ଭୁବନେଶ୍ୱର : ରାଜଧାନୀରେ ବହୁ ଆପାର୍ଟମେଣ୍ଟରେ ନିୟମ ମୁତାବକ ସୋସାଇଟି ଗଠନ ହୋଇପାରୁ ନାହିଁ । ବିଲଡରମାନେ କ୍ଷମତା ହସ୍ତାନ୍ତର ପାଇଁ ଧରାଛୁଆଁ ଦେଉନଥିବାରୁ ଅନ୍ତେବାସୀମାନେ ଚାହିଁଲେ ବି ଏହା ଗଠନ କରିପାରୁନଥିବା ଜଣାଯାଇଛି ।
ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପରିସୀମା ମଧ୍ୟରେ ୧୮୦୦ ରୁ ଅଧିକ ଆପାର୍ଟମେଣ୍ଟର ନକ୍ସା ଅନୁମୋଦନ ହୋଇଛି । ଏହା ମଧ୍ୟରୁ କେତେକର ର୍ନିମାଣ ସରିବା ସହିତ ଲୋକେ ବସବାସ କରୁଛନ୍ତି । ତେବେ ରେରା ନିୟମ ଅନୁଯାୟୀ ଆପାର୍ଟମେଣ୍ଟରେ ବସବାସ କରୁଥିବା ଲୋକେ ସମିତି ଗଠନ ସହିତ ଏହାର ପରିଚାଳନା, ରକ୍ଷଣାବେକ୍ଷଣ ଆଦି ସେମାନଙ୍କ ହାତରେ ରହିବ । ବିଲଡରମାନେ ଘର ହସ୍ତାନ୍ତର ପରେ ତୁରନ୍ତ ଅନ୍ତେବାସୀଙ୍କୁ ଏହି କ୍ଷମତା ଦେବା ଆବଶ୍ୟକ ।
ହେଲେ ହାତଗଣତି କେତେକ ନିର୍ମାଣକାରୀ ସଂସ୍ଥାକୁ ବାଦ୍ଦେଲେ ଅନେକ ବିଲ୍ଡର ଏଥିପ୍ରତି ଦୃଷ୍ଟି ଦେଉ ନାହାନ୍ତି । ଘର କାର୍ଯ୍ୟ ସମ୍ପୂର୍ଣ୍ଣ କରିବା ପୂର୍ବରୁ ଲୋକେ କିଭଳି ରହିବେ ତାହାର ବ୍ୟବସ୍ଥା କରୁଛନ୍ତି । ଯେହେତୁ ବହୁ ବିଲଡର ଧାର୍ଯ୍ୟ ସମୟସୀମା ମଧ୍ୟରେ ନିର୍ମାଣକାର୍ଯ୍ୟ ସାରୁନାହାନ୍ତି, ତେଣୁ ଋଣଚାପରୁ ରକ୍ଷା ପାଇବାପାଇଁ ଲୋକେ ଆଗପଛ ନବିଚାରି ଆପାର୍ଟମେଣ୍ଟରେ ରହିଯାଉଛନ୍ତି । ଥରେ ଲୋକେ ରହିଲାପରେ ବିଲଡର ସଂସ୍ଥା ଆଉ ସହଜରେ ଧରଛୁଆଁ ଦେଉ ନାହାନ୍ତି । ପାନୀୟଜଳ, ବିଦ୍ୟୁତ୍, ଲିଫ୍ଟ, ଜଳ ନିଷ୍କାସନ, ସିସିଟିଭି, ପାର୍କ ଆଦିର କାମ ଅତ୍ୟନ୍ତ ମନ୍ଥର ଗତିରେ ଚଳାଉଛନ୍ତି ।
ଥରେ ସୋସାଇଟି ଗଠନ ହୋଇ କ୍ଷମତା ହସ୍ତାନ୍ତର ହୋଇଗଲେ ଆପାର୍ଟମେଣ୍ଟରେ ବିଲଡରଙ୍କ ଆଉ କୌଣସି କ୍ଷମତା ରହିବ ନାହିଁ । ତେଣୁ ନିର୍ମାଣକାରୀ ସଂସ୍ଥା ଏଥିପ୍ରତି ଧ୍ୟାନ ଦେଉନଥିବା କୁହାଯାଉଛି । ସେହିଭଳି କେତେକ ନିର୍ମାଣକାରୀ ସଂସ୍ଥା ନିଜ ନିଜର ଆପାର୍ଟମେଣ୍ଟରରେ କିଛି ଘରକୁ ବିକ୍ରି ନକରି ପକାଇ ରଖିବା ସହିତ ସେଠାରେ ଗୁଣ୍ଡାଶ୍ରେଣୀର ଲୋକଙ୍କୁ ରଖୁଛନ୍ତି । ଖାଲି ପଡୁଥିବା ଘରର ଦର ମୂଲଚାଲ କରି ବଢାଉଛନ୍ତି । ଯଦି ଆପାର୍ଟମେଣ୍ଟର କୌଣସି ଅନ୍ତେବାସୀ ଅଭାବ ଅସୁବିଧା ସଂକ୍ରାନ୍ତରେ ବିଲଡରଙ୍କୁ ବାରମ୍ବାର ଅଭିଯୋଗ କରୁଛନ୍ତି ତେବେ ସେଠାରେ ରହୁଥିବା ଗୁଣ୍ଡାଶ୍ରେଣୀର ଲୋକେ ସେମାନଙ୍କୁ ନାଲିଆଖି ଦେଖାଇବାକୁ ପଛାଉ ନାହାନ୍ତି ।
ଏଭଳି ସ୍ଥିତି ଯୋଗୁଁ ଅନେକ ଆପାର୍ଟମେଣ୍ଟ ବାସିନ୍ଦା ସୁରକ୍ଷା ପାଇଁ ନିଜ ହାତରୁ ସିସିଟିଭି ଲଗାଇବା ସହିତ ବିଦ୍ୟୁତ୍ ଓ ଲିଫ୍ଟ ଆଦି ମରାମତି କରୁଛନ୍ତି । ଏପରିକି କେତେକ ବାସିନ୍ଦା ଚାନ୍ଦା ଆଦାୟକରି ଆପାର୍ଟମେଣ୍ଟକୁ ରାସ୍ତା ନିର୍ମାଣ କରିବାକୁ ବାଧ୍ୟ ହେଉଛନ୍ତି । ଋଣ ଚାପରେ ପଡିଥିବା ଲୋକେ ଘରେ ରହିବାକୁ ବିକଳ ହେଉଥିବାରୁ ଏହାର ଫାଇଦା ନେଇ ବିଲଡରସଂସ୍ଥାମାନେ ଅନ୍ତେବାସୀଙ୍କ ଅଭାବ ଅସୁବିଧା ପ୍ରତି କର୍ଣ୍ଣପାତ କରୁନାହାନ୍ତି । ଓଲଟା କେତେକ ସ୍ଥାନରେ ସେମାନେ ନାଲିଆଖି ଦେଖାଉଥିବା ଅଭିଯୋଗ ହେଉଛି ।
ଭୁବନେଶ୍ୱର ମହାନଗର ନିଗମ (ବିଏମସି) ଇଲାକାରେ ୧୧୫ରୁ ଅଧିକ ଆପାର୍ଟମେଣ୍ଟର ନକ୍ସା ଅନୁମୋଦନ ହୋଇଥିବାବେଳେ ଅନେକର ନିର୍ମାଣ କାର୍ଯ୍ୟ ସରିବା ସହିତ ସେଠାରେ ଲୋକେ ବସବାସ କରୁଛନ୍ତି । ତେଣୁ ଏହିସବୁ ଆପାର୍ଟମେଣ୍ଟରେ ସୋସାଇଟି ଗଠନ ହୋଇଛି କି ତାହାର ଯଦି ତଦନ୍ତ କରାଯିବ ତେବେ ସତ୍ୟ ପଦାକୁ ଆସିବା ସହିତ ଅନେକ ର୍ନିମାଣକାରୀ ସଂସ୍ଥା କିଭଳି ଆଇନ୍କୁ ଖାତିର କରୁନାହାନ୍ତି ତାହା ଜଣାପଡିଯିବ ବୋଲି କୁହାଯାଉଛି । (ତଥ୍ୟ)