ଓଡିଶାରୁ ବ୍ୟାଙ୍କ୍ଗୁଡିକ ଯେତିକି ଜମା ସଂଗ୍ରହ କରୁଛନ୍ତି ତାହା ତୁଳନାରେ ଢେର କମ୍ ପରିମାଣ ଋଣ ଦେଉଥିବାରୁ ଏହା ଉଦ୍ବେଗଜନକ ପରିସ୍ଥିତି ସୃଷ୍ଟି କରିବା ସହିତ ରାଜ୍ୟର ବିକାଶ ଉପରେ ପ୍ରତିକୂଳ ପ୍ରଭାବ ପକାଉଛି । ବର୍ଷକୁ ବର୍ଷ କ୍ରେଡିଟ-ଡିପୋଜିଟ୍ (ସିଡି) ଅନୁପାତ ହ୍ରାସ ପାଉଥିବାବେଳେ କୋଭିଡ ମହାମାରୀ ସମୟରେ ଲୋକଙ୍କୁ ଅଧିକ ପରିମାଣରେ ଋଣ ପ୍ରଦାନ ଉପରେ ସରକାର ଗୁରୁତ୍ୱ ଦେଉଛନ୍ତି ।
ନିକଟରେ ଅନୁଷ୍ଠିତ ରାଜ୍ୟ ସ୍ତରୀୟ ବ୍ୟାଙ୍କର୍ସ କମିଟି ବୈଠକରେ କମ୍ ଋଣ ପ୍ରଦାନକୁ ନେଇ ରାଜ୍ୟ ସରକାର ଉଦ୍ବେଗପ୍ରକାଶ କରିଥିଲେ । ଚଳିତବର୍ଷ ଜୁନ୍ ୩୦ ତାରିଖ ସୁଦ୍ଧା ଓଡିଶାରେ ସିଡି ଅନୁପାତ ୫୫.୭୯ ପ୍ରତିଶତକୁ ପାଇଛି ଯାହାକି ଗତବର୍ଷ ଜୁନ୍ ଶେଷସୁଦ୍ଧା ୬୨.୪୩ ପ୍ରତିଶତ ରହିଥିଲା । ଜାତୀୟ ସ୍ତରରେ ଏହା ୭୪ ପ୍ରତିଶତ ରହିଛି ।
ଚଳିତବର୍ଷ ଜୁନ୍ ଶେଷ ସୁଦ୍ଧା ମୋଟ୍ ଜମା ୩,୫୮,୫୩୧କୋଟି ୩୩ଲକ୍ଷ ଟଙ୍କା ହୋଇଥିବାବେଳେ ଏଥିରୁ ରାଜ୍ୟରେ ୨,୦୦,୦୩୪କୋଟି ୦୭କୋଟି ଟଙ୍କା ବ୍ୟବହାର ହୋଇଥିଲା । ତେବେ ମାର୍ଚ୍ଚ ୨୦୧୮ରେ ମୋଟ୍ ୨,୭୫,୫୧୧କୋଟି ୮ଲକ୍ଷ ଟଙ୍କା ମଧ୍ୟରୁ ୧,୯୨,୧୧୩କୋଟି ୬୬ଲକ୍ଷ ଟଙ୍କାର ଋଣ ପ୍ରଦାନ କରାଯାଇଥିଲା । ବ୍ୟବସାୟିକ ବ୍ୟାଙ୍କ୍ଗୁଡିକ ରାଜ୍ୟରୁ ମୋଟା ଆକାରର ଜମା ସଂଗ୍ରହ କରୁଥିବାବେଳେ ସେହି ଅନୁଯାୟୀ ଋଣ ପ୍ରଦାନ କରୁନଥିବାରୁ ସିଡି ଅନୁପାତ କମିବାରେ ଲାଗିଛି । ବ୍ୟାଙ୍କଗୁଡିକର ଜମା ସଂଗ୍ରହ ପରିମାଣ ୪୧,୫୯୬କୋଟି ୩ଲକ୍ଷ ଟଙ୍କା ବୃଦ୍ଧି ପାଇଥିବାବେଳେ ଋଣ ପ୍ରଦାନରେ ମାତ୍ର ୨୧୬୭କୋଟି ୬୮ଲକ୍ଷ ଟଙ୍କା ବୃଦ୍ଧିପାଇଛି । ଫଳରେ ସିଡି ଅନୁପାତ ୬୨.୪୩ ପ୍ରତିଶତରୁ ୫୫.୭୯ ପ୍ରତିଶତକୁ ହ୍ରାସ ପାଇଛି ।
ରାଜ୍ୟର ମାତ୍ର ୩ଟି ଜିଲ୍ଲା ଝାରସୁଗୁଡା, ଯାଜପୁର ଓ ବୌଦରେ ସିଡି ଅନୁପାତ ୬୦ପ୍ରତିଶତ ଉପରେ ରହିଥିବାବେଳେ ୧୨ଟି ଜିଲ୍ଲାରେ ଏହା ୪୦ପ୍ରତିଶତ ତଳେ ରହିଛି । ଏହିସବୁ ଜିଲ୍ଲାଗୁଡିକ ହେଲା ଅନୁଗୁଳ, ଦେବଗଡ, ସମ୍ବଲପୁର, କନ୍ଧମାଳ, ମାଲକାନଗିରି, ଗଜପତି, ଗଞ୍ଜାମ, ପୁରୀ, କେନ୍ଦ୍ରାପଡା, ଜଗତ୍ସିଂହପୁର, କେନ୍ଦୁଝର ଏବଂ ମୟୁରଭଞ୍ଜ । କୃଷି ପ୍ରଧାନ ରାଜ୍ୟ ଓଡିଶାର ୬୩ ପ୍ରତିଶତ ଲୋକ କୃଷି ଉପରେ ନିର୍ଭର କରୁଥିବାବେଳେ ଚଳିତବର୍ଷ ଜୁନ୍ ଶେଷ ସୁଦ୍ଧା ଏହି କ୍ଷେତ୍ରକୁ ମାତ୍ର ୫୯,୮୧୧କୋଟି ୮ଲକ୍ଷ ଟଙ୍କାର ଋଣ ଯୋଗାଯାଇଛି । ସମବାୟ ବ୍ୟାଙ୍କ୍ ଗୁଡିକ ସେମାନଙ୍କ ଜମା ସଂଗ୍ରହ ତୁଳନାରେ ଅଧିକ କୃଷିଋଣ ଦେଉଥିବାବେଳେ ବ୍ୟବସାୟିକ ବ୍ୟାଙ୍କ୍ଗୁଡିକର ପ୍ରଦର୍ଶନ ଏ କ୍ଷେତ୍ରରେ ଅତ୍ୟନ୍ତ ନୈରାଶ୍ୟଜନକ ରହିଛି ।
ସମବାୟ ବ୍ୟାଙ୍କ୍ ଗୁଡିକ ସଂଗ୍ରହ କରୁଥିବା ଜମାର ୧୨୩.୦୭ ପ୍ରତିଶତ ଋଣ ଦେଉଥିବାବେଳେ ବ୍ୟବସାୟିକ ବ୍ୟାଙ୍କ୍ର ଏହି ହାର ୪୭.୩୫ ପ୍ରତିଶତ ରହିଛି । କୋଭିଡ ମହାମାରୀ ସମୟରେ ଏମ୍ଏସ୍ଏମ୍ଇ କ୍ଷେତ୍ର ଗୁରୁତର ପ୍ରଭାବିତ ହୋଇଥିବାବେଳେ ଏହି କ୍ଷେତ୍ରକୁ ଯେତିକି ଋଣ ମିଳିବାକଥା ତାହା ମିଳୁନାହିଁ । କିନ୍ତୁ ବ୍ୟାଙ୍କ୍ଗୁଡିକ ସରକାରୀ ସଂସ୍ଥାରୁ କିଭଳି ଅଧିକ ଜମା ସଂଗ୍ରହ କରିବେ ସେଥିପାଇଁ ଲାଗିପଡିଛନ୍ତି । ବ୍ୟାଙ୍କରେ ୧୦ହଜାର କୋଟି ଟଙ୍କାରୁ ଅଧିକ ସରକାରୀ ଅର୍ଥ ପଡି ରହିଥିବାବେଳେ ତାହାକୁ ଉନ୍ନୟନ କାର୍ଯ୍ୟରେ ବିନିଯୋଗ ଲାଗି ଅର୍ଥ ବିଭାଗ ପକ୍ଷରୁ ଡିଡିଓମାନଙ୍କୁ କୁହାଯାଇଛି । ତେବେ ଏଥିରୁ ପ୍ରାୟ ୩୫୦୦କୋଟି ଟଙ୍କା ଉଠାଯାଇ ବିଭିନ୍ନ ଉନ୍ନୟନ କାର୍ଯ୍ୟରେ ବିନିଯୋଗ ହୋଇଥିବା ଜଣାଯାଇଛି ।
