ଭୁବନେଶ୍ୱର : ଗୋପବନ୍ଧୁ ଶିକ୍ଷା ସହାୟତା ଯୋଜନା (ଜିଏସ୍ଏସ୍ୱାଇ) ଅଧୀନରେ ଆବେଦନ ମଞ୍ଜୁର ଦୀର୍ଘ ଦିନ ଧରି ବିଳମ୍ବ ହେଉଥିବାରୁ ସେ ନେଇ ରାଜ୍ୟ ସରକାର ଉଦ୍ବେଗ ପ୍ରକାଶ କରିବା ସହିତ ଗତ ଦୁଇ ବର୍ଷର ବାକି ଥିବା ଆବେଦନଗୁଡ଼ିକୁ ଏକ ମାସ ମଧ୍ୟରେ ଫଏସଲା କରିବାକୁ ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି । ଏ ନେଇ ଉଚ୍ଚଶିକ୍ଷା ବିଭାଗର ଯୁଗ୍ମ ସଚିବ ପ୍ରତିଭା ସାହୁ ସୋମବାର ସମସ୍ତ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ।
ଗୋପବନ୍ଧୁ ଶିକ୍ଷା ସହାୟତା ଯୋଜନା ଛାତ୍ରବୃତ୍ତି ତଥ୍ୟକୁ ବିଶ୍ଳେଷଣ କରିବା ପରେ ଜଣାପଡିଛି ଯେ ୨୦୨୧-୨୨ ଓ ୨୦୨୨-୨୩ ଶିକ୍ଷାବର୍ଷରେ ଜିଲ୍ଲା କଲ୍ୟାଣ ଅଧିକାରୀ (ଡିଡବ୍ଲୁଓ) ସ୍ତରରେ ଯଥାକ୍ରମେ ୧୭୨ ଓ ୭୨୭ ଟି ଜିଏସଏସୱାଇ ଆବେଦନ ବିଚାରାଧୀନ ରହିଛି ବୋଲି ଶ୍ରୀମତୀ ସାହୁ କହିଛନ୍ତି । ଏହି ଆବେଦନଗୁଡ଼ିକୁ ଏପର୍ଯ୍ୟନ୍ତ ସୁପାରିସ, ବୈଧତା ସହିତ ଉଚ୍ଚଶିକ୍ଷା ବିଭାଗକୁ ପଠାଯାଇ ନାହିଁ ।
ତେଣୁ ବୈଧତା ପ୍ରକ୍ରିୟାକୁ ତ୍ୱରାନ୍ୱିତ କରି ୨୦୨୧-୨୨ ଓ ୨୦୨୨-୨୩ ଶିକ୍ଷାବର୍ଷ ପାଇଁ ପଡ଼ି ରହିଥିବା ଜିଏସ୍ଏସ୍ୱାଇ ଛାତ୍ରବୃତ୍ତି ଆବେଦନଗୁଡ଼ିକୁ ଏକ ମାସ ମଧ୍ୟରେ ଉଚ୍ଚଶିକ୍ଷା ବିଭାଗକୁ ସୁପାରିସ କରିବାକୁ ଜିଲ୍ଲାପାଳମାନଙ୍କୁ ଅନୁରୋଧ କରାଯାଇଛି ।
୨୦୨୧-୨୨ ଶିକ୍ଷାବର୍ଷ ପାଇଁ ଓଡ଼ିଶାର ୧୩ଟି ଜିଲ୍ଲାରେ ୨୯ଟି କଲେଜର ମୋଟ ୧୭୨ଟି ଆବେଦନ ବିଚାରାଧୀନ ରହିଛି । ସେହିପରି ୨୦୨୨-୨୩ ବର୍ଷ ପାଇଁ ୨୦ଟି ଜିଲ୍ଲାର ୧୩୧ଟି କଲେଜର ୭୨୭ଟି ଜିଏସ୍ଏସ୍ୱାଇ ଆବେଦନ ପଡ଼ି ରହିଛି ।
ଏହାବ୍ୟତୀତ ୨୦୨୧-୨୨ ଓ ୨୦୨୨-୨୩ ଶିକ୍ଷାବର୍ଷରେ ଜିଏସ୍ଏସ୍ୱାଇ ଛାତ୍ରବୃତ୍ତି ପାଇଁ ସୁପାରିଶ କରାଯାଇଥିବା ଛାତ୍ରଛାତ୍ରୀଙ୍କ ତାଲିକା ସହିତ ସମ୍ପୃକ୍ତ ଜିଲ୍ଲାପାଳଙ୍କ ଦ୍ୱାରା ଗଠିତ କମିଟି କାର୍ଯ୍ୟର ହାର୍ଡ କପି ପରବର୍ତ୍ତୀ ପଦକ୍ଷେପ ନେବା ପାଇଁ ଦାଖଲ କରିବାକୁ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଗୋପବନ୍ଧୁ ଶିକ୍ଷା ସହାୟତା ଯୋଜନା ହେଉଛି ଏଚଆଇଭି/ଏଡ୍ସ ପୀଡ଼ିତ ଅଭିଭାବକଙ୍କ ସମେତ ଅବହେଳିତ ବର୍ଗର ଛାତ୍ରଛାତ୍ରୀଙ୍କୁ ବାର୍ଷିକ ୨୦,୦୦୦ ଟଙ୍କା ହିସାବରେ ଆର୍ଥିକ ସହାୟତା ପ୍ରଦାନ ନିମନ୍ତେ କାର୍ଯ୍ୟକାରୀ ହେଉଥିବା ଏକ ରାଜ୍ୟ ଯୋଜନା; ଏଥିରେ ବାସହୀନ ପରିବାର; ନିରାଶ୍ରୟ; ସଫେଇବାଲା; ବିଶେଷ କରି ଦୁର୍ବଳ ଆଦିବାସୀ ଶ୍ରେଣୀ; ରାଜ୍ୟରେ ସାଧାରଣ ଓ ବୈଷୟିକ/ବୃତ୍ତିଗତ ପାଠ୍ୟକ୍ରମରେ ସ୍ନାତକ ଓ ସ୍ନାତକୋତ୍ତର ପାଠ ପଢ଼ିବା ପାଇଁ ଆଇନଗତ ଭାବେ ଥିବା ଦାଦନ ଶ୍ରମିକ ଓ ଏକକ ମାତୃ ପରିବାରକୁ ସାମିଲ କରାଯାଇଛି ।
ଉଲ୍ଲେଖଯୋଗ୍ୟ, ଗୋପବନ୍ଧୁ ଶିକ୍ଷା ସହାୟତା ଯୋଜନାର ହିତାଧିକାରୀମାନେ ପାଠ୍ୟକ୍ରମ ଶେଷ ହେବା ପର୍ଯ୍ୟନ୍ତ ପ୍ରତିବର୍ଷ ୨୦ ହଜାର ଟଙ୍କା କରି ପାଉଛନ୍ତି । (ତଥ୍ୟ)