ଭୁବନେଶ୍ୱର : ଓଡିଶା ଖଦି ଓ ଗ୍ରାମୋଦ୍ୟୋଗ ବୋର୍ଡର ଭୁବନେଶ୍ୱରରେ ଥିବା ଜମି ମଧ୍ୟରୁ ୨ଏକର ମୂଲ୍ୟବାନ ଜମି ଜବରଦଖଲ ହୋଇଥିବାବେଳେ ବ୍ରହ୍ମପୁରରେ ଥିବା ସମସ୍ତ ଜମି ଜବରଦଖଲ ହୋଇଯାଇଛି । ବିଜେପି ବିଧାୟକ ଟଙ୍କଧର ତ୍ରିପାଠୀ ପଚାରିଥିବା ପ୍ରଶ୍ନର ଉତ୍ତରରେ ବିଧାନସଭାରେ ଏହି ସୂଚନା ଦେଛନ୍ତି ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ।
ଖଦି ବୋର୍ଡ ସଂକ୍ରାନ୍ତରେ ପଚରାଯାଇଥିବା ପ୍ରଶ୍ନର ଉତ୍ତରରେ ମନ୍ତ୍ରୀ କହିଛନ୍ତି ଯେ ଭୁବନେଶ୍ୱର ତହସିଲ ଅର୍ନ୍ତଗତ ଭୀମପୁର ମୌଜାରେ ଥିବା ୬ଏକର ଜାଗା ମଧ୍ୟରୁ ୨ଏକର ଜାଗା ଜବରଦଖଲ ହୋଇଯାଇଛି । ଏହି ଜାଗାକୁ ଜବରଦଖଲମୁକ୍ତ କରିବାପାଇଁ ସାଧାରଣ ପ୍ରଶାସନ ବିଭାଗ, ବିଡିଏ, ବିଏମ୍ସି କମିଶନଙ୍କୁ ଅନୁରୋଧ କରାଯାଇଛି । ସେହିଭଳି ଗଞ୍ଜାମ ଜିଲ୍ଲାର ବ୍ରହ୍ମପୁର ସହରର ମାଧପୁର ମୌଜା ଠାରେ ଥିବା ଖଦି ବୋର୍ଡର ୦.୦୨୮ ଏକର ଜମି ରହିଛି ଏବଂ ଏହା ସମ୍ପୂର୍ଣ୍ଣ ଜବରଦଖଲରେ ଅଛି । ଏହାକୁ ମୁକୁଳାଇବାପାଇଁ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।
ଖଦିବୋର୍ଡର କାରବାର ସଂକ୍ରାନ୍ତରେ ମନ୍ତ୍ରୀ କହିଛନ୍ତି ଯେ ବୋର୍ଡର ପ୍ରମୁଖ ବ୍ୟବସାୟ ଘଣା ସୋରିଷ ତେଲ ଓ ମହୁ ଉତ୍ପାଦନ ହ୍ରାସ ପାଇବାରେ ଲାଗିଛି । ୨୦୧୯-୨୦ ବର୍ଷରେ ବୋର୍ଡର ୭୫୦୩ କିଲୋ ସୋରିଷ ତେଲ ଉତ୍ପାଦନ କରିଥିବାବେଳେ ୨୦୨୩-୨୪ ରେ ଏହା ୩୯୨୫କୁ ହ୍ରାସ ପାଇଛି । ସେହିଭଳି ୨୦୧୯-୨୦ ବର୍ଷରେ ୫୪୫୪ କିଲୋ ମହୁ ଉତ୍ପାଦନ କରିଥିବାବେଳେ ୨୦୨୩-୨୪ ବର୍ଷରେ ତାହା ୩୯୨୦ କିଲୋକୁ ହ୍ରାସ ପାଇଛି । ଖଦିବୋର୍ଡର ଘଣା ସୋରିଷ ତେଲ ବେଶ୍ ଲୋକପ୍ରିୟ ଥିବାବେଳେ ଏହାର ଉତ୍ପାଦନ କିନ୍ତୁ ବର୍ଷକୁ ବର୍ଷ କମିବାରେ ଲାଗିଛି ।
ସେହିଭଳି ବୋର୍ଡକୁ ମିଳିଥିବା ଅନୁଦାନ ସଂକ୍ରାନ୍ତରେ ମନ୍ତ୍ରୀ କହିଛନ୍ତି ଯେ ଗତ ପାଞ୍ଚବର୍ଷ ମଧ୍ୟରେ ଓଡିଶା ଖଦି ଓ ଗ୍ରାମୋଦ୍ୟୋଗ ବୋର୍ଡରୁ କେନ୍ଦ୍ର ସରକାରଙ୍କୁ ଠାରୁ କୌଣସି ପ୍ରକାର ସହାୟତା ମିଳିନାହିଁ । ତେବେ ରାଜ୍ୟ ସରକାର ଏହି ସମୟ ମଧ୍ୟରେ ଯୋଜନ ଓ ଅଣଯୋଜନା ବାବଦରେ ୫୮କୋଟି ୫୬ଲକ୍ଷ ଟଙ୍କା ପ୍ରଦାନ କରିଛନ୍ତି । ଏହି ଅର୍ଥ ପ୍ରଶାସନିକ ବ୍ୟୟ ପାଇଁ ମିଳିଛି ।