ହିସାବରେ ବର୍ଷକୁ ବର୍ଷ ରାଜ୍ୟରେ ପୁଷ୍ଟିହୀନ ଶିଶୁଙ୍କ ସଂଖ୍ୟା ହ୍ରାସ ପାଇବାରେ ଲାଗିଛି । ୨୦୧୯-୨୦ବର୍ଷରେ ରାଜ୍ୟରେ ୨୬,୮୨୭ ପୁଷ୍ଟିହୀନ ଶିଶୁ ଥିବା ରେକର୍ଡ ହୋଇଥିବାବେଳେ କ୍ରମାଗତ ଭାବେ ଏହି ସଂଖ୍ୟା ହ୍ରାସପାଇ ୨୦୨୧-୨୨ରେ ୧୬,୮୧୩ରେ ପହଞ୍ଚିଥିଲା । (ତଥ୍ୟ)