ଭୁବନେଶ୍ୱର : ପତ୍ର ସୂଚନା କାର୍ଯ୍ୟାଳୟ (ପିଆଇବି)ର ଗଣମାଧ୍ୟମ ପରିଦର୍ଶନ କାର୍ଯ୍ୟକ୍ରମ ଅନ୍ତର୍ଗତ ଓଡ଼ିଶାର ଏକ ଗଣମାଧ୍ୟମ ପ୍ରତିନିଧି ଦଳ କେରଳର ରାଜ୍ୟପାଳ ଶ୍ରୀ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କୁ ଭେଟିଛନ୍ତି। ଏହି ପ୍ରତିନିଧି ଦଳ କେରଳ ରାଜ୍ୟପାଳଙ୍କ ସହ ପ୍ରଶାସନ, ସହଯୋଗୀ ସଂଘୀୟ ବ୍ୟବସ୍ଥା ଏବଂ ରାଜ୍ୟରେ ଗ୍ରହଣ କରାଯାଇଥିବା ବିଭିନ୍ନ ବିକାଶମୂଳକ ପଦକ୍ଷେପ ଓ ନୀତିଗତ ହସ୍ତକ୍ଷେପର ପ୍ରମୁଖ ଦିଗଗୁଡ଼ିକ ଉପରେ ଫଳପ୍ରଦ ଏବଂ ବିସ୍ତୃତ ଆଲୋଚନା କରିଥିଲେ।
ଆଲୋଚନା ସମୟରେ ରାଜ୍ୟପାଳ କହିଥିଲେ, ସାମାଜିକ କ୍ଷେତ୍ର, ବିଶେଷକରି ସ୍ୱାସ୍ଥ୍ୟ ଏବଂ ଶିକ୍ଷା କ୍ଷେତ୍ରରେ କେରଳ ଅନେକ ସଫଳତା ହାସଲ କରିଛି । ରାଜ୍ୟ ମାନବ ବିକାଶ ସୂଚକାଙ୍କରେ ନିରନ୍ତର ଭଲ ପ୍ରଦର୍ଶନ କରିଛି। ସେ କେରଳର ସୁଦୃଢ଼ ସ୍ୱାସ୍ଥ୍ୟ ଭିତ୍ତିଭୂମି ଏବଂ ରାଜ୍ୟର ଶତ ପ୍ରତିଶତ ସାକ୍ଷରତା ହାସଲ ବିଷୟରେ ଉଲ୍ଲେଖ କରିଥିଲେ। ଏଥିସହିତ ସମାବେଶୀ ଏବଂ ଦୀର୍ଘସ୍ଥାୟୀ ବିକାଶରେ ଶିକ୍ଷାର ଭୂମିକା ଉପରେ ଗୁରୁତ୍ୱାରୋପ କରିଥିଲେ।
ରାଜ୍ୟପାଳ କେରଳର ସମୃଦ୍ଧ ସାଂସ୍କୃତିକ ଐତିହ୍ୟ, ପ୍ରାକୃତିକ ସୌନ୍ଦର୍ଯ୍ୟ ଏବଂ ଉଚ୍ଚ ସ୍ୱଚ୍ଛତା ମାନଦଣ୍ଡ ବିଷୟରେ ମଧ୍ୟ କହିଥିଲେ। ଏଗୁଡ଼ିକୁ ସେ ରାଜ୍ୟ ପରିଚୟର ଅବିଚ୍ଛେଦ୍ୟ ଅଙ୍ଗ ଭାବରେ ବର୍ଣ୍ଣନା କରିଥିଲେ। ଓଡ଼ିଶା ସହିତ ତାଙ୍କର ସମ୍ପର୍କକୁ ମନେ ପକାଇ ସେ ରାଜ୍ୟ ଗସ୍ତର ଅଭିଜ୍ଞତା ବାଣ୍ଟିଥିଲେ ଏବଂ ପରିଦର୍ଶନରେ ଆସିଥିବା ସାମ୍ବାଦିକମାନଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇଥିଲେ। ଏହି ଆଲୋଚନାରେ ଗଣତାନ୍ତ୍ରିକ ପ୍ରଶାସନ ଏବଂ ସାମ୍ବିଧାନିକ ପ୍ରତିଷ୍ଠାନଗୁଡ଼ିକର ଭୂମିକା ଉପରେ ଆଲୋକପାତ କରାଯାଇଥିଲା। ଏହି ପ୍ରତିନିଧି ଦଳ ରାଜ୍ୟପାଳଙ୍କୁ ସେମାନଙ୍କ କେରଳ ଗସ୍ତ ବିଷୟରେ ସୂଚନା ଦେଇଥିଲେ ଏବଂ ସେମାନଙ୍କର ଅଭିଜ୍ଞତା ବାଣ୍ଟିଥିଲେ।
ପ୍ରତିନିଧି ଦଳ ଭିଝିଞ୍ଜମ ଅନ୍ତର୍ଜାତୀୟ ସାମୁଦ୍ରିକ ବନ୍ଦର ମଧ୍ୟ ପରିଦର୍ଶନ କରିଥିଲେ। ସେଠାରେ ସେମାନଙ୍କୁ ବନ୍ଦରର ଭିତ୍ତିଭୂମି, ପରିଚାଳନାଗତ କାର୍ଯ୍ୟଦକ୍ଷତା ଏବଂ ରଣନୀତିକ ଗୁରୁତ୍ୱ ବିଷୟରେ ସୂଚନା ଦିଆଯାଇଥିଲା। ଭିଝିଞ୍ଜମ ଅନ୍ତର୍ଜାତୀୟ ବନ୍ଦର ବାଣିଜ୍ୟିକ କାର୍ଯ୍ୟର ଗୋଟିଏ ବର୍ଷ ପୂରଣ କରିଛି ଏବଂ ଭାରତର ସବୁଠାରୁ ଉନ୍ନତ ଗଭୀର ଜଳ ବନ୍ଦର ମଧ୍ୟରୁ ଅନ୍ୟତମ ଭାବରେ ଉଭା ହୋଇଛି। ୧୮-୨୦ ମିଟର ପ୍ରାକୃତିକ ସାମୁଦ୍ରିକ ଗଭୀରତା ଏବଂ ପ୍ରମୁଖ ପୂର୍ବ-ପଶ୍ଚିମ ଅନ୍ତର୍ଜାତୀୟ ଜାହାଜ ମାର୍ଗ ସହିତ ସଂଯୋଗ ହୋଇଥିବା ଏହି ବନ୍ଦର ସର୍ବନିମ୍ନ ଡ୍ରେଜିଂ ସହିତ ଅଲ୍ଟ୍ରା ଲାର୍ଜ କଣ୍ଟେନର ଜାହାଜ (ୟୁଏଲସିଭି) ପରିଚାଳନା କରିବାକୁ ସକ୍ଷମ। ଓଡ଼ିଶା ଗଣମାଧ୍ୟମ ପ୍ରତିନିଧି ଦଳକୁ ବନ୍ଦରର ସ୍ୱୟଂଚାଳିତ ବ୍ୟବସ୍ଥା, ପ୍ରଯୁକ୍ତି-ଚାଳିତ ପ୍ରଣାଳୀ ଏବଂ ଉଚ୍ଚ କାର୍ଯ୍ୟ ଦକ୍ଷତା ବିଷୟରେ ସୂଚନା ଦିଆଯାଇଥିଲା। ଏସବୁ ସୁବିଧା ଭିଝିଞ୍ଜମକୁ ଏକ ଗୁରୁତ୍ୱପୂର୍ଣ୍ଣ ପଣ୍ୟ କାରବାର କେନ୍ଦ୍ର ରୂପେ ସ୍ଥାନିତ କରେ ଏବଂ ବିଶ୍ୱ ସାମୁଦ୍ରିକ ବାଣିଜ୍ୟରେ ଭାରତର ଭୂମିକାକୁ ମଜବୁତ କରିଥାଏ।
ଓଡ଼ିଶା ଗଣମାଧ୍ୟମ ପ୍ରତିନିଧି ଦଳ ଏହି ଗସ୍ତ ସମୟରେ ପିଆଇବି ତିରୁଅନନ୍ତପୁରମର ଅତିରିକ୍ତ ମହାନିର୍ଦ୍ଦେଶକ ଶ୍ରୀ ଭି. ପଲାନିସାମିଙ୍କୁ ମଧ୍ୟ ସାକ୍ଷାତ କରିଥିଲେ। ବିକାଶମୂଳକ ସାମ୍ବାଦିକତାକୁ ପ୍ରୋତ୍ସାହନ ଦେବା ଏବଂ ସରକାର ଓ ଗଣମାଧ୍ୟମ ମଧ୍ୟରେ ଯୋଗାଯୋଗକୁ ସୁଦୃଢ଼ କରିବାରେ ପିଆଇବିର ଭୂମିକା ଉପରେ ଆଲୋଚନା ହୋଇଥିଲା।
ପିଆଇବି ଭୁବନେଶ୍ୱରର ଉପ-ନିର୍ଦ୍ଦେଶକ ଶ୍ରୀ ମନୋଜ କୁମାର ଜାଲି, ଗଣମାଧ୍ୟମ ଓ ଯୋଗାଯୋଗ ଅଧିକାରୀ ସ୍ୱାଧୀନ ଶକ୍ତି ପ୍ରସାଦ ଏହି ଗସ୍ତକୁ ପରିଚାଳନା କରିଥିଲେ ।