ଭୁବନେଶ୍ୱର : ଲୋକସଭା ଓ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ପକ୍ଷରୁ ବିଧାୟକ ମହମ୍ମଦ ମୋକିମ ଓ ପୂର୍ବତନ କାର୍ଯ୍ୟକାରୀ ସଭାପତି ଚିରଞ୍ଜିବ ବିଶ୍ୱାଳଙ୍କ ସମେତ ତିନି ବରିଷ୍ଠ ନେତାଙ୍କ ନିଲମ୍ବନ ଓ ବହିଷ୍କାର ଆଦେଶ ପ୍ରତ୍ୟାହାର କରାଯାଇଛି।
ବାରବାଟୀ-କଟକ ବିଧାୟକ ମହମ୍ମଦ ମୋକିମ, ଜଗତସିଂହପୁରର ପୂର୍ବତନ ବିଧାୟକ ଚିରଞ୍ଜିବ ବିଶ୍ୱାଳ ଓ କୋରାପୁଟର ପୂର୍ବତନ ବିଧାୟକ କୃଷ୍ଣଚନ୍ଦ୍ର ସଗରିଆଙ୍କ ନିଲମ୍ବନ ଆଦେଶ ପ୍ରତ୍ୟାହାର କରାଯାଇଛି ବୋଲି ଓଡ଼ିଶା ପ୍ରଦେଶ କଂଗ୍ରେସ କମିଟି ପ୍ରଭାରୀ ଅଜୟ କୁମାର ସୂଚନା ଦେଇଛନ୍ତି।
ବିଭିନ୍ନ କାରଣରୁ କଂଗ୍ରେସ ଛାଡିଥିବା ଅନ୍ୟ ସମସ୍ତ ନେତାଙ୍କୁ ଦଳକୁ ଫେରି ଓଡ଼ିଶାରେ ବିଜେଡି ଓ ବିଜେପି ସହ ଏକଜୁଟ ହୋଇ ଲଢ଼ିବାକୁ ଡ. କୁମାର ନିବେଦନ କରିଛନ୍ତି।
୨୦୨୪ ଲଢ଼େଇ ପାଇଁ ଯୁଦ୍ଧ କ୍ଷେତ୍ରରେ ଅବତରଣ କରିବା ପୂର୍ବରୁ ଗୃହକୁ ଶୃଙ୍ଖଳିତ କରିବା ପାଇଁ କଂଗ୍ରେସ ଦଳ କସରତ ଆରମ୍ଭ କରିଛି। ୫ ଥର ବିଧାୟକ ତଥା ପୂର୍ବତନ ମନ୍ତ୍ରୀ ବଳଭଦ୍ର ମାଝୀ ଖୁବଶୀଘ୍ର କଂଗ୍ରେସରେ ଯୋଗଦେବେ ବୋଲି ଡ. କୁମାର ସଙ୍କେତ ଦେଇଛନ୍ତି | ଶ୍ରୀ ମାଝୀ ନିକଟରେ ବିଜେଡି ଛାଡିଥିଲେ
ସେ କହିଛନ୍ତି, ପାର୍ଟିରେ ପୁଣି ଥରେ କାମ ଆରମ୍ଭ କରି ମୁଁ ଆନନ୍ଦିତ। ତଥାପି ମୁଁ କେବେ ବି ଦଳ ବିରୋଧୀ କାର୍ଯ୍ୟରେ ଲିପ୍ତ ନଥିଲି। ଭବିଷ୍ୟତରେ ଦଳ ମୋତେ ଯେଉଁ ଦାୟିତ୍ୱ ଦେବ ମୁଁ ତାହା ପାଳନ କରିବି ବୋଲି ମହମ୍ମଦ ମୋକିମ୍ କହିଛନ୍ତି।
ଜୁଲାଇ ୧୫, ୨୦୨୩ରେ ଏଆଇସିସିର ଶୃଙ୍ଖଳାଗତ କାର୍ଯ୍ୟାନୁଷ୍ଠାନ କମିଟି ‘ଦଳ ବିରୋଧୀ‘ କାର୍ଯ୍ୟକଳାପ ଆଧାରରେ ମୋକିମ୍ ଏବଂ ଚିରଞ୍ଜିବଙ୍କୁ ଦଳରୁ ନିଲମ୍ବିତ କରିଥିଲା।
ଏହା ପୂର୍ବରୁ ୨୦୧୯ ଜାନୁଆରି ୧୯ତାରିଖରେ ଦଳ ବିରୋଧୀ କାର୍ଯ୍ୟରେ ଲିପ୍ତ ଥିବା ଅଭିଯୋଗରେ କୋରାପୁଟର ପୂର୍ବତନ ବିଧାୟକ କୃଷ୍ଣଚନ୍ଦ୍ର ସଗରିଆଙ୍କୁ ଦଳ ନିଲମ୍ବିତ କରିଥିଲା। ୨୦୧୮ରେ ସେ ବିଧାୟକ ପଦରୁ ଇସ୍ତଫା ଦେଇଥିଲେ।
ସେ କହିଛନ୍ତି, ମୁଁ କଲେଜ ସମୟରୁ କଂଗ୍ରେସର ଆଦର୍ଶରେ ପ୍ରଭାବିତ ହୋଇ କଂଗ୍ରେସରେ ଯୋଗ ଦେଇଥିଲି। ଦଳର ନିଲମ୍ବନ ଆଦେଶ ମୋତେ ବହୁତ ଯନ୍ତ୍ରଣା ଦେଇଥିଲା। ତେବେ ପାଞ୍ଚ ବର୍ଷ ପରେ ଏହାକୁ ପ୍ରତ୍ୟାହାର କରିନିଆଯାଇଥିଲା। ଦଳୀୟ ନେତୃତ୍ୱଙ୍କ ନିର୍ଦ୍ଦେଶ ଅନୁଯାୟୀ ମୁଁ ନିଶ୍ଚିତ ଭାବେ କଂଗ୍ରେସ ପାଇଁ କାମ କରିବି। ଦଳ ପାଇଁ ସମ୍ପତ୍ତି ପାଲଟିବାକୁ ଚେଷ୍ଟା କରିବି ବୋଲି ଶ୍ରୀ ସଗରିଆ କହିଛନ୍ତି।
ଉଲ୍ଲେଖଯୋଗ୍ୟ, ଓଡ଼ିଶାରେ ୨୦୨୪ ନିର୍ବାଚନକୁ ଆଖି ଆଗରେ ରଖି ଅତୀତରେ ବିଭିନ୍ନ ପରିସ୍ଥିତିରେ ଅନ୍ୟ ରାଜନୈତିକ ଦଳକୁ ଡେଇଁଥିବା ଦଳର ଅନେକ ବରିଷ୍ଠ ନେତାଙ୍କୁ ଫେରାଇ ଆଣିବାରେ କଂଗ୍ରେସ ସହାୟକ ହେଉଛି। ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ (୮୦) ୯ ବର୍ଷ ପରେ ପତ୍ନୀ ଓ ପୁଅଙ୍କ ସହ ଗତ ଜାନୁଆରୀ ୧୭ ତାରିଖରେ ପୁଣି ଥରେ କଂଗ୍ରେସରେ ଯୋଗ ଦେଇଥିଲେ।
ଏହା ପୂର୍ବରୁ ଦକ୍ଷିଣ ଓଡ଼ିଶାର ବରିଷ୍ଠ ଆଦିବାସୀ ନେତା ଜୟରାମ ପାଙ୍ଗୀ କଂଗ୍ରେସ ପରିବାରରେ ଯୋଗ ଦେଇଥିଲେ। ଗମାଙ୍ଗ ପରିବାର ଶ୍ରୀ ପାଙ୍ଗୀ ଓ ଶ୍ରୀ ସଗରିଆଙ୍କ ଯୋଗଦାନ ନିଶ୍ଚିତ ଭାବେ ନିଜ ଗଡ଼ ଅବିଭକ୍ତ କୋରାପୁଟ ଜିଲ୍ଲାରେ ସଫଳ ହେବାରେ ସହାୟକ ହେବ ବୋଲି ଜଣେ ରାଜନୈତିକ ପର୍ଯ୍ୟବେକ୍ଷକ କହିଛନ୍ତି।