ଭୁବନେଶ୍ୱର : ରାଜ୍ୟ ସରକାର ଗଞ୍ଜେଇ ବିରୁଦ୍ଧରେ ବର୍ଷ ସାରା ଅଭିଯାନ ଚଳାଉଥିବାବେଳେ ଗଞ୍ଜେଇ ଗଛ ପତ୍ରରୁ ପ୍ରସ୍ତୁତ ଭାଙ୍ଗ ବିକ୍ରିକୁ କିନ୍ତୁ ଅନୁମତି ପ୍ରଦାନ କରୁଛନ୍ତି । ରାଜ୍ୟର ନଅଟି ଜିଲ୍ଲାରେ ଭାଙ୍ଗ ବିକ୍ରିକୁ ସରକାର ଅନୁମତି ପ୍ରଦାନ ବି କରିଛନ୍ତି ।
ଗଞ୍ଜେଇ ଚାଷ ଓ ଚାଲାଣ ପାଇଁ ଓଡିଶା ସାରା ଦେଶରେ କୁଖ୍ୟାତି ଅର୍ଜନ କରିଛି । ଓଡିଶାର ଗଞ୍ଜେଇ ମାୟାନଗରୀ ମୁମ୍ବାଇ ଠାରୁ ଆରମ୍ଭ କରି ଦେଶର ବିଭିନ୍ନ ପ୍ରାନ୍ତରୁ ଜବତ ହେବାରେ ଲାଗିଛି । ଅନ୍ୟ ରାଜ୍ୟର ଅବକାରୀ ଓ ପୁଲିସ୍ ଟିମ୍ ମଧ୍ୟ ଏ ନେଇ ରାଜ୍ୟରେ ବାରମ୍ବାର ଚଢଉ କରୁଛନ୍ତି । ରାଜ୍ୟ ଭିତରେ ଗଞ୍ଜେଇର ଚୋରା ଚାଲାଣ ବି କିଛି କମ୍ ନୁହେଁ ।
ଗଞ୍ଜେଇ ଅପବାଦରୁ ବର୍ତ୍ତିବା ସହତ ଚୋରା ନିଶା କାରବାର ଉପରେ ବ୍ରେକ୍ ଲଗାଇବାପାଇଁ ରାଜ୍ୟ ସରକାର ବର୍ଷ ସାରା ଗଞ୍ଜେଇ ବିରୁଦ୍ଧରେ ଅଭିଯାନ ଚଳାଇଛନ୍ତି । ଗଞ୍ଜେଇ ଗଛ କାଟି ପୋଡିବା ସହିତ ଚୋରାରେ ଚାଲାଣ ହେଉଥିବା ଗଞ୍ଜେଇକୁ ବି ଧରୁଛନ୍ତି । ଏଥିପାଇଁ ଅର୍ଥ, ମାନବସମ୍ବଳ ଓ ସମୟର ବିପୁଳ ଅପଚୟ ହେଉଛି ।
ହେଲେ ଏତେ ସବୁ ସତ୍ୱେ ଗଞ୍ଜେଇ ଗଛର ପତ୍ରରୁ ପ୍ରସ୍ତୁତ ଭାଙ୍ଗ ବିକ୍ରି ପାଇଁ କିନ୍ତୁ ରାଜ୍ୟ ସରକାର ଅନୁମତି ପ୍ରଦାନ କରିଛନ୍ତି । ରାଜ୍ୟରେ ୯୦ଟି ଭାଙ୍ଗ ଦୋକାନକୁ ଅନୁମତି ପ୍ରଦାନ କରାଯାଇଥିବାବେଳେ ଏଥିରୁ ଚଳିତ ଆର୍ଥିକ ବର୍ଷରେ ସରକର ଦେଢ କୋଟି ଟଙ୍କାରୁ ଅଧିକ ରାଜସ୍ୱ ପାଇଛନ୍ତି । ଏହି ଲାଇସେନ୍ସପ୍ରାପ୍ତ ଭାଙ୍ଗଦୋକାନଗୁଡିକ ବ୍ରହ୍ମପୁର, ଭଦକ୍ର, ଭୁବନେଶ୍ୱର, କଟକ, ଗଞ୍ଜାମ, ଜଗତ୍ସିଂହପୁର, କନ୍ଧମାଳ, ଖୋରଧା ଓ ପୁରୀ ଅବକାରୀ ଜିଲ୍ଲାରେ ରହିଛି ।
ସର୍ବାଧିକ ୩୫ଟି ଭାଙ୍ଗ ଦୋକାନକୁ ପୁରୀ ଜିଲ୍ଲାରେ ଲାଇସେନ୍ସ ପ୍ରଦାନ କରାଯାଇଥିବାବେଳେ କଟକରେ ୨୮ଟି ଭାଙ୍ଗ ଦୋକାନକୁ ଅନୁମତି ମିଳିଛି । ଅନ୍ୟଗୁଡିକ ମଧ୍ୟରେ ଜଗତ୍ସିଂହପୁରରେ ୮ଟି, ଭୁବନେଶ୍ୱରରେ ୭, ଭଦ୍ରକରେ ୫, ଖୋରଧାରେ ୩ଟି, ଗଞ୍ଜାମରେ ୨ଟି ଏବଂ ବ୍ରହ୍ମପୁର ଓ କନ୍ଧମାଳରେ ଗୋଟିଏ କରି ଲାଇସେନ୍ସପ୍ରାପ୍ତ ଭାଙ୍ଗ ଦୋକାନ ରହିଛି ।
ନିଶାନିବାରଣ କ୍ଷେତ୍ରରେ କାର୍ଯ୍ୟରତ ସ୍ୱେଚ୍ଛାସେବୀମାନଙ୍କ ମତରେ ସରକାର ଗୋଟିଏ ହାତରେ ଗଞ୍ଜେଇ ଗଛ ଓପାଡୁ ଥିବାବେଳେ ଅନ୍ୟ ହାତରେ ଏହି ଗଛର ପତ୍ରକୁ ବିକ୍ରି କରିବା ଅତ୍ୟନ୍ତ ଆଶ୍ଚର୍ଯ୍ୟଜନକ । ଏଭଳି ଲାଇସେନ୍ସ ପ୍ରଦାନ ଗଞ୍ଜେଇ ଚାଷକୁ ଅନେକ କ୍ଷେତ୍ରରେ ପ୍ରୋତ୍ସାହିତ କରୁଛି । ଯଦି ସରକାର ଗଞ୍ଜେଇ ଗଛ ବିରୁଦ୍ଧରେ ଅଭିଯାନ ଆରମ୍ଭ କରୁଛନ୍ତି ଓ ଲକ୍ଷ ଲକ୍ଷ ଟଙ୍କା ଖର୍ଚ୍ଚକରି ତାହାକୁ ପୋଡୁଛନ୍ତି ତେବେ ଭାଙ୍ଗ ଆସୁଛି କେଉଁଠୁ ? ଭାଙ୍ଗ ଚାଷୀଙ୍କ ବିରୁଦ୍ଧରେ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି କି ନାହିଁ । ଯେଉଁ ଭାଙ୍ଗରୁ ସରକାର ବର୍ଷକୁ ଦେଢ କୋଟି ଟଙ୍କାରୁ ଅଧିକ ରାଜସ୍ୱ ଆଦାୟ କରୁଛନ୍ତି ସେଗୁଡିକ କେଉଁଠାରୁ ଉତ୍ପାଦନ ହେଉଛି ଏବଂ ଯେଉଁ ଗଛରୁ ଏହି ପତ୍ରଗୁଡିକ ସଂଗ୍ରହ ହେଉଛି ସେହି ଗଛରେ ଗଞ୍ଜେଇ ହେଉଛି କି ନାହିଁ ତାହା ବଡ ପ୍ରଶ୍ନବାଚୀ ହୋଇଛି । ତେଣୁ ଗଞ୍ଜେଇ ଭଳି ଭାଙ୍ଗକୁ ସମ୍ପୂର୍ଣ୍ଣ ନିଷେଧ ପାଇଁ ନିଶାନିବାରଣ କର୍ମୀମାନେ ମତ ଦେଉଛନ୍ତି । (ତଥ୍ୟ)
ଶିଶୁ ଅପପୁଷ୍ଟି – ଦୁଇ ଆଦିବାସୀ ଜିଲ୍ଲା ଆଗରେ