ଭୁବନେଶ୍ଵର : ସହରରେ କ୍ରୀଡ଼ା ଓ ଫିଟ୍ ନେସ୍ ବିଶେଷ କରି ଟେବୁଲ୍ ଟେନିସ୍ ର ବିକାଶକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭୁବନେଶ୍ୱରରେ ଓଡ଼ିଶା ଟେବୁଲ୍ ଟେନିସ୍ ଏକାଡେମୀକୁ ଉଦଘାଟନ କରିଛନ୍ତି। ଏହି ଅବସରରେ ସେ ୨୯ତମ ରାଜ୍ୟ ଟେବୁଲ ଟେନିସ ଚାମ୍ପିଅନସିପ୍ ୨୦୨୩ର ଶୁଭାରମ୍ଭ କରିଥିଲେ।
ଓଡ଼ିଶା ଟେବୁଲ୍ ଟେନିସ୍ ଏକାଡେମୀରେ ୧୬ଟି ଟିଟି ଟେବୁଲ୍, ସୁସଜ୍ଜିତ ଜିମ୍ନାସିୟମ୍, ଭାରୋତ୍ତୋଳନ କକ୍ଷ ଓ ଚେସ୍ ଏରିଆ ସହ ବିଶାଳ ଟେବୁଲ୍ ଟେନିସ୍ ସ୍ଥାନ ରହିଛି।
ଏହାବ୍ୟତୀତ ଯୋଗ ଏବଂ ଯୁବ ଉତ୍ସାହୀମାନଙ୍କ ପାଇଁ ଉତ୍ସର୍ଗୀକୃତ ସ୍ଥାନ ଅଛି ଯାହା ଫିଟନେସ୍ ଏବଂ କଲ୍ୟାଣ ପାଇଁ ଏକ ସାମଗ୍ରିକ ଆଭିମୁଖ୍ୟସୁନିଶ୍ଚିତ କରେ । ଏହା ଦ୍ୱାରା ରାଜ୍ୟରୁ ନୂଆ ପିଢ଼ିର କ୍ରୀଡାବିତଙ୍କ ପାଇଁ ଏକ ପ୍ଲାଟଫର୍ମ ଉପଲବ୍ଧ ହେବ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ଓଡ଼ିଶା ଟେବୁଲ ଟେନିସ୍ ଏକାଡେମୀ ଉଦଘାଟନ ସହ ଟେବୁଲ ଟେନିସରେ କ୍ରୀଡ଼ାର ଉତ୍କର୍ଷତାକୁ ପ୍ରୋତ୍ସାହିତ କରିବା ଦିଗରେ ଆମେ ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଉଛୁ। ଏହି ଏକାଡେମୀ କେବଳ ଉଦୀୟମାନ ପ୍ରତିଭାକୁ ପ୍ରୋତ୍ସାହିତ କରିବ ନାହିଁ ବରଂ ମନୋରଞ୍ଜନ ଏବଂ ପ୍ରତିଯୋଗିତାମୂଳକ ଭାବନାର କେନ୍ଦ୍ର ଭାବରେ ମଧ୍ୟ କାର୍ଯ୍ୟ କରିବ।
ରାଜ୍ୟରେ ଇନଡୋର ହଲ୍ ରେ ୩୩ଟି ଟେବୁଲ ଟେନିସ୍ ସେଣ୍ଟର ପ୍ରତିଷ୍ଠା କରାଯାଉଛି ବୋଲି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଘୋଷଣା କରିଛନ୍ତି। ଡିସେମ୍ବର ୨୦୨୩ ସୁଦ୍ଧା ଏହି କେନ୍ଦ୍ରଗୁଡ଼ିକ କାର୍ଯ୍ୟକ୍ଷମ ହେବ ଏବଂ ଏଥିରେ ତିନୋଟି ଲେଖାଏଁ ଟେବୁଲ ଟେନିସ୍ ଟେବୁଲ ରହିବ। କଟକ ଟିଟି ଏକାଡେମୀ ମଧ୍ୟ ଖୁବ୍ ଶୀଘ୍ର ୧୬ଟି ଟେବୁଲ ସହ କାର୍ଯ୍ୟକ୍ଷମ ହେବ।
ରାଜ୍ୟରେ ଟେବୁଲ ଟେନିସକୁ ପ୍ରୋତ୍ସାହିତ କରିବା ଦିଗରେ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଥିବାରୁ ମୁଖ୍ୟମନ୍ତ୍ରୀ ଓଡ଼ିଶା ରାଜ୍ୟ ଟେବୁଲ ଟେନିସ ସଂଘକୁ ପ୍ରଶଂସା କରିବା ସହ ରାଜ୍ୟରୁ ଭାରତର ପ୍ରତିନିଧିତ୍ୱ କରିପାରୁଥିବା ଉତ୍କୃଷ୍ଟ ଟେବୁଲ ଟେନିସ୍ ଖେଳାଳି ସୃଷ୍ଟି କରିବା ପାଇଁ ସମସ୍ତ ପ୍ରକାର ସହଯୋଗ ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ।
ଟିଟିଏଫଆଇର ବିଶିଷ୍ଟ ବ୍ୟକ୍ତି ଶ୍ରୀ ଚୌଧୁରୀ ଏବଂ ଶ୍ରୀ କମଲେଶ ମେହେଟ୍ଟା କ୍ରୀଡ଼ା ପ୍ରତି ମୁଖ୍ୟମନ୍ତ୍ରୀଙ୍କ ଦୃଷ୍ଟିକୋଣ ଏବଂ ୨୦୧୯ରେ ରାଜ୍ୟଗୋଷ୍ଠୀ ଟିଟି ଚାମ୍ପିଅନସିପ୍ ଏବଂ ଜାତୀୟ ଟିଟି ଚାମ୍ପିୟନଶିପ୍ ଆୟୋଜନ ଦିଗରେ ସମର୍ଥନ ପାଇଁ ପ୍ରଶଂସା କରିଥିଲେ।
ଏହି ଅବସରରେ ୫ଟି ଓ ନବୀନ ଓଡ଼ିଶା ଅଧ୍ୟକ୍ଷ ଭି କେ ପାଣ୍ଡିଆନ, କ୍ରୀଡ଼ା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା, ଭୁବନେଶ୍ବର କେନ୍ଦ୍ର ବିଧାୟକ ଅନନ୍ତ ନାରାୟଣ ଜେନା, ଭୁବନେଶ୍ବର ମେୟର ସୁଲୋଚନା ଦାସ, ଉନ୍ନୟନ କମିଶନର ଅନୁ ଗର୍ଗ, ଓଏସଟିଟିଏ ସଭାପତି ସଞ୍ଜୟ ସିଂହ, କ୍ରୀଡ଼ା ସଚିବ ଆର୍ ଭିନୀଲ କ୍ରିଷ୍ଣା ପ୍ରମୁଖ ଉପସ୍ଥିତ ଥିଲେ।