ଭୁବନେଶ୍ୱର : ରାଜଧାନୀରେ ଥିବା ଭୂତଳ ଜଳଭଣ୍ଡାର ଓ ପାଣି ଟାଙ୍କି ପରିସରରେ ଜନବସତି ଗଢି ଉଠିବା ସହିତ ଗାଧୁଆଘର ଓ ପାଇଖାନା ର୍ନିମାଣ ହୋଇଛି । ତେବେ ଏହିସବୁ ନିଷିଦ୍ଧାଞ୍ଚଳରେ ବସବାସ କରିବାପାଇଁ କାହାରିକୁ ଅନୁମତି ଦିଆଯାଇନଥିବା ସରକାରୀ ଭାବେ ଉଲ୍ଲେଖ କରାଯାଇଛି ।
ସରକାରୀ ତଥ୍ୟ ଅନୁଯାୟୀ ରାଜଧାନୀରେ ମୋଟ୍ ୨୨୦ଟି ଭୂତଳ ଜଳଭଣ୍ଡାର ଓ ୮୭ଟି ପାଣି ଟାଙ୍କି ରହିଛି । ଏଥିରୁ ବହୁ ଜଳଭଣ୍ଡାର ଓ ପାଣିଟାଙ୍କି ପରିସରରେ ଲୋକେ ବସବାସ କରୁଛନ୍ତି । ଖୋଦ୍ ବିଧାୟକମାନଙ୍କ ସରକାରୀ ବାସଗୃହକୁ ଜଳଯୋଗାଣ ପାଇଁ ଥିବା ଭୂତଳ ଜଳଭଣ୍ଡାର ପରିସରରେ ଏକାଧିକ ଲୋକେ ବସବାସ କରିବା ସହିତ ଶୋଚାଳୟ ଓ ପାଇଖାନା ଆଦି ର୍ନିମାଣ କରିଛନ୍ତି ।
ସହରବାସୀଙ୍କୁ ଜଳଯୋଗାଣ ପାଇଁ ଥିବା ଏହିସବୁ ଭୂତଳ ଜଳଭଣ୍ଡାର ଓ ପାଣିଟାଙ୍କି ନିର୍ମାଣ ହୋଇଥିବା ଅଞ୍ଚଳ ନିଷିଦ୍ଧାଞ୍ଚଳ ହୋଇଥିବାବେଳେ ସେଠାରେ ବସବାସ ପାଇଁ ବାସଗୃହ ଓ ଶୌଚାଳୟ ଆଦି ପ୍ରତିଷ୍ଠା ନିମନ୍ତେ ସରକାର କାହାରିକୁ ଅନୁମତି ଦେଇ ନାହାନ୍ତି । ହେଲେ ଅନେକ ପାଣିଟାଙ୍କି ପରିସରରେ ଲୋକେ ଦୀର୍ଘଦିନ ଧରି ବସବାସ କରୁଛନ୍ତି ।
ସବୁଠାରୁ ଆଶ୍ଚର୍ଯ୍ୟର କଥା ହେଉଛି କେତେକ ଜଳଭଣ୍ଡାର ଓ ପାଣିଟାଙ୍କି ପରିସରରେ ଜଳଯୋଗାଣ ସଂସ୍ଥାର ଦପ୍ତର ପ୍ରତିଷ୍ଠା ହୋଇଛି । ଏଠାକୁ ପ୍ରତିଦିନ ବିଭାଗର ଯନ୍ତ୍ରୀଙ୍କ ଠାରୁ ଅଧିକାରୀଙ୍କ ପର୍ଯ୍ୟନ୍ତ ସମସ୍ତେ ଆସୁଛନ୍ତି । ଲୋକେ ବସବାସ କରୁଥିବା ଦେଖୁଛନ୍ତି । ଏହା ପରିସରରେ ପାଇଖାନା ଓ ଗାଧୁଆଘର ତିଆରି ସହିତ ବ୍ୟବହାର ହେଉଥିବା ଦେଖୁଥିଲେ ମଧ୍ୟ କ’ଣ ପାଇଁ ନିରବ ରହୁଛନ୍ତି ତାହା ବଡ ପ୍ରଶ୍ନବାଚୀ ହୋଇଛି ।
ପାନୀୟଜଳ ଯୋଗାଣ ପାଇଁ ନିର୍ମାଣ ହୋଇଥିବା ଭୂତଳ ଜଳଭଣ୍ଡାର ଓ ପାଣିଟାଙ୍କି ଅଞ୍ଚଳ ଅତ୍ୟନ୍ତ ସମ୍ବେଦନଶୀଳ ହୋଇଥିବାରୁ ଏଠାରେ କର୍ତ୍ତୃପକ୍ଷ ନିଷିଦ୍ଧାଞ୍ଚଳ ବୋଲି ଫଳକ ମାରିଛନ୍ତି । ଏହା ଭିତରକୁ ବିନାନୁମତିରେ ପ୍ରବେଶ ନିଷିଦ୍ଧ । କାରଣ ଅନୁପ୍ରବେଶକାରୀମାନେ ଜଳକୁ ଦୂଷିତ ବା ବିଷାକ୍ତ କରିବାର ଭୟ ରହିଛି । ଏଥି ସହିତ ଭୂତଳ ଜଳଭଣ୍ଡାର ନିକଟରେ ଶୌଚାଳୟ ନିର୍ମାଣ ହେଲେ ଏହାର ବର୍ଜ୍ୟଜଳ ଭୂତଳ ଜଳଭଣ୍ଡାର ଜଳରେ ବି ମିଶିବାର ସମ୍ଭାବନା ଅଛି । ତେଣୁ ଏହି ଅଞ୍ଚଳକୁ ସର୍ବସାଧାରଣଙ୍କ ପ୍ରବେଶ ଉପରେ କଡା କଟକଣା ରହିଛି ।
ହେଲେ ଏବେ ରାଜଧାନୀର ଅଧିକାଂଶ ଭୂତଳ ଜଳଭଣ୍ଡାର, ପାଣିଟାଙ୍କି ଓ ପମ୍ପହାଉସ୍ ପରିସରରେ ଏକାଧିକ ଲୋକେ ପରିବାର ସହିତ ବସବାସ କରୁଛନ୍ତି । ଏମାନଙ୍କୁ ଏଠାରେ ଘର ତିଆରି କରି ରହିବାପାଇଁ କିଏ ଅନୁମତି ପ୍ରଦାନ କରିଛି ଓ ସେମାନଙ୍କ ଠାରୁ ଭଡା କିଏ ଆଦାୟ କରୁଛି ତାହା ବଡ ପ୍ରଶ୍ନବାଚୀ ହୋଇଛି । ଖୋଦ ରାଜଧାନୀରେ ଜଳଯୋଗାଣ ଦାୟିତ୍ୱରେ ଥିବା ଯନ୍ତ୍ରୀ ଓ ଅଧିକାରୀମାନେ ଏଭଳି ବେଆଇନ୍ କାର୍ଯ୍ୟକୁ କିଭଳି ପ୍ରଶୟ ଦେଉଛନ୍ତି ଓ ସବୁ ଦେଖି ନଦେଖିଲା ଭଳି ହେଉଛନ୍ତି ତାହା ଏବେ ସହରବାସୀଙ୍କୁ ଆଶ୍ଚର୍ଯ୍ୟ କରିବା ସହିତ ସେମାନଙ୍କ ମନରେ ଭୟ ସୃଷ୍ଟି କରିବାରେ ଲାଗିଛି । (ତଥ୍ୟ)