ଭୁବନେଶ୍ୱର : ଓଡ଼ିଶା ସରକାରଙ୍କ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ମଙ୍ଗଳବାର ଏକ ରାଜ୍ୟ ସ୍ତରୀୟ ଜଳ ଗୁଣବତ୍ତା ନିଶ୍ଚିତକରଣ ସେଲ୍ ଉଦଘାଟନ କରାଯାଇଛି। ଗୃହ ଓ ନଗର ଉନ୍ନୟନ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଜି ମାଥିଭାଥନନ୍ ଏହେକୁ ଉଦଘାଟନ କରିଛନ୍ତି l ଏହା ଉନ୍ନତ ଜଳ ଗୁଣବତ୍ତା ମନିଟରିଂ ଏବଂ ନୀରିକ୍ଷଣକୁ ସୁଗମ କରିବ ଏହାସହ ରାଜ୍ୟର ସମସ୍ତ ସହରରେ ଜଳ ଉତ୍ସଠୁ ଗ୍ରାହକଙ୍କ ଘର ପର୍ଯ୍ୟନ୍ତ ବିଶୁଦ୍ଧ ପାନୀୟ ଜଳ ଯୋଗାଣ ବ୍ୟବସ୍ଥାକୁ ସୁନିଶ୍ଚିନ୍ତ କରିବ।
ଇଂ ଶିଶିର କୁମାର ରଥ ସେଲର ମୁଖ୍ୟ ଉପଦେଷ୍ଟା ଭାବରେ ନିଯୁକ୍ତ ହୋଇଛନ୍ତି। ଆବଶ୍ୟକତା ଅନୁଯାୟୀ ଜଳ ଗୁଣବତ୍ତା ସୁନିଶ୍ଚିତ ସେଲ୍ କୁ ବୈଷୟିକ ପରାମର୍ଶ ଯୋଗାଇବା ପାଇଁ ଆଇଆଇଟି ମାଡ୍ରାସ ସହିତ ଏକ ଏମଓୟୁ ସ୍ୱାକ୍ଷରିତ ହୋଇଛି।
ସେଲ୍ ଉଦଘାଟନୀ ସମାରୋହରେ ସମାବେଶକୁ ସମ୍ବୋଧିତ କରି ଅତିରିକ୍ତ ମୁଖ୍ୟ ଶାସନ ଶ୍ରୀ ମାଥୀଭାଥାନନ୍ କହିଛନ୍ତି “ଡ୍ରିଂକ ଫ୍ରମ ଟ୍ୟାପ୍ ମିଶନରେ ସଫଳତାର ସହିତ ୨୪ ଘଣ୍ଟିଆ ସହରାଞ୍ଚଳ ପାନୀୟ ଜଳ ଯୋଗାଣରେ ଓଡିଶା ଏକ ଉଦାହରଣ ପାଲଟିଛି। ସହରର ପ୍ରତ୍ୟେକ ପରିବାରକୁ ନିରନ୍ତର ନିରାପଦ ଜଳ ଯୋଗାଣ ବ୍ୟବସ୍ଥା ନିଶ୍ଚିନ୍ତ କରିବା ପାଇଁ ଓ ଗ୍ରାହକଙ୍କ ଆତ୍ମବିଶ୍ୱାସ ବୃଦ୍ଧି ନିମନ୍ତେ ପାଣିର ଗୁଣବତ୍ତା ସୁନିଶ୍ଚିତ କରିବା ସର୍ବଦା ଏକ ପ୍ରମୁଖ ଉପାଦାନ ଅଟେ।“
ସେ ଆହୁରି ମଧ୍ୟ କହିଛନ୍ତି ଯେ, “ୱାଟକୋ ଓ ପିଏଚ୍ଇଓ ଠାରୁ ସ୍ୱାଧୀନଭାବେ ଜଳ ଗୁଣବତ୍ତା ମନିଟରିଂ କାର୍ଯ୍ୟର ନିୟମିତ ତଦାରଖ ପାଇଁ ଏକ ବିଶେଷ ଜଳ ଗୁଣବତ୍ତା ନିଶ୍ଚିତକରଣ ସେଲ୍ ସ୍ଥାପନ କରି ଆଜି ଆମେ ଗୋଟିଏ ପାଦ ଆଗରେ ଅଛୁ।“
ବର୍ତ୍ତମାନ ପର୍ଯ୍ୟନ୍ତ ଗୋଟିଏ ରାଜ୍ୟ ସ୍ତରୀୟ ଜଳ ପରୀକ୍ଷାଗାର ସହିତ ଆଠଟି ଆଞ୍ଚଳିକ ଜଳ ପରୀକ୍ଷାଗାର, ଡ୍ରିଂକ ଫ୍ରମ ଟ୍ୟାପ୍ ସହର ଗୁଡିକରେ ଜଳର ଗୁଣବତ୍ତା ପରୀକ୍ଷଣ ପାଇଁ ଭ୍ରାମ୍ୟମାଣ ପରୀକ୍ଷାଗାର ରହିଛି। ଏହାସହ ଗୋଷ୍ଠୀ ସହିଭାଗିତାରେ ୱାଟକୋ ଓ ପିଏଚ୍ଇଓରେ କାର୍ଯ୍ୟରତ ଜଳସାଥି ସମସ୍ତ ସହରରେ ଗ୍ରାହକଙ୍କ ଟ୍ୟାପରୁ ଜଳ ପରୀକ୍ଷା କରିବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।
ନିୟମିତ ଭାବରେ ୱାଟକୋ ଏବଂ ପିଏଚଇଓର ଜଳର ଗୁଣବତ୍ତା ମନିଟରିଂ କରିବା ସହ ଏହି କାର୍ଯ୍ୟକୁ ବ୍ୟାପକ ଭାବରେ ସମୀକ୍ଷା ଏବଂ ତଦାରଖ କରିବା, ଜଳ ଗୁଣବତ୍ତା ମନିଟରିଂ ଢାଞ୍ଚା ଏବଂ ମୋଡାଲିଟିରେ ଉନ୍ନତି ପାଇଁ ସୁପାରିଶ କରିବା ସହ ଏହାର କାର୍ଯକାରିତାକୁ ସୁନିଶ୍ଚିତ କରିବା, ଜଳ ଗୁଣବତ୍ତା ମନିଟରିଂ ପାଇଁ ମାନକ କାର୍ଯ୍ୟପ୍ରଣାଳୀର ବିକାଶ, ଜଳର ଗୁଣବତ୍ତା ସମ୍ବନ୍ଧିତ ଘଟଣାକୁ ସମୀକ୍ଷା କରିବା ଏବଂ ତଦନୁଯାୟୀ ପଦକ୍ଷେପ ଗ୍ରହଣ କରିବା ଏହି ସେଲ୍ ର ମୁଖ୍ୟ କାର୍ଯ୍ୟ ରହିବ।
ମୁଖ୍ୟ ଉପଦେଷ୍ଟା ଶିଶିର କୁମାର ରଥ, ଆଇ ଆଇ ଟି ମାଡ୍ରାସର ଡଃ ବି ଏସ୍ ମୂର୍ତ୍ତି ଓ ଲିଗ୍ ଫିଲିପ୍ ଙ୍କ ସମେତ ଅନ୍ୟାନ୍ୟ ବିଭାଗୀୟ ପଦାଧିକାରୀମାନେ ଯୋଗଦେଇଥିଲେ l