ଭୁବନେଶ୍ୱର : ଦୀର୍ଘ ୭ ବର୍ଷ ପରେ ଆଜି ଠାରୁ ରାଜ୍ୟରେ ବହୁ ପ୍ରତୀକ୍ଷିତ ହାତୀ ଗଣନା ଆରମ୍ଭ ହୋଇଛି।
ପିସିସିଏଫ୍ ବନ୍ୟପ୍ରାଣୀ ଶ୍ରୀ ସୁଶାନ୍ତ ନନ୍ଦ ବୈଜ୍ଞାନିକ ପଦ୍ଧତିରେ ହାତୀ ଗଣନା ପାଇଁ ରୋଡ୍ ମ୍ୟାପ୍ ପ୍ରସ୍ତୁତ କରିଛନ୍ତି।
ରାଜ୍ୟର ୫୧ଟି ବନଖଣ୍ଡ ମଧ୍ୟରୁ ୪୬ଟି ଡିଭିଜନରେ ନିଖିଳ ଓଡ଼ିଶା ହାତୀ ଆକଳନ ୨୦୨୪ ଆରମ୍ଭ ହୋଇଛି। ଆକଳନକାରୀମାନେ ସିଧାସଳଖ ଗଣନା ପଦ୍ଧତି ବ୍ୟବହାର କରି ହାତୀମାନଙ୍କର ଗଣନା କରିବେ ଏବଂ ଏଥିପାଇଁ ପ୍ରକ୍ରିୟା ଗତିଶୀଳ ହୋଇଛି ।
ରାଜ୍ୟ ବନ୍ୟପ୍ରାଣୀ ସଂଗଠନ ର ଅଧିକାରୀମାନେ କହିଛନ୍ତି ଯେ ଗଣନା ଟିମ୍ ଦ୍ୱାରା ବ୍ୟାରେକ୍, ୱାଚ୍ ଟାୱାର ଏବଂ ଅନ୍ୟାନ୍ୟ ପ୍ରତିଷ୍ଠାନ ସହିତ ସମୁଦାୟ ୧୧୩୬ଟି ମଞ୍ଚା ବ୍ୟବହାର କରାଯିବ। ସଂଗୃହୀତ ତଥ୍ୟକୁ ରେଞ୍ଜ, ଡିଭିଜନ ଓ ସର୍କଲ ସ୍ତରରେ ବିଶ୍ଳେଷଣ କରାଯାଇ ଶେଷରେ ମୁଖ୍ୟାଳୟରେ ଚୂଡ଼ାନ୍ତ ସଂଖ୍ୟାରେ ପହଞ୍ଚିବ।
ମାଲକାନଗିରି, କୋରାପୁଟ, ପୁରୀ, କେନ୍ଦ୍ରାପଡ଼ା ଓ ଜଗତସିଂହପୁରକୁ ବାଦ୍ ଦେଲେ ରାଜ୍ୟର ୫୧ଟି ଡିଭିଜନ ମଧ୍ୟରୁ ୪୬ଟି ଡିଭିଜନରେ ହାତୀ ଚିହ୍ନଟ ହୋଇଥିବା ବେଳେ ଅନ୍ୟ ୨୫ଟି ଜିଲ୍ଲାରେ ହାତୀଙ୍କ ଉପସ୍ଥିତି ରହିଛି ବୋଲି ପ୍ରଧାନ ମୁଖ୍ୟ ବନ ସଂରକ୍ଷକ (ପିସିସିଏଫ୍) ସୁଶାନ୍ତ ନନ୍ଦ ସୂଚନା ଦେଇଛନ୍ତି।
ଓଡ଼ିଶାରେ ପ୍ରତି ଦୁଇ ବର୍ଷରେ ନିଜସ୍ୱ ହାତୀ ଗଣନା କରାଯାଉଥିଲା। କିନ୍ତୁ ୨୦୧୯ରେ ଏହା କରାଯାଇନଥିଲା ଏବଂ ପରବର୍ତ୍ତୀ ସମୟରେ ୨୦୨୦ରେ କୋଭିଡ୍-୧୯ ବ୍ୟାପିବା ପରେ ଏହାକୁ ସ୍ଥଗିତ ରଖାଯାଇଥିଲା।
ଗତ ୨୦୧୭ ଜନଗଣନାରେ ରାଜ୍ୟରେ ହାତୀ ସଂଖ୍ୟା ୧୯୭୬ ରେକର୍ଡ କରାଯାଇଥିଲା, ଯାହା କି ୨୦୧୫ରେ ପୂର୍ବ ଗଣନା ସଂଖ୍ୟା ୧୯୫୪ ତୁଳନାରେ ସାମାନ୍ୟ ବୃଦ୍ଧି ପାଇଥିଲା । ତେବେ ରାଜ୍ୟରେ ୨୦୧୯-୨୦ରୁ ୨୦୨୩-୨୪ ମଧ୍ୟରେ ପାଞ୍ଚ ବର୍ଷ ମଧ୍ୟରେ ଶିକାର, ବିଦ୍ୟୁତ୍ ଆଘାତ ଓ ଦୁର୍ଘଟଣା ସମେତ ବିଭିନ୍ନ କାରଣରୁ ୪୦୦ରୁ ଅଧିକ ହାତୀଙ୍କ ମୃତ୍ୟୁ ଘଟିଛି ।