ଭୁବନେଶ୍ୱର: ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଦିଲ୍ଲୀପ ରାୟଙ୍କୁ ରାଉରକେଲା ବିଧାନସଭା ଆସନ ପାଇଁ ପ୍ରାର୍ଥୀ କରାଯାଇଛି।
ଶ୍ରୀ ରାୟ ବିଜେଡିର ବରିଷ୍ଠ ନେତା ତଥା ମନ୍ତ୍ରୀ ସାରଦା ପ୍ରସାଦ ନାୟକଙ୍କ ବିରୋଧରେ ଲଢ଼ିବେ। କଂଗ୍ରେସ ଏହି ଆସନ ପାଇଁ ବୀରେନ୍ଦ୍ର ନାଥ ପଟ୍ଟନାୟକଙ୍କୁ ପ୍ରାର୍ଥୀ କରିଛି।
ବିଜେପି ଆଜି ନିଜର ଦ୍ୱିତୀୟ ତାଲିକାରେ ୨୧ ଜଣ ବିଧାୟକ ପ୍ରାର୍ଥୀଙ୍କ ନାମ ଘୋଷଣା କରିଛି, ଯେଉଁଥିରେ ଦୁଇ ଜଣ ପ୍ରାର୍ଥୀ ବଦଳାଇବା ସହିତ ରାୟଙ୍କ ନାମ ରହିଛି।
ପୁରୀ ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ରଣପୁର ଓ କୋରାପୁଟ ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ ପଟ୍ଟାଙ୍ଗୀ ବିଧାନସଭା ନିର୍ବାଚନ ମଣ୍ଡଳୀ ପାଇଁ ଦଳ ପ୍ରାର୍ଥୀ ବଦଳାଇଛି।
ବିଜେପି ରଣପୁର ବିଧାନସଭା ଆସନରୁ ତାପସ ରଞ୍ଜନ ମାର୍ଥାଙ୍କ ସ୍ଥାନରେ ଦଳର ବରିଷ୍ଠ ନେତା ସୁରମା ପାଢ଼ୀଙ୍କୁ ପ୍ରାର୍ଥୀ କରିଥିବା ବେଳେ ଚୈତନ୍ୟ ହନ୍ତଲଙ୍କ ସ୍ଥାନରେ ଚୈତନ୍ୟ ନନ୍ଦିବାଲିଙ୍କୁ ପଟ୍ଟାଙ୍ଗୀ ଆସନରୁ ପ୍ରାର୍ଥୀ କରାଯାଇଛି।
ନିକଟରେ ବିଜେପିରେ ଯୋଗ ଦେଇଥିବା ପୂର୍ବତନ ବିଧାୟକଙ୍କ ସମେତ ୫ ଜଣ ବିଜେଡି ନେତାଙ୍କୁ ଦଳ ଟିକେଟ୍ ଦେଇଛି। ନେତାମାନେ ହେଲେ କୈଳାସ କୁଲେସିକା (ଲକ୍ଷ୍ମୀପୁର), ଭଦବ ହାଁସଦା (ସାରସକଣା), ଅମରେନ୍ଦ୍ର ଦାଶ (ଜଗତସିଂହପୁର), ଜଗନ୍ନାଥ ନନ୍ଦରୁକା (ବିଷମ କଟକ) ଓ ଡମ୍ବୁରୁ ସିସା (ଚିତ୍ରକୋଣ୍ଡା)।
ବିଜେପିର ଦ୍ବିତୀୟ ବିଧାୟକ ପ୍ରାର୍ଥୀ ତାଲିକାରେ ଦୁଇ ଜଣ ମହିଳା ପ୍ରାର୍ଥୀ ଅଛନ୍ତି। ସେମାନେ ହେଲେ ସୁରମା ପାଢ଼ୀ (ରଣପୁର) ଓ ସଞ୍ଜଳି ମୁର୍ମୁ (ବାଙ୍ଗିରିପୋଷି)।
ବିଜେପି ଏପର୍ଯ୍ୟନ୍ତ ଦୁଇଟି ପର୍ଯ୍ୟାୟରେ ୧୩୧ ବିଧାୟକ ଆସନ ପାଇଁ ପ୍ରାର୍ଥୀ ଘୋଷଣା କରିଛି। ଦଳ ସମସ୍ତ ୨୧ଟି ଆସନ ପାଇଁ ଲୋକସଭା ପ୍ରାର୍ଥୀଙ୍କ ନାମ ଘୋଷଣା କରିଛି।